Óhugnaður í brasilísku fangelsi

Það er ekki hægt annað en fyllast óhug við að heyra af fimmtán ára stúlkunni sem komið var fyrir í fangaklefa í Brasilíu með tveim tugum karlmanna og það í rúman mánuð. Maður hefði haldið að óhugnanlegt mannréttindabrot af þessu tagi þekktist ekki í upphafi 21. aldarinnar og það í landi sem maður hefði getað talið eðlilegt samfélag, en ekki kúgað af einræði eða mannréttindabrotum. Þetta hlýtur að teljast mjög dökkur blettur á réttarkerfinu í Brasilíu.

Það eitt að stelpa sé lokuð inni í klefa með fjölda manns í einn dag er stóralvarlegt mál, en að það standi í yfir mánuð er svo lygilegt að óhugnanlegt telst. Það var varla við öðru að búast en að harðsvíraðir glæpamenn sem eru lokaðir af með fimmtán ára stelpu misnoti hana í bak og fyrir. Lýsingarnar á þessu máli eru allavega óhugnanlegar og getur varla farið öðruvísi en einhver verði dreginn til ábyrgðar í þessu dapurlega máli. Það á ekki að vera eðlilegt að fara svona með börn.

Það gildir einu hvort stelpan hafi brotið af sér en það þarf algjöran dómgreindarbrest til að dæma hana til vistar með karlmönnum í lokuðu rými allan þennan tíma. En þetta er óhugnaður af því tagi að öllu siðmenntuðu fólki gjörsamlega ofbýður. Það er til skammar að svona gerist á okkar dögum.

15 ára stúlka sett í fangaklefa með 20 mönnum

Athugasemdir

[Sigrún Sæmundsdóttir, 23.11.2007 kl. 14:12]

Það kemur fram í fréttum út í Brazílíu að hún var GRUNUÐ um aðild að ráni en ekkert sannað og núna virðist engin vita um hvað það var. Þetta er ekki í fyrsta skipti sem svona gerist þarna, bæði ungir drengir og svo annað tilfelli í sumar en þá var það aðeins eldri stúlka og með mun fleiri föngum í klefa. Þetta er viðbjóður og ætti svo sannalega að láta þá fangaverði sem skemmtu sér við að horfa á þetta, þarna inn í staðin fyrir stúlkuna.

[Stefán Friðrik Stefánsson, 23.11.2007 kl. 14:31]

Takk fyrir kommentin.

Laissez-Faire: Það skiptir einu hvers kyns fólk er. Mannréttindabrot er samt og jafnt í svona tilfelli hvort sem það er strákur eða stelpa. Þetta er óþverri sama hvernig litið er á það. En auðvitað er hræsni að tala bara um kynferðislega misnotkun á stelpu frekar en strák.

Sigrún: Já, þetta er alveg svakalegt. Þetta á ekki að þekkjast á okkar dögum.

mbk.