Pabbapössun í Hagkaup

Mér finnst það mjög sniðugt hjá Hagkaup að opna sælureit fyrir karlmenn sem þola ekki búðaferðir í nýjustu versluninni í Holtagörðum. Þetta er gert að erlendri fyrirmynd, hefur lukkast mjög vel þar og því varla undrunarefni að íslenskar verslanir byrji með þetta. Það eru ekki allir sem hafa farið í búð sér til skemmtunar, oft eru það karlmenn sem eiginlega verða að fylgihlut eiginkvenna sinna í slíkum ferðum og hafa ekki gaman af að versla. Þarna er væntanlega það vandamál leyst. Það verður reyndar áhugavert að sjá hvort að þetta verði í öllum verslunum Hagkaups fyrr en varir.

Þarna verður hægt að lesa dagblöðin, kíkja á boltann og annað efni. Það er eflaust réttast að kalla þetta pabbapössun, enda segir mér svo hugur að það verði helst heimilisfeður þessa lands sem verði fastagestir þarna. Margir þeirra eru eins og illa gerðir hlutir í verslunarleiðangri en losna nú við það að taka þátt í því, geta beðið verslunarferðina af sér. Þetta er mjög sniðug lausn á vanda þeirra sem fara í búð sem vandræðalegir fylgihlutir og hafa satt best að segja engan áhuga á því. Held að þetta verði nefnilega mikið notað.

Það er mjög langt síðan að svokölluð krakkahorn voru sett í verslanir þar sem börnin gátu beðið verslunarferðina af sér og samt haft gaman af því að fara, enda voru foreldrar argir yfir betlistandi barnanna og krakkarnir hundfúlir með það hversu lengi verslunarferðin stóð. Bæði foreldrar og börn sátt á eftir. Nú geta fylgihlutir verslunariðkenda farið í sælureit sinn og beðið ferðina af sér. Skynsamlegt og gott - þetta verður eflaust vinsæll reitur í verslunarferðinni fyrir fjölda fólks.

Pabbar í pössun í Hagkaupum

Athugasemdir

[Stefán Friðrik Stefánsson, 29.11.2007 kl. 16:26]

Hörður: Já, sé ekkert að þessu. Þeir nota þetta bara sem vilja og þá reyndar mun sjást hversu mikill fjöldi það sést. Skil ekkert í ummælum femínista, annars fannst mér þær skemma nógu mikið fyrir sér með ummælum um Egil Helgason þó ekki sé þessu bætt við.

Ingibjörg: Mér er fúlasta alvara með þessum skrifum. Þetta er ekkert einstakt fyrirbæri á Íslandi, svona sælureitir hafa verið settir upp í verslunarmiðstöðvum víða um heim og slegið í gegn. Eflaust mun svo verða hér á Íslandi líka.

mbk.

[spanjola (IP-tala skráð) 29.11.2007 kl. 22:20]

Ég er nú svo yfir mig hneyksluð. Ég bý erlendis og það leiðinlegasta sem ég geri er að fara í súpermarkaði, maðurinn minn hins vegar elskar það. Það tekur mig mikið átak að fara með honum og væri ég til í að slappa bara af heima meðan hann fer í sína uppáhalds iðju, risa súpermarkað, Ó, JÁ.

Ekki þarf ég "pössun" á meðan, nema bara til að sjá til þess að hann eyði ekki of miklu. Hvílík vitleysa. En svona er Ísland í dag eins og ég les það.