Ísafold lagt niður vegna aðgerða Kaupáss?

Kjaftasagan er sú að það standi til að leggja niður tímaritið Ísafold vegna ákvörðunar Kaupáss að hætta að selja það í verslunum sínum og jafnvel að ritstjórn þess verði sameinuð tímaritinu Nýju lífi. Það verður ekki farsæl ákvörðun ef höggva á blaðið niður vegna þess að einn verslunarrisinn vill ekki selja það.

Það má vera að umfjöllun Ísafoldar um Gunnar Birgisson, bæjarstjóra í Kópavogi, hafi verið beinskeytt, en það er afleitt ef slík ritskoðun sem felst í að kippa blaðinu úr verslununum verður til að það heyri sögunni til. Finnst ályktun Blaðamannafélags Íslands vegna þessa máls mjög skynsöm.

Það þarf enda að minna á að ritskoðun þeirra stóru í þessu samfélagi í tilfelli á borð við þetta getur aldrei verið góð. Hvaða skoðun sem mögulega má hafa á einhverjum skrifum er ritskoðun aldrei góð í opinberum miðlum.

Fordæma tilraun til ritskoðunar

Athugasemdir

[Friðjón R. Friðjónsson, 7.12.2007 kl. 19:11]

Stefán, hvaða ritskoðunarvitleysistal er þetta?

Hvers vegna er það ekki á forræði Kaupáss hvaða blöð þeir selja í verslunum sínum?

Heldur þú virkilega að þeim sé skylt að selja öll blöð í verslunum sínum?

Ef skapari.com fávitarnir fara að gefa út blað er einhverjum skylt að selja það? Er það ritskoðun ef Jón Jóhannesson verslunareigandi vill ekki selja blöðin? Hvað með klámblöð, á Nóatún að selja þau?

Var það ritskoðun þegar verslunareigendur vildu ekki selja DV lengur í kjölfar sjálfsmorðsmálsins, þú tókst nú þátt í því að fordæma blaðið ef ég man rétt. 

Þú ert að láta glepjast af áróðri Ísafoldarmanna, þú átt að vita betur.

[Stefán Friðrik Stefánsson, 7.12.2007 kl. 19:14]

Kaupás hætti sölu á Ísafold vegna umfjöllunar blaðsins um Gunnar fyrr á þessu ári.

[Stefán Friðrik Stefánsson, 7.12.2007 kl. 19:28]

Sæll Friðjón

Gunnar Birgisson er stjórnmálamaður og hefur verið umdeildur. Tekist hefur verið á um embættisfærslur hans og verk, t.d. heimsókn á næturklúbb. Hef svosem ekkert verið að skrifa um það. Fannst umfjöllunin á gráu svæði og varð hana svosem hvergi. Gunnar tók að mig minnir þá ákvörðun að kæra blaðið og forsvarsmenn þess. Það er auðvitað eðlilegt að hann fari með málið þá leið, enda taldi hann að sér vegið. Skil ekki af hverju Kaupás telur þá umfjöllun árás á sig en þeir verða að segja til um það bara og fara yfir þá hlið mála.

Í DV var á sínum tíma ráðist að manni úti á landi sem svipti sig lífi. Hann var ekki opinber persóna og vegna máls hans tók blaðið það leyfi að nafngreina hann og fjalla um möguleg afbrot hans. Það tók sér dómaravald með nafnbirtingu og upplýsingum sem engum voru ljós áður. Það er sennilega ein svæsnasta umfjöllun í seinni tíma fjölmiðlasögu hérna heima. Það risu margir upp þá, ég gerði það og mörg flokkasamtök eins og við vitum.

Gunnar Birgisson er enginn venjulegur maður úti í bæ. Hann hefur umtalsverð völd og á að geta varið sig ef hann telur að sér ráðist. Hef hvergi verið að mælast til þess að ráðist verði að honum og ætla ekkert að verja Ísafold hvað það varðar, en vona bara að það mál fari fyrir dóm.

Hvað varðar að hætta að selja blaðið verður viðeigandi verslunarfyrirtæki að tjá sig um það. Finnst það samt ekki rétt ákvörðun. Get ekki séð að ég sé að glepjast af neinum með því að tjá það. Sjálfur hef ég t.d. aldrei keypt þetta blað.

[Fannar frá Rifi, 7.12.2007 kl. 20:57]

Þetta eru verslanir. Ef verslunareigandi vill ekki taka einhverja vöru til sölu þá er það hans mál. Myndiru mótmæla því ef Bónus myndi ákveða að hætta að selja mjólk?

Þeir ráða því bara alveg hvað þeir gera. Ef eitthvað er þá er þetta mun meiri auglýsing fyrir Ísafold heldur en nokkuð sem þeir hefðu getað keypt. 

[Gísli Bergsveinn Ívarsson, 7.12.2007 kl. 22:46]

Hver segir að þeir hafi gert þetta vegna Gunnars Birgissonar?