Morðið á Benazir - hvað gerist nú í Pakistan?

Þetta hefur verið dagur hinna stóru tíðinda. Morðið á Benazir Bhutto eru skelfileg tíðindi, gríðarlegt áfall fyrir lýðræðið í Pakistan og baráttunni fyrir betri tímum. Án vafa er þetta stærsta frétt ársins 2007 á erlendum vettvangi. Búast má við vargöld í Pakistan. Eðlilega er heift og logandi reiði í þeim sem fylgdu henni að málum á dánardegi hennar. Það verður áhugavert að sjá hvernig sú heift mun brjótast fram er yfir lýkur.

Með Benazir Bhutto er fallin í valinn sterkasti forystumaður andstöðunnar gegn Pervez Musharraf, sem hefur ríkt sem einræðisherra í landinu í áratug og hefur nýlega tekið sér alræðisvald með því að sparka dómurum til að geta setið áfram með dómaravaldi þeirra sem eru honum þóknanlegir og ægivaldi yfir fjölmiðlum. Það er öllum ljóst að ekkert verður úr þingkosningum í næsta mánuði. Að halda kosningar nú væri lítillækkun við þann litríka stjórnmálamann sem markaði söguleg skref og hefur nú látið lífið við að berjast fyrir lýðræði í heimalandi sínu. Óvissan ein blasir nú við. Heiðarlegast væri reyndar að Musharraf hefði vit á að segja af sér á þessum örlagadegi.

Benazir var að ég tel eina von Pakistans í þeim ólgusjó vargaldar og átaka sem staðið hefur í landinu árum saman. Hún var eini leiðtoginn sem hafði kraft og leiðsögn sem gat skipt máli til að snúa blaðinu við og horfa framhjá átökum liðinna tíma og þeim blikum sem voru á lofti. Dauði hennar er gríðarlegt áfall fyrir lýðræðisbaráttuna, umfram allt baráttunni fyrir heiðarlegum kosningum og því að tryggt yrði að hlustað yrði á rödd almennings í þessu landi, þar sem þjóðhöfðinginn hefur nú ríkt í áratug með ægivaldi hersins í bakgrunni og sem leiðarljós. Það er aðeins spurning nú um hversu mikil átök verði. Það blasir við öllum að morðið á Benazir magnar óöldina sem staðið hefur.

Það er alltaf mikið áfall þegar að stjórnmálamenn falla í valinn við það eitt að berjast fyrir hugsjónum sínum og pólitískum markmiðum; eru drepnir vegna þess að þeir eru þyrnir í augum einhverra. Ég hef fylgst með atburðarásinni á Sky í dag. Þetta er auðvitað mikill örlagadagur, þegar að svo stutt er í áramót. Pakistan er enn einu sinni á krossgötum. Vonir voru bundnar við að endurkoma Benazir fyrir rúmum tveim mánuðum yrði nýtt upphaf. Það er allt breytt nú þegar að hún liggur á líkbörunum, fallin fyrir kúlum árásarmanns. Fólkið hennar er í örvilnan, það hefur heyrst vel í dag en samtalið við samherja hennar á Sky situr mjög í mér. Þar vantar leiðtoga nú. Það sést vel.

Dauði Benazir Bhutto markar enn ein þáttaskilin í sögu Pakistans. Það er vonandi að þau þáttaskil marki ekki það að Musharraf styrkist meir en orðið er. Það verður erfitt að finna leiðtoga til að fylla í spor hinnar litríku kjarnakonu. Það fylgjast allir með því nú hvað nýárs blessuð sól boðar pakistanskri þjóð. Þar er allt breytt með þessu vígi á baráttukonunni sem markaði svo söguleg skref.

Sharif hyggst sniðganga kosningarnar

Athugasemdir

[Ragnheiður , 27.12.2007 kl. 22:35]

Eins og oft áður, stórgóður pistill. Ég batt miklar vonir við að henni tækist að sameina þjóðina en svo fór nú ekki. Hún hefði líka þurft að sanna sig enn í embætti en spilling var talin loða við þegar hún var við völd. Það býst ég við að henni hefði tekist en það verða náttlega bara getgátur nú.

Stebbi, að lokum vil ég þakka þér fyrir marga stórfróðlega pistla á árinu 2007 og vona að ekki verði mikið lát á árið 2008. Þú afsakar hversu léleg ég er að kvitta fyrir lesturinn en ég les ansi oft hérna hjá þér.

Gleðilegt ár félagi og megi það verða þér gæfuríkt

[Stefán Friðrik Stefánsson, 28.12.2007 kl. 01:43]

Takk kærlega fyrir kommentið Ragnheiður mín.

Þetta er dapurlegt í Pakistan. Það er alltaf sorglegt þegar að fólk er drepið fyrir það eitt að eiga hugsjónir og vinna að lýðræði. Það er vonandi að það takist að lægja öldur þarna þó síðar verði.

Takk kærlega fyrir góðu orðin. Það var gaman að kynnast á árinu og ég þakka allt það liðna, öll góðu samskiptin. Óska þér gleðilegs árs vinkona.

mbk.