Farið yfir árið með Gesti og Hrafnhildi

Fór í morgunkaffi til Gests Einars og Hrafnhildar á Rás 2 klukkan hálf níu. Fórum þar yfir fréttir ársins og ræddum mál málanna nú við lok ársins. Það er alltaf gaman að kíkja til þeirra í spjall og fara yfir það sem er að gerast. Þetta hefur auðvitað verið líflegt ár í bloggheimum og mikið sem hefur verið skrifað um. Bloggsamfélagið hér á blog.is hefur reyndar sífellt vaxið og dafnað á árinu og væri reyndar gaman að vita hversu margir byrjuðu að blogga á þessu ári.

Það er fjarri lagi að bloggbólan sé eitthvað að springa eins og svo margir spekingar spáðu um í upphafi ársins 2007. Þvert á móti virðast bloggheimar sífellt að eflast og bætist í hópinn á hverjum degi. Þetta er vinsælasta tjáningarform nútímans, það blasir við öllum. Nú eru birtar tilvitnanir úr bloggum í dagblöðum og vitnað í það í öðrum fréttamiðlum. Það blasir við að bloggið er lykilmiðill í raun og þar verða fregnirnar ferskastar á meðan að blöðin og hinir hefðbundnu miðlar fylgja æ oftar á eftir umræðunni. Þetta er nútíminn í hnotskurn sennilega.

Ætli að Lúkasarmálið margfræga sé ekki eitt heitasta bloggmál ársins. Eftir að hinn margfrægi hundur hvarf sporlaust hér á Akureyri í sumar hófst mikið fár sem lauk með því að hann reis upp frá dauðum. Strák var kennt um að hafa komið hundinum fyrir kattarnef. Heit orð féllu í bloggheimum í garð hans. Eitthvað varð minna um afsökunarbeiðnir til hans eftir að hundurinn kom fram heill á húfi eftir vist upp á Glerárdal vikum saman. Hitinn í því máli varð mörgum lexía. Það er betra að hafa hemil á orðum sínum, það verður að skrifa af ábyrgð á blogginu eins og öðrum stöðum.

Enda hefur strákurinn sem var sótt að höfðað mál gegn þeim sem töluðu helst gegn honum. Það verður sennilega líflegt fréttamál næsta árs að sjá hvernig það fer allt saman og hver örlög bloggaranna sem höfðu ekki hemil á sér verður. Það var mikið talað um femínistana á blogginu, ekki má gleyma samúðarbylgjunni til Randvers eftir að hann var rekinn úr Spaugstofunni, Anna Nicole og Britney voru í annarri hverri bloggfærslu vissan part ársins eftir að önnur dó og hin rakaði af sér hárið, er Ísland floppaði í Eurovision, brúðkaup ársins og auglýsingamál RÚV.

Er þá aðeins fátt nefnt. Ekki má svo gleyma stjórnmálunum, en ný ríkisstjórn og meirihluti í borgarstjórn í kjölfar hins útúrtogaða REI-máls stendur þar hæst ásamt sögulegu falli Framsóknarflokksins, sem virðist í tilvistarkreppu í lok ársins. Komumst alls ekki yfir allt í morgun. En þetta var skemmtilegt spjall og gaman að líta um öxl.

Morgunspjall með Gesti Einari og Hrafnhildi

Athugasemdir

[Ásdís Sigurðardóttir, 31.12.2007 kl. 13:14]

Sæll elsku Stefán. Óska þér og þínum gæfuríks árs 2008 og ég er viss um að Akureyri heldur áfram að vera nafli alheimsins. Hlakka til að koma norður í sumar og fá mér latté á Bláu könnunni.  Takk fyrir sérlega ánægjulegt bloggár og við erum komin til að vera bloggarar.   

 

[Stefán Friðrik Stefánsson, 31.12.2007 kl. 15:50]

Takk kærlega fyrir kveðjuna Ásdís mín. Þetta hefur verið frábært ár og gaman að kynnast í bloggheimunum. Óska þér og þínum gleðilegs árs og þakka fyrir liðna árið. Stefnum að því að hittast næst þegar að þú kemur norður.

kær kveðja