Var ráðning orkumálastjóra vinargreiði ráðherra?

Ég sé að Orðið á götunni hefur tekið undir skrif mín í gær um ráðningu orkumálastjóra. Það stefnir flest í að þetta verði umdeild skipan og úr því verði jafnréttismál, þar sem Ragnheiður Inga Þórarinsdóttir, aðstoðarorkumálastjóri og staðgengill orkumálastjóra að undanförnu, muni fara með málið lengra og sérstaklega verði höfðað til þess að hún hafi ekki aðeins verið hæfasti umsækjandinn heldur auk þess verið kona sem gengið var framhjá.

Össur finnur greinilega fyrir því að þetta verður þungur róður og var í viðtali hjá fréttastofu Sjónvarpsins í kvöld að reyna að verja skipan Guðna Jóhannessonar í stöðuna. Það gekk svona frekar vandræðalega. Nú hafa konur í verkfræðingastétt talað gegn skipan Guðna og allar líkur á því að umræðan verði hörð þar sem aðalbitbeinið verði að iðnaðarráðherrann hafi brotið gegn jafnréttislögum. Eðlilegt er að benda á að sama dag og ráðherrann valdi Guðna skipaði hann konu sem ferðamálastjóra og vék þar sérstaklega að jafnréttishlið þess í fréttatilkynningu ráðuneytisins.

Er ekki óeðlilegt að líta svo á að hún hafi verið skipuð til að reyna að vega á móti skipan Guðna í embætti orkumálastjóra. Staða ráðherrans væri enn verri eflaust ef hann hefði skipað karlmann sem ferðamálastjóra og fengið það ofan á sig samhliða skipan í embætti orkumálastjóra. Þá væri eflaust hitinn enn meiri. En það er mikil umræða um þessa ákvörðun ráðherrans og bíða flestir spenntir eftir rökstuðningi hans, ekki síður en þeim sem Árni M. Mathiesen verður að skila inn í máli Þorsteins Davíðssonar. Er með ólíkindum að sá rökstuðningur sé ekki enn kominn.

Þetta hlýtur að teljast vandræðalegt mál fyrir Samfylkinguna, sem svo mjög hefur farið fram með jafnréttisáherslur í farteskinu og skreytt sig með þeim, verði ráðherrann dæmdur fyrir brot á jafnréttislögum t.d.

Athugasemdir

[Gestur Guðjónsson, 4.1.2008 kl. 22:19]

Hvaða, hvaða, Var utanríkisráðherra ekki að boða í morgun að hún ætlaði að hefja útrás íslensks jafnréttis? Það er kannski eðlilegt fyrst flokkur hennar ætlar ekki að nota að til heimabrúks.

[Egill M. Friðriksson, 4.1.2008 kl. 22:25]

Fyndið hvað þú gagnrýnir ráðningu iðnaðarráðherra hart en ferð auðmjúkum höndum um ráðningu fjármálaráðherra á Þorsteini Davíðssyni, þar sem matnsnefnd dæmdi hann augljóslega ekki sem hæfasta umsækjandann.

[Stefán Friðrik Stefánsson, 4.1.2008 kl. 22:32]

Gestur: Góður þessi! :)

Egillm: Ég er að kalla eftir rökstuðningi á skipan Þorsteins með þessum skrifum. Ef ráðherrann getur ekki rökstutt það betur en hann hefur gert er sú skipan ekki eðlileg. Það er mjög einfalt mál í sjálfu sér. Ætla mér þó að bíða eftir þeim rökstuðningi, enda var enginn þeirra sem sótti um þar starfandi dómari, eftir því sem ég best veit, eða hafði gegnt þeim störfum.

Þarna er um að ræða að gengið var framhjá konu sem hafði starfað sem orkumálastjóri í afleysingum og því starfsreynslu sem slík. Annars sagði ég á þeim tíma að mér þætti það ekki eðlilegt að ganga gegn matsnefndinni og það þyrfti sterk rök þar um. Ráðherrann ber ábyrgð á þeirri skipan og verður að koma með betri rök að mínu mati. Ætla að bíða eftir þeim rökstuðningi.

Það er alveg ljóst að Guðni var valinn eftir ákvörðun innan úr ráðuneytinu. Þar var engin matsnefnd. Ráðherrann réði einn og ekkert millivald. Það verður þungt fyrir ráðherrann fái hann jafnréttismál á sig vegna málsins - það blasir við öllum eftir allt tal Samfylkingarinnar um jafnréttismál.

mbk.

[Stefán Friðrik Stefánsson, 4.1.2008 kl. 23:02]

Ég skrifaði ekki mikið um Þorsteinsmálið. Hinsvegar var ég í einni færslu að gagnrýna þá bloggara sem töluðu fyrst og fremst um skipan Þorsteins út frá faðerni hans. Hinsvegar kom vel fram í skrifum mínum að mér þætti skipan hans ætla að verða umdeild og eðlilegt væri að þeir sem væru ósáttir með mál sitt lengra teldu þeir á sér brotið. Ekki ætla ég að kenna Guðna um að hann var valinn og ekki dettur mér í hug að kenna Þorsteini um það heldur að hann var valinn. Enda er ég að skrifa um tiltekinn ráðherra og gagnrýna hann. Ef Árni M. Mathiesen getur ekki varið betur skipan Þorsteins er eðlilegt að gagnrýna hann. Það er bara mjög einfalt mál.

[Stefán Friðrik Stefánsson, 4.1.2008 kl. 23:44]

Fannst umræðan óvægin í því máli. Var þó að benda á að fólk ætti að gagnrýna ráðherrann beint, ekki þann sem fékk starfið. Enda er ég að beina þessum skrifum að Össuri, rétt eins og margir gagnrýndu Árna. Það er ekki umsækjandanum að kenna að hann sé skipaður, hann ber ekki ábyrgðina. Það er fullkomlega eðlilegt að beina ólgu að ráðherranum sé ráðning manna á hans vakt óeðlileg.

[Ásdís Sigurðardóttir, 4.1.2008 kl. 23:47]

Er ekki oftast lykt af svona ráðningum, sama hver á í hlut? Mér hefur fundist það hingað til og sé ekki að breyting verði á, þó svo að VG eða B kæmust til valda með F, þetta yrði sami grauturinn.

[Kristján Eldjárn Þorgeirsson, 5.1.2008 kl. 04:55]

Sammála Ásdísi Sigurðardóttur, að möru leyti.  Það verður alltaf "skítalykt" af svona ráðningum sem ráðherrar ráða, sama í hvaða flokki þeir eru.  Þessi Guðni Jóhannesson, sem Össur réð sem orkumálastjóra er eflaust ágætur og vel til þess hæfur að gegna þessu starfi.  Þessi ráðning snýst meira um jafnréttisbaráttu heldur en hæfnismat, mínum dómi.  Jafnréttisbaráttan er farin að snúast út í öfgar, sem flestir eru orðnir leiðir á.  Það má ekki orðið hafna konu í eitthvert ákv. starf öðruvísi en það þurfi rökstuðning ráðherra fyrir því, það er sama hvort nefnd gerir það eða ráðherra.  En í Þorsteins Davíðsmálinu þá var rökstuðnigur nefndarinnar virktur að engu.  Árni Matthiesen var, að mínum dómi jafn vanhæfur og Björn Bjarnason að ákveða hver skyldi hjólta þessa stöðu.  Eflaust hefur Þorsteinn sína skoti og sína galla fyrir þetta starf, eins og hver annar umsækjandi.  En hitt er svo aftur á móti grafalvarlegt mál þegar gengið er framhjá áliti nefndar sem skipuð hefur verið af ráðherra og svo virðir ráðherra álit nefndarinnar að vettugi og ræður þann mann sem hann vildi helst fá í þetta starf, bara af því að hann er sonur föður síns.  Til hvers að vera að skipa nefnd um svona ráðningar ef álit og umsögn þeirra er virkt að engu?  Þetta á jafnt við um ráðherra Sjálfstæðisflokksins sem og ráðherra annara stjórnmálaflokka´

með kveðju!