Annað ránið á Grensásvegi á hálfum mánuði

Enn er framið rán í verslun í Reykjavík. Það eru reyndar aðeins liðnir þrettán dagar frá því að hið sama gerðist í verslun 11-11 á Grensásveginum. Svei mér þá ef ránin í verslunum á höfuðborgarsvæðinu séu ekki hætt að teljast stórfréttir, enda orðið reglulegt fréttaefni. Það hlýtur að vera mjög aðframkomið fólk sem leggur á sig verknað af þessu tagi - mikið er lagt á sig fyrir einhverja þúsundkalla. Hefur að undanförnu virst frekar vera svo að um sé að ræða unglinga sem vantar smá skotsilfur í vasann sem tekur þá ákvörðun að grípa til vopna og ráðast inn í næstu verslun til að reyna að fá pening.

Þetta er ekki góð þróun sem við sjáum verða að veruleika með hverju verslunarráninu á eftir öðru. Það hlýtur að vera erfitt fyrir ungt fólk að vinna á kvöld- eða næturvakt í svona verslunum og eiga jafnvel von á að rán verði framið í versluninni. Þetta er orðið það algengt að það veit enginn hvar þetta gerist næst. Oftar en ekki eru námsmenn sem taka þessar kvöld- og næturvaktir að sér, stundum er það eitt í búðinni með kannski einum öðrum starfsmanni. Veit reyndar dæmi þess þar sem ég þekki fólk sem tekur svona vaktir að það er jafnvel eitt á staðnum. Og gæti þess vegna upplifað svona aðstæður.

Við erum að verða eins og 300.000 manna úthverfi í bandarískri stórborg. Ráðist er á fólk án tilefnis úti á götu, verslanir rændar og eigur fólks skemmdar. Það er orðið afskaplega fátt heilagt í þessari blessuðu tilveru okkar. Það er ekki annað hægt en að spyrja sig hvar við séum eiginlega að fara út af sporinu.

Rán framið í verslun í Reykjavík

Athugasemdir

[Júlíus Valsson, 12.1.2008 kl. 00:23]

Þetta er grafalvarlegt mál. Sonur minn starfar í þessari sömu verslun með skólanum. Ekki að það skipti máli en ég hef mikla samúð með krökkunum sem starfa í þessum verslunum á kvöldin og foreldrunum sem þurfa að spyrja sig hvort óhætt sé að senda börnin af stað í vinnuna. Maður spyr sig hvar þetta endar? Það er engin einföld lausn á þessu vandamáli en ég skora á forráðamenn verslunarkeðjanna að koma í veg fyrir þetta með einhverjum hætti. Ábyrgðin gagnvart starfsfólkinu hlítur að vera þeirra. Þeir hljóta að geta veitt einhverju af sínu fé í aukið öryggi. Ekki er hægt að ætlast til þess að Lögreglan geti stöðugt vaktað allar verslanir hér í borg. Þetta er með öllu óþolandi ástand!!

[Stefán Friðrik Stefánsson, 12.1.2008 kl. 00:45]

Alveg sammála þessu Júlíus. Þetta er mjög vond þróun. Sérstaklega það að rán sé framið á sama stað innan við hálfum mánuði síðar. Vorkenni krökkunum sem vinna þarna. Ömurlegar aðstæður.

mbk.

[Dropi í hafi (IP-tala skráð) 12.1.2008 kl. 07:02]

Er þetta ekki bara sniglaslóðin af hvað löggan hefur verið dugleg að ná fólki við smygl upp á síðkastið að bera árangur.

Eða á að skrifa reikning á foreldra, kennara og skóla?! Aftur.