Góð skilaboð frá SUS um Laugavegsmálið

Það er gott að Samband ungra sjálfstæðismanna hafi sent frá sér þau skilaboð í ályktun í kvöld að Þorgerður Katrín Gunnarsdóttir, menntamálaráðherra, eigi ekki að friða húsin á Laugavegi. Það að gömul hús skuli vera átakamál í borgarstjórn er reyndar alveg með ólíkindum, enda sýnist manni að vinstrimeirihlutinn sé svo skrambi veikburða að þetta standi í honum.

Helst virðist vera deilt um það hver eigi að taka upp veskið og borga brúsann af öllu klúðrinu verði þessir hjallar friðaðir; á að demba þeim kostnaði á skattborgara á landsvísu eða bara í Reykjavík? Það virðist vera stóra spurningin. Ég segi nei takk við því að þessir hjallar verði sameign þjóðarinnar þar sem skattborgarar gera þetta upp. Vilji vinstrimeirihlutinn í Reykjavík standa vörð um það verður hann að taka það á sig.

Mér finnst orðið of seint að snúa málinu við og skil ekki hversvegna Húsafriðunarnefnd kemur með úrskurð sinn þegar að vinna við að rífa húsin er eiginlega farin af stað. Af hverju er þetta ekki unnið almennilega og faglega en ekki svona seint og um síðir? R-listinn samþykkti að rífa hjallana, það var staðfest af meirihluta Sjálfstæðisflokks og Framsóknarflokks og vinna við niðurrif var allt að því komin á fullt í valdatíð REI-meirihlutans málefnalausa.

Annars sýnist manni þessi meirihluti vinstrimanna vera aðeins valdapotsbandalag, þar hefur ekki verið tekið á neinum málefnum nema þeim hver eigi að fylla upp í hvaða stól. Aumari meirihluti hefur ekki sést í pólitík lengi - fari svo að hann geispi golunni á þessum hjöllum verður háðung þess fólks mikil.

SUS: Laugavegshúsin verði ekki friðuð

Athugasemdir

[Ásdís Sigurðardóttir, 12.1.2008 kl. 00:23]

Tek heilshugar undir þetta með þér, hef verið að blogga um þetta. Eigðu góða helgi og kveðja norður.

[Stefán Friðrik Stefánsson, 12.1.2008 kl. 00:37]

Takk fyrir kveðjuna Ásdís mín. Takk sömuleiðis, eigðu góða helgi og hafið það gott.

mbk.

[Einar Bragi Bragason., 12.1.2008 kl. 02:28]

halló mér finnst rétt að fara varlega þegar að gömlum húsum er komið takk fyrir........hvernig væri nú minn bær eða jú þinn ef að öll þau hús sem menn hafa dottið í hug að fara rífa hefðu verið rifin.....hvað með torfuna í Rvík um árið(vísu ansi langt) sem er einn fallegasti staðurinn í borginni í dag.