Sviplegt fráfall ungstjörnu - sögusagnir um Ledger

Það hefur verið mjög óraunverulegt að fylgjast með fréttunum í gærkvöldi og í morgun um andlát Heath Ledger. Það er alltaf sviplegt og sorglegt þegar að einstaklingur í blóma lífsins deyr svo sviplega og eftir séu aðeins spurningar, algjörlega án augljósra svara. Sögusagnirnar og kjaftasögurnar eru það versta í slíkri stöðu og þær grassera núna, vægast sagt. Fjölmiðlarnir eru misjafnlega kurteisir í svona erfiðum aðstæðum, sumir hafa verið frekar ónærgætnir sýnist mér.

Finn mjög til með foreldrum, systkinum, dóttur og fyrrum konu Heath Ledger. Held að allir sem hafa tilfinningataug hugsi til þeirra sem upplifa missi og það svo opinberlega, án svigrúms til að syrgja. Sá í morgun stuttan blaðamannafund þar sem foreldrarnir og systirin komu fram fyrir utan heimili sitt, með sólgleraugu og þerrandi tárin, og faðirinn las upp yfirlýsingu. Styrkur þeirra var alveg aðdáunarlega mikill. Það hefur reyndar komið fram núna að þau heyrðu fyrst af dauða hans í útvarpsfréttum í Ástralíu. Þau fengu ekkert tækifæri til að heyra fregnirnar áður eða melta þær áður en fjölmiðlar birtu fréttina örstuttu eftir að hann hafði verið úrskurðaður látinn.

Mér fannst það mjög ónærgætið að fjölmiðlar skyldu beina til þeirra spurningum. Þeim svöruðu þau auðvitað ekki og héldu beint inn að þessu loknu. En þarna skiptir forsíðuuppslátturinn einn máli. Það er vissulega svo að þetta er stórfrétt og hún fær þann stimpil og ekki einu sinni nánasta fjölskylda fær að heyra fregnina áður en fjölmiðlar opinbera hana og það aðeins andartökum eftir látið. En svona er nútíminn í dag bara og erfitt að breyta gangi fjölmiðlaaldarinnar sem við erum á. Þegar að lík Ledgers var flutt burt frá fjölbýlishúsinu í Soho-hverfinu voru þar allir fjölmiðlar og andrúmsloftið minnti á óraunverulegt atriði úr kvikmynd, þar sem allir börðust um fyrstu fréttina.

Það er mörgum spurningum ósvarað. Vonandi fæst heilsteypt mynd fram á dauða Heath Ledger með rannsókn á málinu og krufningunni. Það er það sorglegasta ef ekkert verður raunar öruggt og ekki verður fengið í ljós nákvæmlega hvað gerðist í þessum mikla harmleik. Það er langt síðan að ég hef séð önnur eins sorgarviðbrögð vegna fráfalls stjörnu, eins og er hvað varðar Heath. Hans er minnst á flestöllum vefsíðum um allan heim og það eru mjög margir undrandi, eðlilega, enda var hann svo lifandi og hress í hugum fólks.

Vinir hans í leikarastéttinni eru auðvitað í rusli. Fannst ein sterkasta kveðjan vera frá Ástralanum Mel Gibson - hann veitti Heath tækifærið mikla í The Patriot, þar sem Heath varð alvöru dramatískur leikari og byggði að mínu mati mest og best undir styrk hans sem leikara og kenndi honum svo mikið. Mel var stóra fyrirmynd Heath og þeir voru mjög nánir. Það eru sannar tilfinningar í hverju orði Mel - leikkonurnar frá Eyjaálfu eru líka heilsteyptar í sínum orðum. Beðið er nú yfirlýsingar Jake Gyllenhaal, náins vinar Ledger.

Við svona aðstæður verður andlát auðvitað óraunverulegt og vafamálin eru hið sorglegasta af öllu hinu sorglega. Vonandi fæst spurningunum áleitnu svarað.

Segja Ledger hafa látist af slysförum

Athugasemdir

[bumba (IP-tala skráð) 23.1.2008 kl. 12:07]

Sæll Stefán.

ÞAkka þér fyrir ágæta pistla um þennan nýlátna unga leikara frá Ástralíu. Ljótt að heyra hversu iðin Gróa á Leiti með útbreiðslu sögusagna.

En öll eru vítin til að varast þau frændi, og ekki eru sjálfsskaparvítin bezt svo sem nema að síður væri. Hans stjarna mun þó lengi skína. Með beztu kveðjum.

[Brjánn Guðjónsson, 23.1.2008 kl. 12:22]

sorry, but I couldn't care less

[Helga Dís (IP-tala skráð) 23.1.2008 kl. 18:12]

Thor og Brjánn...

 Það er hægt að bera virðingu fyrir fólki án þess að missa sig í einhvern átrúnað.  Fæstir þeir sem ég hef lesið bloggið hjá (ef einhver) hefur verið að missa sig í sorg.  Fólk tekur þessu misjafnlega, en eins og Stefán sagði, þá bjóst maður ekki viss þessu því hann virtist vera svo lifandi.

 Hann og aðrir hafa ekki sagst þekkja hann eða vita afhverju hann gerði þetta eða afhverju þetta kom fyrir.

 Og aftur: afhverju að commenta á blogg hjá fólki bara til þess að vera leiðinlegur?

[Stefán Friðrik Stefánsson, 24.1.2008 kl. 02:29]

Takk fyrir kommentin.

Get ekki sagt að ég hafi talið Heath Ledger mesta núlifandi einstakling heimsins. En það er sárt að sjá hæfileikaríkt ungt fólk deyja, án sýnilegrar ástæðu og án þess að nokkuð sé ljóst um dauðsfallið. Þetta er auðvitað bara harmleikur. Eðlilegt að hafa mannlegar taugar og finnast það sorglegt. Enda voru margir mjög undrandi, enda var þetta maður sem átti öll tækifæri og var að ná hátindi ferilsins, ein helsta stjarna sinnar kynslóðar. Það eru allir sem einn sammála um það sem hafa fjallað um málið á erlendum fréttamiðlum.

Alveg sammála þér sérstaklega Páll. Gott komment hjá þér.

mbk.