Takmörk græðginnar - spilling á björtum degi

Ég verð að vera alveg heiðarlegur og segja það hreint út að mér finnst það jafnast á við spillingu á björtum degi að heyra af þeim peningafúlgum sem greiddar voru til Bjarna Ármannssonar og Lárusar Welding á síðasta ári. Þvílík óendanleg græðgi og siðferðisleg spilling!

Það er gott að maður á ekki viðskipti við Glitni, ekki það að ég telji að þessir bankar séu allir meira og minna eins. Eini stjórnmálamaðurinn sem hefur reyndar haft bein í nefinu til að mótmæla verklagi af þessu tagi var þegar að Davíð Oddsson tók út peninga sína hjá Kaupþingi-Búnaðarbanka í kastljósi fjölmiðlanna fyrir fimm árum eftir að fregnir bárust af veglegum kaupréttarsamningum Hreiðars Más Sigurðarsonar og Sigurðar Einarssonar.

Mér finnst þetta bera vitni siðferðislegri spillingu og ótrúlegri græðgi þeirra sem að koma. Það er svona helst að manni detti í hug græðgisorðræða hins vægðarlausa fjármálabraskara Gordons Gekko á Wall Street í margfrægri og samnefndri kvikmynd Olivers Stone. Myndin fókuserar meistaralega á græðgina í bissness-heiminum og hversu vægðarlaus hann er innst við kjarnann. Michael Douglas var yndislega illkvittinn og nasty í rullunni - eftir því sem ég horfi oftar á myndina dettur mér Bjarni Ármannsson í hug. Endilega sjáið þessa mynd:

The point is, ladies and gentlemen, that: Greed, for lack of a better word, is good. Greed is right; greed works. Greed clarifies, cuts through, and captures the essence of the evolutionary spirit. Greed, in all of its forms, greed for life, for money, for love, knowledge — has marked the upward surge of mankind and greed, you mark my words — will save not only Teldar Paper but that other malfunctioning corporation called the USA.


Held annars að stjórnendur þessa annars ágæta banka ættu að hafa í heiðri það sem sr. Hallgrímur Pétursson yrkir í Passíusálmum sínum um iðrun Júdasar Ískaríot.

Undirrót allra lasta
ágirndin kölluð er.
Frómleika frá sér kasta
fjárplógsmenn ágjarnir
sem freklega elska féð,
auði með okri safna,
andlegri blessun hafna
en setja sál í veð.

Forstjóralaun hjá Glitni 266 milljónir

Athugasemdir

[Ásdís Sigurðardóttir, 1.2.2008 kl. 00:06]

Maður gæti alveg þegið svona bara nokkur prósent af þessu, fer ekki fram á mikið.  Snjóbolti norður í land

[Guðmundur Már Ragnarsson (IP-tala skráð) 1.2.2008 kl. 00:08]

Davíð tók ekki út krónu í þeim banka með kastljós fjölmiðla yfir sér,þar var ekki nokkur fjölmiðlamaður nálægt.  Þó fjölmiðlar hafi ítrekað reynt að halda öðru fram.  Rétt skal vera rétt og til þess les maður ekki íslenska fjölmiðla,það er klárt. 

[Stefán Friðrik Stefánsson, 1.2.2008 kl. 00:19]

Takk fyrir kveðjuna Ásdís mín.

Það var mikill fjölmiðlaviðburður þegar að Davíð tók út peninginn sinn úr bankanum. Því verður ekki neitað. Enginn fjölmiðill var þó með honum á staðnum en þetta var eitt stærsta augnablikið á síðustu mánuðum ársins. Sumir töluðu mikið um kaupréttarsamningana, en Davíð þorði og hann tók út sína peninga. Það var mikið augnablik, því fær enginn neitað. Sterk skilaboð það.

mbk.

[Tiger, 1.2.2008 kl. 01:45]

Ég er algerlega sammála því að siðblindan og græðgin eru óheyranlega mikil í stórum stólum, á toppnum þar sem fáir útvaldir eingöngu fá að dvelja.

Kannski maður megi bara þakka fyrir að þessar systur, siðblinda og græðgi, skuli ekki vera daglegur gestur inni á þröskuldi hjá manni sjálfum - en það er næsta víst að ekki er víst að enn önnur systir þeirra tveggja - sem áður voru nefndar - fylgi blóðböndunum - fylgi peningaflæðinu þar sem það er mest - sú systir er auðvitað sjálf hamingjan.

[Margrét Birna Auðunsdóttir, 1.2.2008 kl. 02:02]

Davíð Oddsson getur nú varla talist gott dæmi í þessu samhengi, hvort sem hann tók út sína peninga eða þetta var bara sirkus. Eða hvað er hægt að segja um mann sem er í fullri vinnu sem seðlabankastjóri en er samt kominn á eftirlaun, samkvæmt lögum sem hann þröngvaði sjálfur í gegnum þingið til hagsbóta fyrir sjálfan sig og kannski nánustu vini? Flokkar þú það ekki undir græðgi?

[Einar Baldvin Árnason (IP-tala skráð) 1.2.2008 kl. 02:17]

Það er í fjandanum ekkert að því að þeir hafi þetta í laun. Hvernig dirfist þú að kalla þetta spillingu?

[Heimir Lárusson Fjeldsted, 1.2.2008 kl. 05:37]

Davíð þorir.

[Þórir Kjartansson, 1.2.2008 kl. 08:12]

Algjörlega sammála Stefán. Það er ótrúlegt að þessir kumpánar og margir aðrir þeirra líkar skuli geta látið sjá sig á almannafæri.

[Ólafur Björnsson, 1.2.2008 kl. 09:00]

Davíð - Þorir þegar aðrir græða

Ég held að það sé nú enginn ástæða til að gera Davíð að einhverjum píslarvætti þegar kemur að þessum málum. 

[Margrét Birna Auðunsdóttir, 1.2.2008 kl. 09:01]

Davíð þorir hverju?

[Gísli Sigurðsson, 1.2.2008 kl. 15:00]

Ég tek undir það að mér finnst dæmið með Davíð ekki alveg það besta. Hann með aðstoð sinna samstarfsmanna er búinn að koma ár sinni svo vel fyrir borð að hann er jafnvel ef ekki betur settur en þessir gullkálfar, betur að því leiti að hans áhætta er engin en þeir eiga alltaf á hættu að missa vinnuna. Um það leiti sem hann tók við núverandi starfi minnir mig að launin hafi hækkað allverulega fyrir það starf.

Þar að auki eins og Thor segir, þetta eru menn að semja um kaup sín og kjör við einkafyrirtæki á frjálsum markaði, nb ekki tekið úr ríkissjóði eins og t.d. laun seðlabankastjóra. 

[Þorsteinn Egilson, 2.2.2008 kl. 07:47]

Ekki í viðskiptum við Glitni, við hvern þá? Kaupþing kannski?? Ekki soga þeir nú minna til sín topparnir þar á bæ.

Sé ekkert karlmennskuþor (sbr. umræðu um DO) í því að taka sína eigin peninga út úr einhverjum banka -helzta vandamálið er kannski að eiga einhversstaðar frjálsa krónu.
Hitt er vízt, hvort sem það er hjá Glitni, Kaupþingi eða öðrum að það sést hvert reið okkar á skuldaklafanum stefnir: Í sérgróða stjórnendanna!

Kveðja,