Hillary og Obama semja frið í baráttunni

Það var greinilegt á kappræðum Barack Obama og Hillary Rodham Clinton í Kodak-höllinni, heimili Óskarsverðlaunanna, í nótt, að þau hafa tónað niður baráttu sína gegn hvoru öðru, eftir harkalegar persónulegar árásir síðustu vikurnar, en reyna þess í stað að horfa fram fyrir flokksslaginn. Þau gengu mjög langt gegn hvoru öðru í kappræðunum í Suður-Karólínu fyrir tíu dögum þar sem þau létu allt flakka og létu eins og John Edwards væri ósýnilegur.

Nú þegar að Edwards er endanlega horfinn á braut, þó flestir geti verið sammála því að hann hafi verið hreinn skuggi í baráttunni eftir töpin í Iowa og Suður-Karólínu, að þá er þetta endanlega orðið hið sögulega einvígi sem allir höfðu spáð í gegnum allt síðasta ár; einvígi fyrstu konunnar og fyrsta blökkumannsins með möguleika á Hvíta húsinu. Sumir telja þetta aðalslaginn í baráttunni um forsetaembættið. Það er óvarlegt að telja það, enda er engu að treysta með John McCain sem keppinaut demókrata. Það stefnir allt í að þetta verði hörð barátta um miðjufylgið allt fram að kjördegi eftir níu mánuði.

Persónulegar árásir Hillary og Obama gengu svo langt fyrir tíu dögum, með kappræðunum og þrumandi árásum á milli Obama og Clintons forseta, að efast var um hvort að þessi slagur gæti haldist á siðsamlegum nótum. Það vakti mikla athygli þegar að Hillary og Obama heilsuðust ekki einu sinni í þingsalnum í Washington fyrr í vikunni er Bush Bandaríkjaforseti flutti síðustu stefnuræðu sína og gaf þeim sögusögnum byr undir báða vængi að barátta þeirra væri orðin svo heiftúðug að hún gæti skemmt fyrir flokknum í forsetakosningunum í nóvember. Það þeirra sem tapaði myndi ekki leggja hinu lið í gegnum aðalslaginn mestallt árið vegna þess að ólgan væri svo mikil.

Það var engu líkara en að öll átök síðustu tveggja vikna og bakstungurnar á milli frambjóðendanna og maka þeirra hefðu ekki átt sér stað enda brostu og hlógu Hillary og Obama í takt í nótt. Stemmningin var kammó á yfirborðinu en undir niðri kraumaði þó. Þessi slagur er fjarri því búinn að mati flestra. Sumir ganga svo langt að tala um talningu upp á hvern þingfulltrúa og því slag fram á vorið. Tel að líkurnar á því séu þó að minnka. Nú þegar að ljóst er orðið að John McCain verður forsetaframbjóðandi repúblikana og enginn keppinauta hans geti í raun stöðvað hann er demókrötum það vel ljóst að þeir verða að klára sín mál fljótlega.

Er sammála mati Bob Schneider eftir kappræðurnar um að staðan er þannig að útkoman úr ofur-þriðjudegi muni skipta sköpum um það hver verði frambjóðandi demókrata. Samkvæmt könnunum er Hillary á sigurbraut og virðist ekki hafa skaðast af stuðningi Ted Kennedy og Caroline Kennedy Schlossberg við Obama. Auk þess virðist sem að Obama hafi ekki tekist í kappræðunum siðsamlegu í gær að segja af hverju ætti að kjósa hann frekar en Hillary, sem hefur þegar á hólminn kemur mun meiri reynslu en hann.

Staðan er heiðarlega séð með þeim hætti að Hillary leiðir slaginn og hefur sterkari stöðu en Obama er að reyna að ná forystunni. Honum tókst það ekki í þessum kappræðum og hefur takmarkaðan tíma til þess. Stemmningin er sú að demókratar verða að finna keppinaut gegn McCain fljótlega. Það er orðið ljóst hvernig fer í forkosningunum þar og því mun pressan verða á það nú að færa keppnina á næsta stig, alvöru baráttu um Hvíta húsið.

Settu upp silkihanskana

Athugasemdir

[Paul Nikolov, 1.2.2008 kl. 09:53]

Ef Obama sigrar á 5. febrúar þá væri það erfitt að segja hvort hann eða McCain ná í Hvíta húsinu. En ef Clinton sigrar á 5. febrúar er McCain búinn að vera.

[Stefán Friðrik Stefánsson, 1.2.2008 kl. 10:03]

McCain verður frambjóðandi repúblikana. Hann er með Kaliforníu, New York og New Jersey í vasanum eftir að hafa fengið stuðning Giuliani og Schwarzenegger. Það má vera að einhver nái stuðningi í suðrinu en þá verður það ekki til að stöðva hann. Vandi Romney er að hann er enn að takast á við Huckabee. Tel að McCain verði krýndur frambjóðandi repúblikana á ofur-þriðjudegi. Spurningin er um demókrata. Öllum líkar vel við bæði Hillary og Obama. En það verður að velja. Held að þeir verði að klára það val innan nokkurra vikna, enda mun McCain geta slappað af á meðan. Hann fer nú bráðlega að hugsa fram til nóvember og hver verði varaforsetaefnið á meðan að hinn slagurinn stendur. Demókratar vita æ betur, og það sést á þessum kappræðum, að það þarf að færa slaginn á næsta stig og það mjög fljótlega.

[Fannar frá Rifi, 1.2.2008 kl. 12:48]

Hillary og Obama eru greinilega farinn að óttast McCain. Ég spái McCain sigri.