Demókratar vilja draumateymi Hillary og Obama

Það fór ekki á milli mála þegar að Barack Obama og Hillary Rodham Clinton mættust í kappræðum í stjörnum prýddri Kodak-höllinni í englaborg kvikmyndanna í vikunni að flokksmenn vilja að þau fari fram saman í forsetakosningunum í nóvember. Það þeirra sem tapi fylki liði með hinu. Það er greinilegt að þau eru bæði farin að horfa fram fyrir flokksslaginn og hafa tónað sig niður, enda stefnir í spennandi baráttu við John McCain.

Það er eðlileg komin upp pressa meðal demókrata að hinum harða slag þeirra ljúki, en þau hafa hjólað hvort í annað með svæsnum hætti síðustu vikur, og flokkurinn hafi frambjóðandann til mjög fljótlega. Þetta verði ekki harðskeytt barátta um hvern þingfulltrúa fram á vorið. Eftir ofur-þriðjudaginn mun engin barátta af alvöru vera meðal repúblikana - McCain búinn að ná útnefningunni - og því skiljanlegt að demókratar vilji hefja mikilvægasta stig kosningabaráttunnar, að endurheimta Hvíta húsið eftir átta ára forsetatíð repúblikanans George W. Bush. Það er mikilvægara en allt annað í huga þeirra, eins og sést af tali allra í flokknum.

Margir demókratar líta auðvitað á Hillary og Obama sem draumateymi í forsetakosningunum eftir níu mánuði. Hún er jú fyrsta konan og hann fyrsti blökkumaðurinn sem eiga raunhæfa möguleika á Hvíta húsinu. Sameiginlegt framboð þeirra yrði því sögulegt og mjög sterkt. Sjálfur hefur Obama þó fram til þessa neitað alfarið að taka boði um að verða varaforsetaefni Hillary og ég held að enginn hafi lagt í að spyrja Hillary að því hvort hún tæki að sér aukahlutverk með Obama í frontinum. Hún hefur lagt það mikið í framboðið að enginn hefur séð hana fyrir sér í aukahlutverki. Tap myndi þýða endalok ferils hennar, að flestra mati.

En kannski er það að breytast og samhugur flokksmanna að verða meiri. Það þeirra sem taki ofur-þriðjudag hafi það sterkan byr að menn sættist á að það verði frambjóðandinn. Það er greinilegt á nýjustu könnunum sem sýna John McCain með sterkari stöðu en þau bæði að þau verða að fylkja liði. Eftir hörð átök Clinton og Obama-hjónanna yrði það allavega stórmerkilegt framboð og eiginlega áhugaverðara en allt annað að sjá Clinton forseta og Obama slíðra sverðin en einum og hvöss orð hafa fallið til að þau gleymist á næstu mánuðum.

Hvernig svo sem fer virðist Obama hafa veðjað á rétt. Hann hefur engu að tapa með framboðinu og mun aðeins styrkja sig hvernig sem fer, ólíkt Hillary. Obama er ekki í ólíkri stöðu nú og John Edwards við síðustu forsetakosningar, sem sá er tekur áhættuna vitandi að hann tapar engu hvernig sem fer. Hann mun aðeins eflast og það verulega - stimplar sig inn í forystusveit flokksins með einum hætti eða öðrum. Bill og Hillary Rodham Clinton lögðu grunn að þessu framboði með forsetatíðinni 1993-2001 og hafa lagt hjarta og sál í vinnuna. Tap er ekki til í orðabók þeirra.

Það stefnir í spennandi forsetakosningar. Einn óvinsælasti forseti bandarískrar stjórnmálasögu heldur brátt inn í pólitíska sólsetrið heima í Texas og stefnir í miklar breytingar í Washington hvernig sem fer í baráttunni um Hvíta húsið. Repúblikanar gætu vel stokkað sig hressilega upp með brotthvarfi bæði Bush og Cheney af pólitíska sviðinu.

Hverjir svo sem mætast að lokum á örlagadeginum 4. nóvember má fullyrða að næsti forseti verði harla ólíkur George W. Bush. McCain er enginn Bush og Obama og Clinton boða allt annað en óbreytt ástand. Saman yrðu þau hiklaust sterkari en ein síns liðs með öðrum frambjóðanda. En geta þau sætt sig við að vera memm eftir öll stóru orðin ?

Munu Clinton og Obama bjóða fram saman?

Athugasemdir

[Gísli Foster Hjartarson, 2.2.2008 kl. 21:51]

Held að það sé nú bara vel viðeigandi að næsti forseti USA verði ólíkur Gogga Bush - alveg kominn tími á ferska vinda þarna fyrir vestan - hugsa að megnið af heimsbyggðpinni andi léttar þegar George og frú byrja að pakka niður, þ.e.a.s. ef að þau eru ekki þegar byrjuð að pakka niður smádóti. - Þó ég hafi nú aldrei talið mig einlægan áhugamann umpólitík þá hlakka ég til að sjá hvað verður.

[Ólafur Als, 3.2.2008 kl. 02:41]

Vera má að Demókratar vilji Clinton og Obama saman í teymi en ekki er ég viss um að t.d. Obama hafi mikinn áhuga á samferð með frúnni. Á fundinum var hún helst til brosmild fannst mér - en mig grunar að Hillary sé manngerð sem muni seint sjá á eftir orðum sínum eða gjörðum. Fjölmiðlar vestra eignuðu nefnilega Clinton fólkinu, og þá sérstaklega fyrrum forsetanum, óvönduð vinnubrögð í aðdraganda forkosninganna í S-Karolínu, en ekki Obama. Svo fór og að frúin tapaði stórt. Nú skilst manni að karlinn sé þagnaður þó hann hafi nú alla jafna gaman af sviðsljósinu blessaður.

[Óðinn Þórisson, 3.2.2008 kl. 10:53]

Það verður gríðarlega erfitt að taka við af G.W Bush og ég held að McCain sé rétti maðurinn til að gera það.
Þetta verður gríðarlega jafnt hjá demókrötum, ég held að h.clinton vinni þetta sem ætti að gera leiðina fyrir McCain í hvíta húsið auðveldari.