Ósmekkleg ummæli Þorbergs um þjálfaraefnin

Mér fannst Þorbergur Aðalsteinsson fara yfir strikið í ummælum sínum um Aron Kristjánsson, Dag Sigurðsson og Geir Sveinsson á Sýn í gærkvöldi. Mér finnst þau ekki sæma fyrrum landsliðsþjálfara um mjög góða þjálfara sem voru sterk efni í landsliðsþjálfara nú og hafa verið með betri handboltamönnum landsins á síðustu árum, en voru einfaldlega fastir í öðrum verkefnum og ákváðu þess vegna að sinna þeim.

Það er vissulega slæmt fyrir HSÍ að ekki fáist íslenskur þjálfari til að þjálfa liðið og er nokkur vandi. Það virðist vera sem að starfið sé ekki nógu traust og öflugt til að áhættan á það sé tekin. Mér finnst það ekki óeðlilegt að sterk þjálfaraefni gefi sér frest til að taka ákvörðun og vega og meta kostina í stöðunni. Það er ekki smekklegt að tala um viðkomandi menn með þessum hætti og Þorbergur væri maður að meiri að draga þessi ummæli til baka.

Það vakti mesta athygli mína að Þorbergur talaði bara svona um þessa tvo menn en notaði ekki sömu ummæli um Magnus Andersson, sem gaf sér frest til að vega og meta stöðuna og gaf síðan afsvar. Hvað með það, það er eðlilegt að ólga sé vegna þessara hörðu ummæla sem voru langt yfir allt eðlilegt og ósmekkleg árás á þá hæfu þjálfara sem komu til greina en ákváðu að þiggja ekki starfið.

Það er gott að formaður HSÍ hefur tekið af skarið um að Þorbergur var einn í orðavali sínum og stendur einn í þeirri baráttu. Það er samt umhugsunarefni að þrír hæfir handboltamenn afþakki starfið getur varla verið vegna þess að enginn þeirra þori heldur vegna þess að umgjörðin um starfið er ekki vænleg. Lykilmenn í HSÍ ættu frekar að hugsa um ástæður þess.

Guðmundur harmar ummæli Þorbergs

Athugasemdir

[Ásdís Sigurðardóttir, 22.2.2008 kl. 22:50]

Er ekki Þorbergur bara að segja sannleikann? stundum er það bannað. Mér allavega fannst nokkuð til í þessu hjá Þorbergi.  Það er alltaf hægt að setja kröfur sem ekki er nokkur leið að ganga að og þá geta menn skotið sér undan á þeim forsendum.  Það hefur gengið illa undanfarið með landsliðið og ég held persónulega að þessir sem til greina hafa komið séu ekki tilbúnir að fórna sér í þetta og fá svo bara skammir fyrir, en þetta er bara mín skoðun.