Umferðarslys á Reykjanesbraut

Það er dapurlegt að heyra af enn einu alvarlegu umferðarslysinu, nú á Reykjanesbraut. Enn er ekki lokið framkvæmdum við brautina og er það óskiljanlegt að ekki hafi tekist að klára verkið enn og eftir standi lausir endar í framkvæmdum. Þrátt fyrir það er orðið nokkuð langt síðan að fréttir hafa borist af slysi á þeirri miklu hraðbraut, ef undan er aðeins skilið eitt slys undir lok síðasta árs.

Eftir að hluti Reykjanesbrautar var tvöfaldaður hefur slysatíðni minnkað verulega og ég held að það sé rétt munað hjá mér að þar hafi ekki verið banaslys frá því að tvöfölduð braut var vígð. Það var mikil samgöngubót að tvöfalda Reykjanesbrautina og vonandi verður því verki lokið sem fyrst. Þar dugar ekki hik.

Tvöföldun Reykjanesbrautar hefur sýnt vel hversu mikilvægt verk það var og hversu mikilvægt er að stefna að tvöföldun stofnleiðanna út frá Reykjavík.

Harður árekstur á Reykjanesbraut

Athugasemdir

[Taxi Driver, 27.2.2008 kl. 22:23]

Lausir endar?? Greinilegt að þú býrð ekki útá Reykjanesi og þarft að keyra þetta daglega... Ekkert óskiljanlegt við að þetta sé ekki klárað, batteríið sem á að sjá um þetta er duglaust eins og alþjóð veit, sbr samgönguráðherra og Vegagerð. Rétt er það hins vegar að ekki hefur orðið banaslys á brautinni síðan tvöfaldað var en hitt er alveg á hreinu að verði framkvæmdin ekki kláruð og það í einum grænum hvelli kemur fólk til með að byrja að deyja aftur hérna á brautinni.