Rússnesk kosning Medvedevs - Pútín ríkir áfram

Það kemur engum að óvörum að Dmitri Medvedev, handvalinn eftirmaður Vladimírs Pútíns, hafi verið kjörinn forseti Rússlands. Það sýnir bara traust tök Pútíns á rússneskum stjórnmálum, enda er vel ljóst að hann ætlar sér að vera þar áfram við völd og verða forsætisráðherra að nýju, en hann gegndi því embætti í nokkra mánuði árið 1999, áður en Borís Jeltsín sagði af sér og Pútín varð starfandi forseti í nokkra mánuði áður en hann var kjörinn formlega í mars 2000.

Þeir eru fáir sem hafa unnið betur við að efla vald sitt, rækta liðshjörð sína betur og stýrt heilu ríki eins og taflborðinu heima hjá sér; allt undir yfirskini þess að það sé lýðræðislegt, en Vladimir Pútín. Að mínu mati hefur Rússland Pútíns verið að þróast út í hreint einræðisríki; Pútín líkist Bréznev gamla æ meir með degi hverjum. Hann er dómínerandi leiðtogi og tök hans á fjölmiðlum og pólitískum ákvörðunum jaðra við ríki eins manns. Það er því eftir öðru að hann handvelji eftirmanninn og haldi því opnu að snúa aftur í forsetakosningunum 2012.

Með því að velja eftirmann sinn prívat og persónulega og útnefnt sjálfan sig í leiðinni, með góðvild handvalda forsetaefnisins að sjálfsögðu, sem forsætisráðherra frá og með vorinu hefur Pútín sýnt vel vald sitt og yfirburði. Það var áhugavert að kynnast sögunni á bakvið veldið enn betur í tveim sjónvarpsþáttum fyrir nokkrum vikum og sjá í hvaða átt stefnir. Þessi kapall nú sýnir umfram allt pólitísk klókindi bragðarefsins Pútíns og hversu öflugur risi hann er.

Það verður ekki sagt annað en að Medvedev verði eins og strengjabrúða undir stjórn Pútíns og viðhaldi veldi hans, enda er Pútín ekki á förum. Í sögulegu ljósi er sérstaða Medvedevs einkum tvíþætt. Hann verður yngsti þjóðhöfðingi Rússlands frá því að síðasti keisari Rússlands, Nikulás 2., tók við völdum 26 ára gamall árið 1894 og Medvedev verður fyrsti leiðtogi Rússlands með bakgrunn í einkageiranum, enda er hann stjórnarformaður í hinum ríkisrekna orkurisa Gazprom og hefur víðtækar tengingar víða ennfremur.

Medvedev háði ekki mjög litríka kosningabaráttu. Hann var alla tíð talinn öruggur um kjör í forsetaembættið. Hann tók ekki þátt í kappræðum við aðra forsetaframbjóðendur, háði litla sem enga virka kosningabaráttu en fór með Pútín um Rússland til að heimsækja fyrirtæki og stofnanir og sýndi með því nærveru sína í daufustu kosningabaráttu um eitt valdamesta embætti heims, á sama tíma og forsetaframbjóðendur í Bandaríkjunum eru að eyða fúlgu fjár, tíma og fyrirhöfn í baráttu um Hvíta húsið.

Pútín hefur á átta árum markað sig sem hinn afgerandi drottnara veldis síns. Staðan í Rússlandi er mikið áhyggjuefni. Mér finnst þar horfa ansi margt til fortíðar og vert að hugsa um framtíðina sem blasir við. Pútín ætlar sér ekki að hverfa út í sólarlagið eins og George W. Bush, sem brátt lætur ennfremur af embætti, eftir jafnlangan tíma á valdastóli.

Pútín ætlar sér að stjórna atburðarásinni eins og kvikmyndaleikstjóri úr fjarska, halda um alla spotta og ráða örlögum landsins, jafnt sem stuðningsmannahjörðar sinnar. Hann ætlar sér að vera meginspilari áfram á sviðinu. Það verður áhugavert að sjá hversu mikil strengjabrúða í höndum skapara síns nýr forseti muni vera.

Medvedev kjörinn forseti

Athugasemdir

[Hjörtur Hjartarson (IP-tala skráð) 2.3.2008 kl. 21:00]

Mjög áhugavert

Ég var eitthvað búin að heyra að Pútín hefði breytt forsætisráðherrastöðunni til að henta honum betur... Veistu eitthvað um það? 

[Gunnlaugur Ingvarsson (IP-tala skráð) 2.3.2008 kl. 23:05]

Takk Stefán, mjög góð rýni hjá þér.

Já þetta er Sko alveg rosalegt.
Gamli KGB klíkuforingin endurfæddur sinna lífdaga.

En þetta er svona ekki ósvipað því eins og þegar ég var þarna stuttu eftir hrunið á Gamla Sovét 1992 og 1993 þá elskuðu allir almennir borgarar Gamla Stalín, Afhverju, jú af tví að hann SKO Stjórnaði. Það sama á nú við um Mr. Pútín HAnn stjórnar og hann var Sko alinn upp hjá af Gömlu KOMMUNUM ! Kann ekkert annað. ÞEtta er mesti ógeður allra landa. Lýðræðið í Rússlandi. Við eigum að mótmæla þessu ! ÞEtta er það versta af öllu slæmu ! 














 

[Stefán Friðrik Stefánsson, 2.3.2008 kl. 23:50]

Takk fyrir kommentin.

Gunnlaugur: Þakka góð orð og fínar pælingar.

LF: Það er svosem margt betra en Zyuganov og Zhirinovski en samt er ekki hægt annað en finnast þessar kosningar hreinn skrípaleikur þar sem einn leiðtogi handvelur eftirmann sinn og spilar með stjórnmálin eins og taflborðið heima hjá sér.

Hjörtur: Forsætisráðherraembættið er auðvitað valdaminna en það er alveg ljóst að Pútín sem forsætisráðherra verður aðalmaðurinn. Hann er þungamiðja valdamaskínunnar sem ræður för og eðlilega verður embættið valdameira við það eitt að hann taki við því.

mbk.

[Óskar Helgi Helgason (IP-tala skráð) 3.3.2008 kl. 00:24]

Heill og sæll, Stefán Friðrik og aðrir skrifarar !

Piltar ! Hafið ekki áhyggjur af Rússum; þeir spjara sig, með Medvedev, ekki síður en Putín.

Það er ekki nema von, að menn reki upp ramakvein, hér úti á Íslandi, mitt í öllu ''lýðræðis'' standinu. Stjórnleysi krata og Sjálfstæðismanna vex, fremur en hitt, og úrræðaleysið virðist algert.

Mættum vera stoltir af, að eiga eins sterka menn, sem Rússar hafa, á sínum tróni !

Með beztu kveðjum, sem jafnan / Óskar Helgi Helgason

[Guðmundur Auðunsson, 3.3.2008 kl. 13:30]

Það er athyglisvert að þú nefnir Bréznév því að Rússar tala almennt um stjórnartíð hans sem bestu tíma rússnesku þjóðarinnar. Það er nú samt heldur djúpt tekið í árinni með að kalla Rússland einsræðisríki, þó vissulega sé ég sjálfur enginn aðdáandi Pútin. Minnir helst á Mexíkó undir stjórn PRI í 60 ár eða svo. Kosningar reglulega, stjórnarandstaða umborin upp að ákveðnu marki en aldrei neinn vafi hvernig kosningarnar færu.