Leit að vísbendingum - Kompás með pólskum texta

Enn er mörgum spurningum ósvarað í hinu sorglega máli sem tengist láti fjögurra ára drengs í Keflavík undir lok síðasta árs. Leitað er að vísbendingum sem geti varpað betur ljósi á málið. Það er vel til fundið hjá fréttaskýringaþættinum Kompás að hafa pólskan texta í þættinum um málið eftir helgina. Með því er auðvitað reynt að ná til pólsks fólks á þessu svæði sem viti meira um málið og geti komið vísbendingum að við rannsókn málsins.

Þetta mál hvílir sem mara yfir meðan að ekki er endanlega komið á hreint allar hliðar þess og spurningum svarað. Það var reyndar skelfilegt klúður að yfirvöld skyldu veita manni grunuðum um að keyra á drenginn leyfi til að fara úr landi, þegar að fyrir lá niðurstöður sýna sem gáfu til kynna að bíllinn sem hann keyrði á var sá hinn sami og keyrði á drenginn hinn örlagaríka dag.

Það er ekki hægt annað en að hafa samúð með aðstandendum drengsins sem þurfa að ganga í gegnum dimma dali við rannsókn þessa máls og það að sá hinn grunaði sé laus og hafi verið leyft að fara úr landi við þessar aðstæður og samræma vitnisburð sinn við þá sem voru handteknir með honum í upphafi.

En vonandi fæst spurningum málsins svarað og vonandi kemur eitthvað meira í viðbót fram eftir sýningu Kompásþáttarins með pólskum texta.

Athugasemdir

[Guðrún Magnea Helgadóttir, 10.3.2008 kl. 02:33]

Einhverju sinni er dómur féll í Baugsmálinu, birti Morgunblaðið á forsíðu sinni myndir í svart hvítu af dómurunum sem sýknuðu Baugsmenn í það skiptið...Ekki finndist mér núna óráðlegt að fréttablöðin almennt birtu nöfn og myndir af þeim dómurum sem gáfu grunuðum um að hafa keyrt bíl þann sem varð litla drengnum að bana, á forsíðum blaða sinna..

[Stefán (IP-tala skráð) 10.3.2008 kl. 09:12]

Já, ég tek svo sannarlega undir með Guðrúnu Magneu og skora hér með og nú á Moggamenn að birta forsíðumyndir af þeim dómurum sem hleyptu hinum grunaða úr landi sem algjörlega frjálsum manni, þrátt fyrir að sannað sé að bíll viðkomandi hafði ekið á drenginn og valdið dauða hans.

[Gísli Sigurðsson, 10.3.2008 kl. 14:02]

Þetta er nú alls ekki svona einfalt mál. Það eru svo mörg atriði sem nauðsynlegt er að sanna, svo sem: hver ók bílnum?, það eru yfirgnæfandi líkur á að það sé sá grunaði, ók hann undir áhrifum áfengis?, það hefur ekki fengist staðfest að sá grunaði hafi verið undir áhrifum. Ók hann of hratt miðað við aðstæður? Ég held að það sé ósannað. Þannig að eftir stendur að þetta hafi í raun verið hræðilegt slys sem engum verður í raun kennt um, og svo  auðvitað sú staðreynd að gerandinn flúði af slysstað, sem ekki bætir málsstað hins seka, nema að því leiti að erfiðara er að sanna á hann sökina.