Spennandi viðureign - MR sigrar í bráðabana

MR tókst að tryggja sér sigur í Gettu betur í bráðabana annað árið í röð nú í kvöld. Þetta var æsispennandi viðureign og mátti heyra saumnál detta þegar að haldið var í bráðabanann eftir að MA hafði tekist að vinna upp sjö stiga forskot MR undir lok keppninnar. MR var reyndara í bráðabana og sást það greinilega af taktíkinni.

MA má þrátt fyrir tapið mjög vel við una í sjálfu sér, þó það sé skelfilega vont og sárt að tapa að sjálfsögðu. Það var eiginlega afrek í stöðunni 26-19 fyrir MA að snúa við töpuðu spili í það að jafna og eiga raunhæfa möguleika á að sigra í bráðabana. Konni var bjargvætturinn þegar að honum tókst að svara spurningunni um Sovétleiðtogana og það hefur eflaust verið öskrað mikið í heimahúsum hér á Akureyri þegar að það tókst.

Að sama skapi voru það gríðarleg vonbrigði, gígantísk satt best að segja, þegar að Konna mistókst að giska á rétta hljómsveit í bráðabana, leggja allt undir Black Sabbath en bíða aðeins sekúndubrot og komast þá auðvitað að því að spurt var um Duran Duran. En það er þannig þegar að komið er á þennan stað í keppnina er keppt um að vera fyrstur á bjölluna. Stundum skilar áhættan sér en stundum er hún afleit. Þannig fór það fyrir MA í kvöld. En þau Konni, Svala og Arna mega þó vera stolt af sínu, sérstaklega að koma skólanum í bráðabanann.

Þetta er í fjórtánda skipti sem MR sigrar í Gettu betur frá því að keppnin hófst árið 1986. Skólinn sigraði fyrst árið 1987, en síðan vann skólinn keppnina í heil ellefu ár í röð, á árunum 1993-2003, og svo aftur í fyrra. Langa sigurtímabilið var ótrúleg sigurganga, sem andstæðingum þeirra á þessu langa tímabili gramdist mjög í geði vissulega en gerði þá sigursælasta lið í sögu keppninnar. Þeir festa það enn í sessi á þessu kvöldi. Óska MR innilega til hamingju.

MR og MA voru með bestu liðin í ár, bæði sterk og satt best að segja fannst mér erfitt að spá um sigur fyrir kvöldið, þó auðvitað vonaði ég að MA tæki þetta. Nema hvað. MA stóð sig mjög vel í gegnum allt ferlið og eru varla síðri sigurvegarar í kvöld í raun. Þetta var svo tæpt að þetta gat í raun fallið á hvorn veginn sem var. En tvö glæsileg lið sem stóðu sig firnavel. En sárindi MA-inga hljóta að vera mikil, en þeir geta verið stoltir með sitt þó.

Það var reyndar andskoti súrt í broti að keppnin skyldi ekki fara fram hér nyrðra, enda áttu MA-ingar klárlega inni keppni frá því að blása varð af norðlenska keppni fyrst í sjónvarpshlutanum. Það væri gott ef að það yrði hugsað betur um þetta að ári. Finn til með Konna í kvöld, enda var það skrambi sárt að giska á vitlaust band eftir að hafa tekist að komast þó þetta langt. Eiginlega grátlegt klúður, en þetta er allt í hita leiksins og allt getur gerst.

En svona er þetta, spenna og fjör - svoleiðis á það að vera. MR sigrar í bráðabana annað árið í röð og MA þarf að sjá á eftir sigurmöguleika eftir magnaða endurkomu í tapaðri viðureign. Allavega; klárlega með skemmtilegri úrslitaviðureignum í Gettu betur-sögunni.

MR vann eftir bráðabana

Athugasemdir

[Guðrún María Óskarsdóttir., 15.3.2008 kl. 01:57]

Já þetta var mjög skemmtileg viðureign.

kv.gmaria.

[Bjarni Kjartansson, 17.3.2008 kl. 12:04]

Sá sem þú nefnir Konna, er afar mikill séntilmaður og örugglega af góðu fólki.

Hann uppskar virðingu okkar, sem komnir erum á miðjan aldur og raunar einnig MRingana sem voru sal, þegar hann viðurkennid, að stigið sem þau fengu í síðustu bjölluspurningunni hefði verið á hæpnum forsendum.

Svona gera menn sem hlotið hafa gott og aristokratískt uppeldi (hér er aristókratisminn algerlega bundinn við forn ísl gildi).

Við íhaldsmenn vorum mjög sáttir.

 Einnig var stúklan sem nefndi það ítalska tónskáld, sem hún mundi eftir og giskaði á rétt, ekkert að þykjast.  AFar hressandi að hluta á og vera vitni að svona hreinskilni og séntilmennsku.

Miðbæjaríhaldið

ÞEim gegnur örugglega betur næst.

[Stefán Friðrik Stefánsson, 17.3.2008 kl. 12:24]

Takk fyrir kommentið Bjarni.

Alveg sammála. Það var heiðarlegt að segja að þetta hafi verið svona og Konni vann marga punkta með því einu. Annars er stórmerkilegt hvernig MA tókst að vinna upp forskotið og eiga enn séns undir lokin. Altént mjög skemmtileg keppni. Strákarnir í MR hafa staðið sig vel og eiga sigurinn mjög vel skilið. Þarna kepptu bestu lið þessarar keppnistíðar.

mbk.