Úrvalsvísitalan aldrei hækkað meira á einum degi

Það eru jákvæðar og góðar fregnir að úrvalsvísitalan hafi í dag aldrei hækkað meira á einum degi í sögu Kauphallarinnar. Þetta er ljós í því myrkri sem hefur verið í íslensku efnahagslífi og vonandi munu hlutabréfin halda áfram að hækka og krónan að styrkjast. Þetta eru gleðitíðindi eftir þann rússibana sem var fyrir páskana í Kauphöllinni.

Það var á við að horfa á æsispennandi hasarmynd að fylgjast með fréttunum úr Kauphöllinni fyrir páskana þar sem allt var á hverfanda hveli og allt í frjálsu falli. Ákvörðun Seðlabankans hefur haft góðar afleiðingar og tekið á mesta vandanum. Hvort að það er tímabundið eður ei verður að ráðast, en þetta voru klárlega hárréttar aðgerðir á mikilvægum tímapunkti.

En spurt er að leikslokum í þessari rússibanastemmningu í Kauphöllinni. Verður áhugavert að sjá hvernig morgundagurinn verður á markaðsvellinum.

Met sett í Kauphöll Íslands

Athugasemdir

[Stefán Friðrik Stefánsson, 25.3.2008 kl. 17:21]

Já, ég tel að þetta muni rokka til og frá á næstunni. Það reynir á markaðinn og krónuna næstu dagana. Inngrip Seðlabankans í dag var mjög mikilvægt og hefur skilað sér en svo er spurningin hvort þessi þróun heldur. Spurning vikunnar allavega.

mbk.

[Stefán Friðrik Stefánsson, 25.3.2008 kl. 17:31]

Það má auðvitað deila um hvað sé rétt og rangt í krísuástandi. En aðgerðarleysið er það allra versta. Það er aldrei traust að horfa á bálið án þess að gera neitt. Það hef ég allavega gagnrýnt. Það varð eitthvað að gera. Það varð að taka af skarið.

Það var gert. Hik áfram hefði skaðað okkur enn meira. Þetta er ákvörðun sem hefur skilað sér í dag en það er spurt um langtímaáhrif. Vaxtaákvörðunardagur verður aftur eftir hálfan mánuð og Seðlabankinn mun eflaust fylgjast vel með stöðunni.

Ætla ekki að vera of svartsýnn en við höfum samt séð daga þar sem þetta rokkar til og frá. Það er ekki við öðru að búast en að sú þróun haldi áfram. Við erum ekki komin á lygnan sjó.

[Haraldur Haraldsson, 25.3.2008 kl. 21:14]

Maður slekkur ekki bál með þvi að kasta á það bensíni/Halli gamli