Bílstjórar minna á sig - stutt í stóra stoppið?

Eftir að hafa sleppt mótmælum í viku minna atvinnubílstjórar nú enn og aftur á sig og sína baráttu, sem hefur orðið æ umdeildari eftir því sem frá hefur liðið, þó flestir séu hlynntir því að lækka eldsneytisverðið. Þeir eru greinilega hvergi nærri hættir baráttunni. Bílstjórarnir tóku sér pásu að ég tel meðvitað, enda sködduðust þeir frekar en styrktust á orðavali talsmannsins og aksturslag við mótmæli undir lok síðustu viku.

Orðrómur hefur verið uppi um að bílstjórar stefni jafnvel að stóra stoppinu umtalaða á næstunni. Ætli sér að lama höfuðborgarsvæðið með mótmælum, leggja bílum sínum og skilja þá eftir á aðalumferðaræðum borgarinnar. Eflaust telja þeir það næsta leik í stöðunni. Þó er þetta hik þeirra bæði merki um að þeir bíði eftir að samgönguráðherra tali þeirra máli í Brussel og hvort að fjármálaráðherra muni gera eitthvað. Þeir bíða og sjá til.

Stóra stoppið mun verða mjög umdeild, verði af því. Það eru einfaldlega það gríðarlega stór mótmæli að það myndi aðeins kalla á hörð viðbrögð almennings og reiðiöldu, frekar en stuðning. Finnst staðan vera mjög afgerandi í þessa átt, miðað við hvað er skrifað um þetta af almenningi og eftir því sem heyrist almennt. Þeir höfðu mikinn stuðning almennings fyrst en hann hefur dvínað mjög að undanförnu, að mestu vegna taktískra mistaka í mótmælunum.

Erfitt er að spá um hvert úthald bílstjóra er fari þeir í stóra stoppið og fái yfir sig reiðiöldu almennings, í meiri mæli en verið hefur. Þeir hafa þó gert mistök í mótmælunum og veikt stöðu sína, það blasir við öllum. Spurt er um hversu mikinn þunga þeir geti lagt í mótmælin í viðbót og hversu skaðlegt stóra stoppið verði fyrir þá.

„Kyrrðarstund" við Alþingi

Athugasemdir

[Ívar Jón Arnarson, 16.4.2008 kl. 18:28]

Er samgönguráðherra ekki búinn að slá botninn úr frekari mótmælum trukkabílstjóranna ?

Hann ætlar jú að fara fram á undanþágu frá aksturstímalögunum frá Evrópu. Vill lengja tímann sem menn geta keyrt hvern dag.

Ef trukkabílstjórar halda áfram mótmælum á grundvelli of mikilla álaga ríkisins á olíu/bensín þá eru þeir að keyra sjálfa sig í kaf held ég. Það er nú buið að koma skýrt fram að álögur á olíu/bensín er hvað lægstar hér á landi af flestum ef ekki öllum Evrópulöndum.

Væri ekki ráð hjá bílstjórunum að taka sér frí frá mótmælum um óákveðin tíma, svona til að sjá hvað kemur úr aðgerðum Kristjáns M.  Þeir hljóta að verða að fara vinna aftur til að borga sektirnar :)