Saddam Hussein dæmdur til dauða

Saddam Hussein, fyrrum forseti Íraks, var dæmdur til dauða í morgun. Verður hann hengdur verði refsingunni framfylgt. Dómnum hefur nú þegar verið áfrýjað, svo að ekki kemur að örlagastundinni fljótlega fyrir þennan fyrrum einræðisherra, sem ríkti í Írak með harðri hendi á árunum 1979-2003. Valdaferli hans lauk í innrás Bandamanna í landið í marslok 2003 en stjórnin féll með táknrænum hætti í kastljósi heimsfjölmiðlanna þann 9. apríl 2003.

Hálfbróðir Saddams, Barzan al-Tikriti, sem var yfirmaður írösku leyniþjónustunnar, var einnig dæmdur til dauða. Taha Yassin Ramadan, fyrrum aðstoðarforseti Íraks, var dæmdur í lífstíðarfangelsi fyrir aðild að morðum á 148 íbúum þorpsins Dujail en flestir íbúa þorpsins eru sjíta-múslimar. Búast má við ófriðarbáli meðal stuðningsmanna einræðisherrans fyrrverandi við þessum tíðindum, en þessi tíðindi boða ekki endalok alls málsins. Þetta eru aðeins fyrstu réttarhöldin af mörgum í málum gegn Saddam.

Þrjú ár eru um þessar mundir frá því að Saddam var handtekinn í sveitahéruðum Íraks. Það markaði mikil tímamót, enda hafði honum tekist að komast undan í rúmlega hálft ár og töldu flestir þá að honum yrði aldrei náð. Handtakan var alheimsviðburður og flestum gleymist vart myndirnar af Saddam fúlskeggjuðum og hrörlegum, eftir flóttann og að hafa í raun þurft að lifa sem útigangsmaður væri til að komast undan þeim sem leituðu hans.

Þessi stóru tíðindi dagsins boða viss þáttaskil í málinu en svo sannarlega engin endalok. Þetta er einn áfangi málsins. Ekki er hægt að segja að tíðindin komi að óvörum.

Saddam Hussein dæmdur til dauða

Athugasemdir

[Gunnar Helgi Eysteinsson, 5.11.2006 kl. 13:48]

Ekki brá mér...  

[Gunnsteinn Þórisson, 5.11.2006 kl. 14:55]

Mér brá, hélt þetta myndi dragast minnst þrjú ár í viðbót ;o

[Stefán Friðrik Stefánsson, 5.11.2006 kl. 16:27]

Já, þetta kom ekki óvænt :) En þetta á eflaust eftir að dragast eitthvað verulega á langinn. Sé ekki alveg fyrir mér að þessu ljúki öllu strax, þessu réttardrama í Bagdad. ;)