Guðni opnar á Evrópuumræðuna í Framsókn

Guðni Ágústsson, formaður Framsóknarflokksins, flutti merkilega ræðu á miðstjórnarfundi í dag og setti þar Evrópumálin á dagskrá hjá flokknum, í takt við það sem Jón Sigurðsson og Valgerður Sverrisdóttir hafa talað um síðustu dagana, þó vissulega hafi hann ekki talað hreint út um að fara í aðildarviðræður. En hann talar um breytingar á stjórnarskrá líkt og aðrir stjórnmálamenn hafa talað um.

Greinilegt er að greinaskrif Jóns Sigurðssonar, fyrrum formanns Framsóknarflokksins, hafa mikil áhrif á stöðu mála innan flokksins og Guðni tekur málið næsta skref með vangaveltum um beinskeytta Evrópuumræðu, pælingar um aðildarviðræður og nauðsynlegar breytingar á stjórnarskrá. Í þeim efnum er hann að segja í raun það sama og Þorgerður Katrín Gunnarsdóttir, varaformaður Sjálfstæðisflokksins, og talar í svipuðum takt og Björn Bjarnason, dómsmálaráðherra, sem hefur verið að velta fyrir sér að móta þurfi vegvísi í Evrópumálum.

Guðni barðist mjög gegn því að feta skrefið í Evrópuátt á flokksþingi Framsóknarflokksins fyrir þrem árum, þar sem hann og Halldór Ásgrímsson, þáverandi forsætisráðherra, tóku rimmu fyrir opnum tjöldum á þinginu. Held að hann sé fyrst og fremst klókur í þessari stöðu. Hefði hann talað áfram með sama hætti og áður hefði hann veitt Valgerði Sverrisdóttur og þeim fulltrúum Halldórsarmsins sem talað hafa mjög afgerandi í Evrópuátt lykiltækifæri til að hjóla í sig, t.d. í formannskjöri á flokksþingi á næsta ári.

Guðni tekur því næsta skref í takt við þá sem hæst hafa talað í Evrópumálum í Framsókn og heldur kontról á stöðunni. Guðna er eflaust mjög mikilvægt að halda völdum í Framsóknarflokknum. Það gerir hann með því að hlusta og útiloka ekkert en tala heiðarlega um málin og íhuga næstu skref í takt við það að almenningur vill heiðarlega umræðu um þessi mál.

Í raun eru blikur á lofti fyrir Framsókn. Áhyggjuefni hlýtur að vera fyrir flokk og forystumenn hans að ekkert skuli hann hagnast meira á hnignandi gengi Samfylkingarinnar en nýjustu kannanir sýna. Þar er Framsókn að hækka en mjög lítið miðað við kjöraðstæður til að ná byr í seglin. Guðni segir hreint út í dag að hann sé á vaktinni og útiloki ekkert.

Eflaust kallast þetta klókindi hjá Brúnastaða-Guðna.

Þarf að breyta stjórnarskrá

Athugasemdir

[Hannes (IP-tala skráð) 3.5.2008 kl. 18:36]

Ég hef alltaf haft litla trú á Guðna en hann er meiri maður í mínum augum eftir þessa stefnubreytingu sína.

Auðvitað eiga allir flokkar að fara á fullt að ræða kosti og galla inngöngu í ESB, hver sem svo niðurstaða verður.

Geir H. Haarde er heigull maður að mínu mati að þora ekki að opna umræðuna um málið í sínum flokki.
Sjallar eiga alveg að vera færir um að skoða hvort að ESB-aðild sé vænleg eða slæm fyrir Ísland.

[leibbi (IP-tala skráð) 3.5.2008 kl. 20:36]

Þetta er aðeins liður í undirbúningi að stofnun vinstri stjórnar undir forystu Ingibjargar Sólrúnar sem er í fullum undirbúningi þessa dagana.

[Jón Valur Jensson, 3.5.2008 kl. 20:47]

Kjánalegt innlegg hjá Hannesi að kalla Geir Haarde heigul. Innleggið ber það einnig með sér, að ritarinn kemur varla til með að vita, hvað átt hefur, fyrr en misst hefur.

[Hannes (IP-tala skráð) 5.5.2008 kl. 18:18]

Heigul er sá sem ekki þorir að taka afstöðu.

Þú ert fól Jón Valur, sem átt heima á öskuhaugum afturhaldssemi og þjóðernisisma.