Bragi Bergmann snýr baki við Sigrúnu Björk

Mér finnst það afleitt að ekki sé komið endanlega á hreint hvernig staðan verði á tjaldsvæðum Akureyrarbæjar um verslunarmannahelgina og hvort áfram verði hið fáránlega 23 ára aldurstakmark þar inn. Ég get þó ekki annað sagt en ummæli Braga Bergmanns um að Sigrún Björk Jakobsdóttir, bæjarstjóri, hafi drepið stærstu helgina í ferðaþjónustu á svæðinu með ákvörðun sinni síðastliðið sumar um aldurstakmarkið umdeilda veki mikla athygli.

Auðvitað eru það mikil tíðindi að Bragi láti ummæli sem þessi falla og snúi baki við Sigrúnu Björk með svo áberandi hætti. Bragi hefur verið nátengdur öllum kosningabaráttum Sjálfstæðisflokksins á Akureyri undir forystu Kristjáns Þórs Júlíussonar 1998, 2002 og 2006 og leikið þar lykilhlutverk sem pólitískur ráðgjafi ekki aðeins Sjálfstæðisflokksins heldur og mun frekar Kristjáns Þórs Júlíussonar. Hann hefur verið mjög nátengdur Kristjáni Þór og haldið utan um allar kosningabaráttur sem hann hefur tekið þátt í síðustu tíu árin.

Eðlilegt er að spyrja sig um hver áhrif þessa verði fyrir Sigrúnu Björk og Sjálfstæðisflokkinn hér á Akureyri að maður sem svo nátengdur hefur verið forystu flokksins ekki aðeins hér á Akureyri heldur og í Norðausturkjördæmi og verið lykilmaður þar snúi baki við hinum nýja leiðtoga flokksins vegna ákvarðana hennar. Um leið er eðlilegt að harma að engin niðurstaða sé komin og allt ferlið vegna verslunarmannahelgarinnar sé í einhverju biðferli, hálfgerðum hring eftir að hver og einn taki af skarið.

Get allavega ekki annað sagt, sem sjálfstæðismaður hér til fjölda ára og starfsmaður í kosningabaráttu flokksins í sveitarstjórnarkosningunum 2006, að greinaskrif Braga og hvöss ummæli hans um bæjarstjórann sem hann vann fyrir í kosningunum 2002 og 2006 og vann mjög náið með séu bæði táknræn og veki spurningar um hvað gerist næst, þar sem Bragi er greinilega að afskrifa hana sem leiðtoga sem hann vinni fyrir í stjórnmálum.

Þegar að maður svo nátengdur Kristjáni Þór Júlíussyni skrifar svo harkalega um eftirmann hans á bæjarstjórastóli vakna stórar spurningar.

Hvernig verður Ein með öllu?

Athugasemdir

[Gísli Baldvinsson (IP-tala skráð) 12.6.2008 kl. 18:18]

Það má halda hátíð, -  mínus Bergmann. kv  gb

[Anna Guðný , 12.6.2008 kl. 20:05]

Er sammála Gísla. Alveg hægt að halda góða hátíð þó Bragi sé ekki til staðar. Hef samt ekkert út á hans störf síðustu ár að setja nema helst kvartið hjá honum í fyrra í beinni útsendingu á Akureyrarvelli. En vil samt að það fari nú allt að komast á hreint með hvað á að gera í ár. Það allra versta með þessa aldursákvörðun í fyrra að mínu mati var hversu seint hún var tekin. Vil því að allt komist á hreint núna eins snemma og hægt er.

[Jón Ingi Cæsarsson, 12.6.2008 kl. 21:38]

Stebbi minn....Bragi Bergmann var í vinnu hjá Sjálfstæðisflokknum eins og hver annar verktaki, þetta er bara vinnan hans. Mér finnst þú yfirdramatisera með Braga Bergmann.... hann er ekki lykilmaður í ferðaþjónustu á Akureyri...

Það hefur ef til vill ekki komið almennilega fram að aldurstakmarkið í fyrra kom til vegna þess að loforð um að auglýsa þetta ekki sem unglingahátíð var brotið á um og eftir helgina fyrir versló þegar bæklingi með tílvísan í 18 ára var send út í þúsundum eintaka....og hver skyldi nú hafa staðið fyrir því ???

[Stefán Friðrik Stefánsson, 12.6.2008 kl. 21:51]

Takk fyrir kommentin.

Jón Ingi: Þú þarft ekki að fræða mig um Braga, Jón Ingi. Veit vel hvaða hlutverk hann hefur haft innan Sjálfstæðisflokksins á Akureyri og ég veit líka vel að þetta er merkileg grein miðað við störf Braga fyrir flokkinn.

Gísli: Bragi er ekki upphaf og endir hátíðarhaldanna en þetta er samt merkileg grein og ummæli hjá honum um bæjarstjórann. Á því leikur enginn vafi.

Anna Guðný: Það er mikilvægt að þetta komist á hreint sem allra fyrst. Þessi óvissa og hringlandaháttur er fyrir neðan allt.

mbk.

[Sigurður Bogi Sævarsson (IP-tala skráð) 13.6.2008 kl. 11:10]

Fjas um smáatriði. Ágreiningur um lítið mál í litlum bæ. Þó fólk greini á um aldurstakmörk á tjaldsvæðum og láti orð falla, sem geta virst stór í núinu, verður þetta mál algjör fótnóta þegar sagan verður gerð upp.

Mikilvægast er samt að samfélagið gangi í gegnum þá umræðu hvort orgíuhátíðir á borð við Halló Akureyri, Ein með öllu og fleiri slíkar eigi rétt á sér. Ef svo er - þá er auðvitað best að þær séu haldnar inn í þéttbýli í nágrenni við sjúkrahús, lögreglustöð, verslanir etc. Það er að segja, ef íbúarnir samþykkja slíkt ...

sbs

[barki (IP-tala skráð) 13.6.2008 kl. 12:40]

Sigurður Bogi.  Þú kemst nálægt kjarna málsins. íbúarnir samþykktu ekki hátiðina eins og Bragi bauð upp á hana. Þetta skynjaði Sigrún Björk og hjó á hnútinn.

Þökk sé henni. 

Góðir gestir hafa ávallt fundið sig velkomna í bænum, eins og ferðaþjónustufólk veit.

Bragi Bergmann bauð hins vegar upp á fyllibyttur og dópista í ótæpilegu magni, og vildi halda því áfram.

Sé hann hættur þá segi ég bara: Farið hefur fé betra 

[Jón Ingi Cæsarsson, 14.6.2008 kl. 13:35]

Því miður var málflutningur þessa manns til lítils sóma fyrir Akureyri og Akureyringa...hann dæmir sig sjálfur með þessari grein sem hann skrifaði. Nú vinnum við saman að hátíð fyrir bæjarbúa og gesti á forsendum íbúanna og þeirra sem vilja halda jákvæðar hátiðir með fjölskyldubrag

Mér er slétt sama þó þær séu ekki með 10.000 manns... bara ef við losnum við þennan ógeðfelda fyllerís og dópbrag sem einkent hefur hátíðir sem Bragi Bergmann hefur komið nærri.