Stjórn SUS ályktar um Árna Johnsen

Við í stjórn SUS samþykktum síðdegis í dag eftirfarandi ályktun um málefni Árna Johnsen, fyrrum alþingismanns, sem varð í öðru sæti í prófkjöri Sjálfstæðisflokksins í Suðurkjördæmi um helgina:

"Að gefnu tilefni gerir stjórn Sambands ungra sjálfstæðismanna þá kröfu til Árna Johnsen sem hugsanlegs þingmanns Sjálfstæðisflokksins að hann sýni auðmýkt þegar hann ræðir um þau brot sem hann var sakfelldur fyrir í starfi sínu sem þingmaður. Háttsemi sú sem Árni var dæmdur fyrir var ekki „tæknileg mistök" heldur alvarleg og mjög ámælisverð afbrot.

Þátttakendur í prófkjöri Sjálfstæðisflokksins í Suðurkjördæmi hafa nú veitt Árna Johnsen annað tækifæri til að sýna að hann geti staðið undir því trausti sem kjósendur sýna kjörnum fulltrúum. Fyrsta skrefið í að endurvinna traust flokksmanna og almennings í landinu er að iðrast fyrri mistaka af einlægni og koma fram af auðmýkt og virðingu.

Ef Árni Johnsen tekur sæti á Alþingi munu fjölmiðlar og aðrir fylgjast vandlega með störfum hans þar. Ætla má að embættisstörf hans verði í meira mæli undir smásjánni en gildir um aðra þingmenn. Standi Árni Johnsen undir þeim auknu kröfum sem til hans verða gerðar hefur hann nýtt tækifærið og lagt grunninn að því að endurheimta það traust sem hann glataði við áðurnefnd afbrot."

Athugasemdir

[Sigrún Sæmundsdóttir, 15.11.2006 kl. 23:34]

 Ég varð ánægð er ég sá þetta.  Það geta ekki flest allir  verið á þeirri skoðun eða verið sáttir með þessa útkomu  hjá flokknum  á suðurlandi eins og formaður lét í vaka. Og eftir að Árni mælti þessi orð,  þá hefur aukist neikvæðnin í garð flokksins. Ef  Árni væri nú smáhugsandi þá gæfi hann eftir þetta sæti og færi aftar.

[Salvör Kristjana Gissurardóttir, 16.11.2006 kl. 03:24]

Þakka SUS fyrir þessa góðu ályktun. Þetta sýnir að æsku þessa lands - já meira segja í Sjálfstæðisflokknum - er ekki alls varnað

[Stefán Friðrik Stefánsson, 16.11.2006 kl. 20:53]

Þakka ykkur Sigrún og Salvör fyrir góð orð um ályktunina. Það var nauðsynlegt að SUS kæmi með þessa hlið mála sérstaklega inn í umræðuna. Ályktunin hefur líka fengið góða umfjöllun, sem er í senn ánægjulegt og mikilvægt.

[Ólafur Örn Nielsen, 17.11.2006 kl. 08:27]

Manni blöskrar að heyra hann svo segja að enginn hafi tapað á þessu !