Eru bankarnir að fegra sjálfa sig í krísutíðinni?

Ekki er við því að búast að tíðindin um að bankarnir hafi hagnast um 80 milljarða króna vegna veikrar stöðu íslensku krónunnar styrki stöðu þeirra meðal almennings. Stóra spurningin er reyndar hvort bankarnir séu að fegra ársfjórðungsuppgjör sitt með gjaldeyrisviðskiptum. Varla mun það verða til að styrkja stöðu þeirra.

Almenningur í landinu fer brátt að finna vel fyrir vondri tíð, sannkallaðri krísutíð. Sumarið verður mörgum erfitt, en varla mun þó niðursveiflan koma endanlega fram fyrr en í haust. Flest bendir til að þá verði lendingin hörð og erfið, þegar eru merki um hvert stefnir og augljóst að hátt bensín- og matarverð eru fyrstu áþreifanlegu merkin um hvernig staðan sé fyrir fólkið í landinu. Fjöldauppsagnirnar hjá Icelandair eru því miður boðberi þess sem koma skal.

Þessar tölur og tíðindi um hvernig bankarnir styrkjast á falli krónunnar, styrkjast á því að eigur landsmanna og þeirra einkahagur fuðrar upp, er þeim ekki til vegsauka. Stóra spurningin verður hvernig bönkunum gangi að plumma sig í stöðunni og hvort ríkið muni verka þá upp eftir allt útrásarfylleríið síðustu árin, sem virðist hafa verið innistæðulausara en mörgum óraði fyrir.

Bankarnir fá 80 milljarða

Athugasemdir

[Sævar Einarsson, 25.6.2008 kl. 15:48]

Skammist ykkar Kaupþing, Glitnir, Landsbankinn, SPRON, Frjálsi fjárfestingarbankinn! já skammist ykkar fyrir það að neyða fólk til að taka erlend lán til þess eins að geta keypt sér það nýjasta og flottasta af öllu sem það hefur ekkert að gera við, sveiattann ! nei úbbs, bankinn neyðir ekki lán uppá fólk, fólk gerir það að fúsum og frjálsum vilja.

[Helga Þorkelsdóttir (IP-tala skráð) 25.6.2008 kl. 20:04]

Gæti ekki verið meira sammála þér. Það verður hörð lending hjá mörgum með haustinu. Því miður.Kv, HELGA