Gamalkunnar yfirlýsingar á G8-fundinum

Leiðtogafundur átta helstu iðnríkjanna fer nú fram á Hokkaídó-eyju í Japan. Eins og síðustu árin eru umhverfismál og þróunaraðstoð aðalmál fundarins að þessu sinni og greinilegt að vilji er meðal leiðtoganna til að staðfesta ákvarðanir síðustu ára, en þar var náð merkilegum áföngum bæði í Þýskalandi í fyrra og Rússlandi fyrir tveim árum. Mikilvæg mál eru þó að mörgu leyti í biðstöðu. Beðið er þess hver verði kjörinn 44. forseti Bandaríkjanna í nóvember og því líklegt að fundurinn að ári á Ítalíu muni verða mun öflugri þar sem þá mætir nýr forseti með sterkara umboð frá Bandaríkjunum.

Hópur leiðtoga valdamestu iðnríkja heims var stofnaður árið 1975 og er þetta því 34. fundurinn. Fyrst í stað voru sex lönd í samstarfinu: Bandaríkin, Bretland, Frakkland, Ítalía, Japan og V-Þýskaland. Það var í nóvember 1975 sem þáverandi leiðtogar landanna hittust í fyrsta skipti saman í Rambouillet í Frakklandi í boði Valéry Giscard d'Estaing, þáv. forseta Frakklands, og ákveðið var að funda framvegis árlega að sumarlagi. Alla tíð síðan hafa þjóðirnar skipst á að halda fundinn og leiða starfið á fundinum. Gestgjafinn hefur leitt umræður og haldið utan um fundaformið.

Ári eftir fyrsta fundinn, árið 1976, bættist Kanada í hóp þjóðanna sex. Hópurinn var óbreyttur í rúma tvo áratugi eftir það. Allt frá árinu 1991, við lok kalda stríðsins, hefur Rússland þó verið hluti fundarins en varð ekki fullgildur aðili í hópnum fyrr en árið 1998, er Boris Jeltsin, þáverandi forseti Rússlands, varð fyrsti leiðtoginn frá þessu forna fjandveldi vesturríkjanna til að vera tekinn í þeirra hóp. Rússland var gestgjafi G8-fundanna fyrst fyrir tveim árum, en þá var fundað í St. Pétursborg. Orðrómur er um að bæta Kína og Indlandi í hópinn, en ekkert verið ákveðið þar um.

Fundinn sátu Yasuo Fukuda, forsætisráðherra Japans, George W. Bush, forseti Bandaríkjanna, Silvio Berlusconi, forsætisráðherra Ítalíu, Angela Merkel, kanslari Þýskalands, Stephen Harper, forsætisráðherra Kanada, Nicolas Sarkozy, forseti Frakklands, Gordon Brown, forsætisráðherra Bretlands, og Dmitri Medvedev, forseti Rússlands. Þetta er áttundi og síðasti leiðtogafundur Bush en hann lætur af embætti 20. janúar nk. Hann hefur setið lengst allra leiðtoganna við völd, eða allt frá árinu 2001. Mörg lykilmál bíða þess líka að hann hætti.

Eitt helsta umræðuefni leiðtogafundarins fyrir ári var kólnun í samskiptum vesturveldanna og Rússlands, og leiðtogar vesturveldanna ósáttir við Pútín. Nú þegar hann hefur látið af forsetaembætti má merkja vissa breytingu. Mun betur fer á með Medvedev og leiðtogum vesturveldanna. Hinsvegar er Pútín enn maðurinn sem ræður ferðinni í rússneskum stjórnmálum, einn valdamesti forsætisráðherra í sögu Rússlands. Veik staða Medvedev er augljós og flestir búast við að Pútín verði aftur forseti árið 2012.

Að ári verður leiðtogafundur átta helstu iðnríkja heims haldinn á Sardiníu. Gestgjafi verður þá hinn umdeildi Silvio Berlusconi. Hann verður starfsaldursforseti í hópi leiðtoganna að ári, en hann hefur þrisvar gegnt embætti forsætisráðherra, lengst allra frá stríðslokum, samtals í sex ár. Fyrir þá sem vilja kynna sér dagskrá fundarins og meginatriði um hann er eindregið bent á að líta á heimasíðu hans.

G8 lofa Afríku aðstoð