Fjölnir leikur sér að ÍA - lánleysi Skagamanna

Nýliðar Fjölnis í Grafarvogi gerðu sér lítið fyrir í kvöld og rassskelltu Skagamenn á heimavelli. Lánleysi Skagamanna er algjört en þeir hafa nú leikið átta deildarleiki í röð án sigurs. Guðjón Þórðarson hefur ekki átt daprari sumar á sínum þjálfaraferli í efstu deild íslenskrar knattspyrnu og greinilegt að fátt er að ganga upp hjá liðinu.

Botnbarátta blasir við Skaganum, rétt eins og fyrir tveim árum. Skagamenn mega varla við fleiri skakkaföllum enda með aðeins sjö stig úr ellefu leikjum. Enn hefur liðið tíma til að bjarga sér af botninum en ekki blæs byrlega. Frekar dapurlegt hefur verið að sjá til Skagamanna á þessu sumri og deilur þeirra við dómara ekki beinlínis verið uppbyggilegar. Nær væri fyrir liðið að taka á sínum vandamálum og ná áttum í botnbaráttunni.

Skaginn hefur lengst af verið gullaldarlið í íslenskri knattspyrnu. Þetta er vond staða og hlýtur að vera erfið fyrir stuðningsmenn liðsins. Flestir spyrja sig að því hvernig Skaginn ætli að vinna sig upp í sumar eftir þessa martröð í upphafi mótsins. Þar eru góð ráð orðin mjög dýr og algjör skelfingarbragur yfir þessu forna knattspyrnuveldi sem er að upplifa dökka daga.

Stóra spurningin verður hvort að Guðjón Þórðarson muni klára sumarið sem þjálfari Skagamanna, hvort honum verði kennt um slæmt gengi liðsins eða takist að snúa vörn í sókn.

Nýliðar Fjölnis lögðu Skagamenn, 2:0

Athugasemdir

[Guðmundur. (IP-tala skráð) 14.7.2008 kl. 01:44]

Já þetta er svart hjá okkur gulum og glöðum þessa dagana. En það hlýtur að birta til í síðari umferðinni á mótinu.

Ég hef ekki orðið var við neitt nema heiðarlegan leik undanfarið hjá ÍA. Ekkert verið að agnúast í dómurum heldur. Það var vissulega sett út á þá í nokkrum leikjum (KR leiknum sérstaklega) en þá var það oftast hárrétt.

Síðan sú umræða fór fram þá hafa dómarar stórbatnað í ÍA leikjum. Því miður hefur liðið hinsvegar lítið bætt sig. Það er þá vonandi næsta stig.

Helmingur eftir. Vonandi betri helmingurinn.

[Stefán Friðrik Stefánsson, 14.7.2008 kl. 11:35]

Takk fyrir ábendinguna Einar. Smávilla. En já, þess þá betur. Skelfileg staða hjá gulum á Skaganum. Vonandi náið þið að redda ykkur, en það fer að verða erfitt og aðstæður verða aðeins verri. En kannski vinna Skagamenn vel undir álagi, t.d. eins og var fyrir tveim árum. Gangi ykkur vel.

Guðmundur: Takk fyrir skrifin. Vonandi mun Eyjólfur hressast. :)

mbk.