Frelsisbeiðni morðingja Sharon Tate hafnað

Susan Atkins, morðingja leikkonunnar Sharon Tate, eiginkonu óskarsverðlaunaleikstjórans Romans Polanski, var í kvöld hafnað um náðun og mun því deyja í fangelsi, en hún er langt leidd af krabbameini og á aðeins örfáa mánuði eftir ólifaða að mati lækna. Mikið hafði verið rætt í bandarísku samfélagi að undanförnu um hvort ætti að náða Atkins og hún gæti fengið að deyja sem frjáls kona.

Morðið á Tate og fjórum vinum hennar árið 1969 er með ógeðfelldustu morðum í bandarískri sögu - einkum vegna þess hversu kaldrifjað það var. Engin miskunn var sýnd, en Tate var komin átta og hálfan mánuð á leið með barn sitt og Polanski er hópurinn að baki morðunum slátraði henni. Susan veitti Sharon banastungurnar þrátt fyrir að hún grátbæði Susan um miskunn fyrir sig og son sinn.

Susan gekk reyndar það langt þegar að hún slátraði Sharon að hún skrifaði Pig utan á hurðina á húsi Polanski-hjónanna með blóði úr Sharon. Hún sýndi aldrei neina iðrun á morðunum þegar málið var fyrir dómi og hreykti sér meira að segja af því hvernig hún drap Sharon Tate.

Vissulega er það áleitin spurning hvort frelsið sé valkostur fyrir þá sem fremja svo alvarlega glæpi, hvort þeir eigi að fá tækifæri til að upplifa lífið án refsingarinnar sem markaði örlög þeirra. Í þessu tilfelli hefði fyrirgefning ekki verið rétt skilaboð, enda aldrei iðrun sýnd.

Mér finnst ekki hægt að horfa framhjá því sem Manson-hópurinn gerði á sínum tíma, með því að slátra ekki aðeins hinni 26 ára gömlu leikkonu, Sharon Tate, heldur öðru fólki á þeim tíma. Því er þessi niðurstaða bæði rétt og eðlileg.

Athugasemdir

[Hólmdís Hjartardóttir, 16.7.2008 kl. 01:29]

Ég man svo vel eftir þessum morðum.....en á ekki að gefa fólki tækifæri á ný?

Þetta voru óvenju ógeðfelld morð. Polanski hefur átt erfitt síðan.  Tess var fráær...........en minnir mig rétt að Cat Peaple hafi verið hans líka?

[Sverrir Einarsson, 16.7.2008 kl. 01:53]

Sé bara ekkert athugavert við það að hún hafi fengið neitun. Ástæðuna nefnir þú sjálfur í pistlinum, ég var ekki gamall þegar þetta átti sér stað en rifjaðist upp við lestur þessa pistils og þessi hópur á ekkert neina vægð (ekki  heldur af mannúðarástæðum) skilið. Þó svo hún sé dauðvona núna réttlætir það ekki neina náðun, allavega ekki frá mínum bæjardyrum séð.

Eigðu góðann dag það ættla ég að gera.

[Friðrik Þór Guðmundsson, 16.7.2008 kl. 11:17]

Stefán Friðrik styður augljóslega upptöku alvöru lífstíðarfangelsis á Íslandi og gott ef ekki dauðarefsingar. Öðruvísi verður þessi og fyrri færsla hans ekki skilin. Á "lina" Íslandi væri þessi sorglega kona líklega á Sogni.

[Stefán Friðrik Stefánsson, 16.7.2008 kl. 12:58]

Þakka kommentin.

Friðrik Þór: Styð ekki dauðarefsingu. Er meira að segja ósammála Barack Obama, sem er farinn að tala fyrir henni vestanhafs og flaggar Osama Bin Laden sem manni sem eigi dauðarefsingu skilið fyrir dómi í Bandaríkjunum. En hann er svosem búinn að flippfloppa ansi duglega síðustu dagana. En ég er ekki á móti lífstíðarfangelsi fyrir alvarlega glæpi, það er alveg ljóst. Slátrunin á Sharon Tate er ekkert venjulegt mál, ég held að það sjáist vel í umræðunni vestanhafs að Susan Atkins á litla samúð almennings.

Sverrir: Takk fyrir það.

Hólmdís: Þetta hefur markað Roman Polanski, enda gríðarlegt áfall. Hann hefur ekki jafnað sig á þessu. Hann er samt listamaður sem hefur getað staðið sig vel og tjáð þar eigin þjáningu með listalegum hætti í gegnum snilld sína.

mbk.

[Friðrik Þór Guðmundsson, 17.7.2008 kl. 00:36]

Stebbi; Kanar eru með eindæmum refsiglöð þjóð. Ég vil ekki miða við mælikvarðana vestan hafs. Ég vil frekar miða við mannúðlegri þjóðir. Hroðaleg morð hafa verið framin hér á landi, mundu það. Og fólk sem er kolklikkað og í eiturlyfjavímu að auki er gjarnan sett á Sogn sem ósakhæft.

Eitthvert hroðalegasta morð nútímans á Íslandi var framið af manni sem nú selur ljóðabækur við Austurstæti. Virðist sauðmeinlaus öllum. Í USA væri búið að drepa hann eða hann enn á bak við lás og slá.

37 ár í fangelsi og að drepast úr krabbameini. Hvar eru mannúðin og mildin, Stebbi? Hvar er kristna fyrirgefningin, Stebbi?