Flokksþing demókrata í Denver: 2. dagur

Flokksþing demókrata heldur áfram í kvöld í Denver. Í gær var fjölskyldan í fyrirrúmi, mjúka hliðin á Barack Obama kynnt í bak og fyrir, auk þess að Ted Kennedy var heiðraður og Michelle Obama mátaði sig við hlutverk forsetafrúarinnar. Kvöldið var upp og ofan, mörgum fannst það of væmið og dæmdu það glatað í pólitískum skilningi. Meðal þeirra var James Carville, vinur og pólitískur spunameistari Clinton-hjónanna fyrr og nú.

En nú er komið að alvöru pólitískum stjörnuljóma. Í kvöld verður Hillary Rodham Clinton í aðalhlutverki á flokksþinginu sem flestir töldu fyrir rúmu hálfu ári að yrði hennar, þar myndi hún verða helsta stjarnan í hlutverki forsetaefnisins. Nú þarf hún að tala upp samstöðuna í flokknum, gefa sviðsljósið eftir til Barack Obama og sýna að hún hugsi um flokkshag umfram sinn eigin, þó fjölmargir stuðningsmenn hennar séu hvergi nærri sáttir við stöðuna. Svo verður að sjá hvort stjörnuljómi hennar mun skyggja á manninn sem sigraði hana þegar hann kemur til Denver.

Kannanir benda til þess að fjölmargir stuðningsmenn Hillary ætli ekki að styðja Barack Obama í væntanlegum forsetakosningum. Fjölmargir þeirra ætli að sitja heima eða styðja John McCain. Aðeins helmingur þeirra er kominn um borð hjá Obama. Þetta er áhyggjuefni, þegar kannanir sýna að Obama hefur ekki forskot og varaforsetavalið á Joe Biden virðist ekki hafa breytt einu né neinu. Sumar kannanir gefa meira að segja til kynna að McCain sé kominn yfir í byrjun flokksþingsins. Martröð fyrir demókrata.

Clinton-hjónin hafa enn stjörnuhlutverk. Fyrir fjórum árum voru þau höfð saman fyrsta kvöldið til að skyggja ekki á John Kerry á hans flokksþingi í Boston. Nú drottna þau yfir miðju þinginu, kvöldin tvö áður en Obama þiggur útnefninguna í Denver. Auðvitað segir það allt sem segja þarf um hlutverk þeirra í baráttunni næstu 70 dagana. Þau hafa lykilhlutverk og Obama verður að hafa þau með og þess vegna hafa þau sviðið áður en hann kemur til borgarinnar. 

Clinton forseti mun vera æfur vegna þess að honum var valið að tala um þjóðaröryggismál af kosningabaráttu Obama, án nokkurs samráðs við sig. Hann vill tala um efnahagsmál og telur sig verða að gera það. Bæði vilji hann setja ofan í við Obama, sem gerði lítið úr afrekum í forsetatíð hans í forkosningabaráttunni og eins minna á að hann hafi skilið við efnahagsmálin í toppformi. Fróðlegt verður að sjá hvort hann heldur sig við rammann.

Förum yfir nokkra lykilpunkta annars þingkvöldsins.

- Hillary Rodham Clinton er aðalræðumaður kvöldsins. Henni er ætlað að tala um lykilmál sín í kosningabaráttunni, einkum jafnréttismál. Mikilvægt er fyrir demókrata að sameina flokkinn og sýna að Hillary horfi fram á veginn en ekki aftur, hún tali stuðningsmenn sína með sér inn í lestina hans Obama, þó hún hafi ekki orðið varaforsetaefnið. Mikil ergja er í herbúðum hennar með hvernig farið var með Hillary. Ekki hafi Obama hringt sjálfur í hana til að tilkynna um valið á Biden heldur aðstoðarmenn hans haft samband við aðstoðarmenn Hillary.

Sumir lykilmenn í baklandi Hillary eru reyndar svo æfir að þeir ætla sér að yfirgefa Denver á morgun og munu því ekki verða þar þegar Obama þiggur formlega útnefninguna. Hillary tilkynnti síðdegis að hún ætlaði að vera viðstödd þegar Obama flytur ræðu sína. Greinilegt er með því að samkomulag hefur náðst um að klára þingið. Væntanlega mun Hillary hvetja þá sem styðja hana í kjörinu á morgun til að styðja Obama og gefur hún þingfulltrúa sína. Enn er þó óljóst hvort henni verður tryggt hlutverk við hæfi í baráttunni. Hillary er það mikilvæg að nærvera hennar skiptir máli.

Búast má við að Hillary flytji leiftrandi og trausta ræðu og minni vel á sögulegt hlutverk sitt á þessu kosningaári þó henni hafi ekki tekist að ná alla leið. Hún mun líka minna á að hún sé hvergi nærri búin að vera í stjórnmálum og horfir fram á veginn en ekki aftur. Þetta er mikilvægt fyrir Obama. Hann þarf að fá stuðningsmenn Hillary með sér. Algjört lykilmál. Án þess hóps eru kosningarnar dæmdar til að tapast.

- Chelsea Clinton kynnir mömmu sína. Chelsea var ein helsta stjarna forsetaframboðs móður sinnar og barðist með henni allt til enda. Chelsea var mikið í skugganum í forsetatíð pabba síns, var sjáanleg en ekkert meira en það. Foreldrar hennar vildu ekki að Chelsea yrði opinber persóna þrátt fyrir hlutverk þeirra og hún heyrðist varla tala opinberlega þau átta ár sem pabbi hennar var einn valdamesti maður heims.

Chelsea tók lykilhlutverk í baráttunni eftir ósigur mömmu sinnar í Iowa og barðist með henni í frontinum í New Hampshire og allt þar til hún viðurkenndi loks ósigurinn í júní. Tók hún enn stærra hlutverk eftir alvarleg mistök pabba síns þegar hann missti sig í suðurríkjunum á þýðingarmesta hluta baráttunnar. Síðan hafa verið sögusagnir um að hún fylgi í fótspor foreldra sinna og tímaspursmál hvenær hún fari í framboð sjálf.

- Mark Warner, fyrrum ríkisstjóri í Virginíu, er lykilræðumaður flokksþingsins (key note speaker). Fylgir hann eftir sjálfum Barack Obama í því hlutverki, en Obama var lykilræðumaður flokksþingsins í Boston fyrir fjórum árum. Warner sækist nú eftir sæti repúblikans John Warner (fyrrum eiginmanns Liz Taylor) í öldungadeildinni fyrir fylkið. Valið á honum kom ekki að óvörum, enda vilja demókratar bæði vinna sætið og tryggja Obama sigur í fylkinu í nóvember. Demókrati hefur ekki unnið í Virginíu síðan Lyndon Johnson var kjörinn forseti árið 1964.

- Helstu ríkisstjórar flokksins ávarpa þingið í kvöld; þau Brian Schweitzer í Montana; Deval Patrick í Massachusetts (fyrsti þeldökki ríkisstjórinn þar); Kathleen Sebelius í Kansas (sem var mikið orðuð við varaforsetahlutverkið); Janet Napolitano í Arizona (heimafylki John McCain); Joe Manchin í Vestur-Virginíu; Jim Doyle í Wisconsin; Ed Rendell í Pennsylvaníu; Ted Strickland í Ohio; David Paterson í New York (fyrsti þeldökki ríkisstjórinn í New York og sá fyrsti blindi á landsvísu - tók við af Eliot Spitzer sem féll á vændiskonuviðskiptum) og Chet Culver í Iowa. Mikilvægt fyrir Obama að sýna þennan trausta hóp.

- Öldungadeildarþingmennirnir Bob Casey í Pennsylvaníu og Patrick Leahy í Vermont ávarpa þingið ennfremur. Báðir lýstu yfir stuðningi við Obama á mikilvægum tímapunkti. Leahy komst reyndar sérstaklega í sviðsljósið í apríl þegar hann sagðist vilja beita flokksvaldi til að henda Hillary úr forkosningaslagnum, sem leiddir til harðvítugra átaka milli lykilmanna Clinton-hjónanna og hans. Hefur hann með því, að sögn nánustu samherja Clinton-hjónanna, fallið í ónáð hjá þeim.

- Þetta er sérstakt kvennakvöld þingsins. Allar konur í forystunni koma saman á sviðið á þessu kvöldi konunnar sem hlaut 18 milljón atkvæða í forkosningunum og til að marka afmælisdag kosningaréttar kvenna í Bandaríkjunum. Kaldhæðnislegast af öllu er að stór hluti kvennanna í lykilstöðunum studdu frekar Obama en Hillary, meira að segja harðir femínistar á þingi.

Kvöldið er því allt öðruvísi en gærkvöldið. Alvöru pólitík með lykilfólki, mikill þungi og traust áhersla á að taka slaginn við repúblikana. Sykursætt kannski í og með en samt harðari pólitík. Stóra mómentið verður auðvitað Hillary. Allir munu fylgjast með henni í kvöld og hvert orð og hvert augnablik ræðunnar verður skannað í bak og fyrir. Ekki aðeins spá menn í fatnaði hennar, heldur líkamstjáningu, svipbrigðum og áherslum.

Þetta er kvöldið hennar Hillary. Og svo er að sjá hvernig henni tekst að tala reiða stuðningsmenn sína á að munstra sig á dallinn með Obama næstu 70 dagana. Þetta er aðalmómentið sem ræður úrslitum í því hvort tekst að sameina flokkinn, eins sundraður og hann lítur út fyrir að vera á þessu þingi. 

Ég segi bara eins og Bette Davis í hlutverki Margo Channing í kvikmyndinni ógleymanlegu All About Eve; Fasten Your Seatbelts - It´s Going to Be a Bumpy Night!

Athugasemdir

[Jens Sigurjónsson, 27.8.2008 kl. 00:29]

Sæll Stefán.

Það verður fróðlegt að sjá hvernig þetta flokksþing endar, því það er klofningur í flokknum á því leikur engin vafi.

Repúblikanar hafa verið að skjóta á Hillary í dag, og hafa meðal annars verið að rifja upp ummæli hennar að Obama sé engan veginn tilbúinn til að leiða Demókrata.

En þó svo Hillary hafi sagt að hún ætli sér ekki að skipa stuðningsmönnum sínum fyrir og Kjósa Obama. Þá held ég að hún muni örugglega leggja áherslu á flokkhollustu og fylkja liði um Obama.

 Bestu Kveðjur Jenni.                                                                                                                                                                  

[Haraldur Haraldsson, 27.8.2008 kl. 01:15]

Enn er Halli gamli ekki ánægður, er Clitons maður/Kveðja Halli gamli/p/s vonum að þetta feri samt allt vel!!!!/Sami

[Jón Ingi Cæsarsson, 27.8.2008 kl. 12:21]

Svolítið litað hjá Stebba.... hann er svo mikill Rebublikani...heldur með McCain og hans helsta goð er Ronald Reagan..

Stebbi er svolítið eins og Kínversku kommarnir vill hafa forseta og ráðamenn vel á áttræðisaldri ... svona búna með það besta eins og menn óneitanlega eru á áttræðis og níræðisaldri eins og menn vita. Þá vil ég frekar fá yngri menn þó svo þá vanti reynslu .... hún kemur fljótt.

[Stefán Friðrik Stefánsson, 27.8.2008 kl. 13:11]

Takk fyrir góð orð Jenni og Halli.

Jón Ingi: Þú hefur rangt fyrir þér. Ég vildi Hillary Rodham Clinton sem forseta Bandaríkjanna.

[Jón Ingi Cæsarsson, 27.8.2008 kl. 13:45]

Hún er ekki í boði.

[Stefán Friðrik Stefánsson, 27.8.2008 kl. 14:22]

Frekar McCain en Obama. Annars er það nú þannig að mér finnst hvorugur þeirra bera af. Finnst Obama vera innantómur og falskur og McCain vera of aggressífur og kærulaus þrátt fyrir alla reynsluna. Á okkar dögum er 72 ára ekki það mikill aldur. Amma mín er að verða níræð og er á fullu. Aldurinn er orðinn mældur í öðru en árum tel ég. Annars eru þessir frambjóðendur báðir til hægri fyrir mér og því væri ég svosem alsæll sama hvor þeirra myndi vinna. Bandarísk pólitík er langt til hægri við okkar. Þegar ég fór til DC fyrir síðustu kosningar talaði ég við demókrata sem voru miklu hægrisinnaðri en ég.

[Jón Ingi Cæsarsson, 27.8.2008 kl. 14:55]

Á vinnumarkaði er 72 ára hár aldur þegar maður væri að ráða sig til fjögurra eða átta ára. Hann væri 76 ára við lok fyrra kjörtímabils og 80 ára í lok þess seinna sem hann mætti sitja. Það er aldrað samkvæmt líffræðilegum skilgreiningum og hann væri hvergi frambærilegur eða fengi aðgang á almennum vinnumarkaði í hinum vestræna heimi.

Stjórnmál þar eru ósambærileg við það sem við þekkjum en þó eru democratar hófsamari og mannlegri í stefnumörkun en hægri flokkurinn þeirra. hægrasti mætti kannski segja.