Pólsk hryllingssaga

Fjölmiðlar um allan heim líkja eðlilega hinni svívirðilegu blóðskömm í bænum Siedlce í Póllandi við annað frægt mál í Austurríki þar sem Josef Fritzl misnotaði dóttur sína árum saman, átti með henni börn og lokaði þau af í rammgirtri kjallaraholu. Þetta er sannarlega algjör hryllingssaga og enn vakna spurningar hvernig menn geti gert svona við eigin börn, eyðilagt líf þeirra með svo ógeðfelldum hætti.

Þó að þessi misnotkun hafi staðið í mun styttri tíma en það sem Elísabet Fritzl mátti þola er þetta skelfilegt í alla staði. Þetta er í raun aftaka á viðkvæmri sál, barni á viðkvæmum aldri og er skelfileg framkoma við manneskju af eigin holdi og blóði. Misnotkunin og einangrunin eru algjört tilræði við börn. Algjör hryllingur.

Eitt er fyrir saklaust barn að lenda í svona aðstæðum með ókunnugu fólki, sem er vitfirrt og fer sínu fram meðan að leit fer fram, en það að foreldri fari svona með eigið barn er viðurstyggilegt. Eitt af því sem slær mig mest er að birtar voru myndir af manninum á fréttavefum í gærkvöldi en augun voru falin. Finnst alveg óþarfi að reyna að fela hver þetta sé.

Samlíkingin við Fritzl-málið er eðlileg. Þetta er jafnmikið áfall fyrir pólskt samfélag og Fritzl-málið var fyrir hið austurríska. Að tvö svona alvarleg mál komi upp í friðsælu evrópsku samfélagi á innan við tveim árum er dapurleg staðreynd. En kannski er svona mannvonska víða til staðar en falin vandlega. Dapurleg tilhugsun.

Lokaði dóttur sína inni í sex ár

Athugasemdir

[365, 9.9.2008 kl. 14:30]

Við skulum ekki gleyma því að álíka mál hafa átt sér stað í hlaðvarpanum hjá okkur sjálfum.  Því má aldrei gleyma.

[Stefán Friðrik Stefánsson, 9.9.2008 kl. 16:33]

Vissulega, tek undir það. Held samt að svona mál hafi ekki gerst hér að manneskja sé lokuð af árum saman undir stjórn föður síns og notuð sem kynlífsþræll og hefur ekki frelsi. Man ekki eftir svona brútal máli hérna heima, þó vissulega hafi sifjaspell verið til staðar. Því miður er svona óhugnaður víða.