Verðbréfahrun í kjölfar svarta sunnudagsins

Staðan á fjármálamörkuðum er ekki glæsileg á þessum morgni. Fallið á Lehman Brothers gefur til kynna hversu erfiðir tímar eru framundan. Hinn mikli reynslujaxl bandarískra efnahagsmála, Alan Greenspan, hefur spáð því að lægðin í Bandaríkjunum sé orðin það mikil að hún gerist aðeins einu sinni á öldinni. Hann spáir því að fallið muni því minna helst á svörtu mánudagana 1929 og 1987. Þegar farið að nefna gærdaginn svarta sunnudaginn.

Velti fyrir mér hvaða áhrif fall Lehman bræðra hafi hér á Íslandi. Væntanlega gerir hún Íslendingum æ erfiðar fyrir með lántökur. Fjárfestar á alþjóðavettvangi munu síður taka áhættur með lánveitingum til Íslendinga við þessar aðstæður. Annars er skjálftatíðnin á mörkuðum augljós um allan heim og algjör óvissa uppi.

Stóru tíðindin í endalokum Lehman Brothers eru þau að bankar ganga ekki lengur að því vísu að yfirvöld bjargi þeim. Eflaust eru þetta því nokkur þáttaskil í því sem koma skal.

Skjálfti á fjármálamörkuðum

Athugasemdir

[Fannar frá Rifi, 15.9.2008 kl. 14:48]

Eru það ekki bankar og fjármálastofnanir sem verst hafa farið út úr núverandi efnahagsniðursveiflu, þeir sem messt gagnrýndu íslenskt efnahagslíf og banka? hafa haldið því fram í um ár að allir íslensku bankarnir væru á barmi gjaldþrots. núna kemur í ljós að íslensku bankarnir standa en þeir sem gagnrýndu þá eru sjálfir komnir í þrot.

Vekur þetta ekki upp ákveðnar spurningar um heilindi og áræðanleika þessara svokallaðra óháðra matsaðila. 

ætli krónan væri í dag ekki allavega 20 til 30 punktum sterkari ef við værum ekki með Viðskiptaráðherra sem talaði niðurgengið í hvert skipti sem hann hefur opnað munninn?

[Erna Hákonardóttir Pomrenke, 15.9.2008 kl. 18:11]

Þetta er óhugnanlegt ástand. Ónot  á Wall Street í morgun þegar tilkynnt var að fjármála/hlutabréfa fyrirtækið Merryl Lynch hafi verið selt til Bank of America. Má búast við að verð á Bank of America hlutabréfum lækki við þessa frétt. En á Alan Greenspan ekki svolítið þátt í þessu ástandi? Það var verið að gefa fólki húsnæðislán sem bankarnir hefðu mátt vita að viðkomandi gat ekki staðið í skilum við og nú sitja þessi hús tóm og "eigendurnir" horfnir. Þar sem ég bý eru nokkur hundruð hús sem bankarnir hafa tekið í sína eign og eigendurnir einfaldlega flúið til að komast hjá að borga lánin.