Kóngur eða hirðfífl - þjóðsöngurinn hans Bubba

Langt er síðan ég hætti að taka alvarlega spár sjálfskipaðra sérfræðinga um tónlist. Skoðunin verður ávallt persónulegt mat og sumir hata vissa tónlistarmenn svo mjög að hversu góðir sem þeir eru eða verða blindast allt þeirra starf af einhverri undarlegri ergju í garð viðkomandi. Sennilega er um fátt meira deilt en hvort Bubbi sé kóngur eða hirðfífl tónlistarbransans.

Allt síðan Bubbi gaf út Ísbjarnarblús hefur traust staða hans komið í ljós með hverju tónlistarverki hans. Hann hefur verið umdeildur, en selt efni sitt í bílförmum ár eftir ár. Bubbi er einfaldlega með ráðandi stöðu á þessum blessaða markaði og allir kaupa efnið, sama hvort þeir elska að hata hann eða elska hann út af lífinu sem tónlistarmann. Hann er einfaldlega kóngurinn að mínu mati.

Ég hef oft verið mjög ósammála Bubba í pólitískri rimmu. Hann hefur oft samið texta sem ég hef verið ósáttur við. En ég met hann samt mjög mikils og tel hann í fararbroddi allra í íslenskri tónlist. Læt ekki pólitískan skoðanamun breyta því. Enda held ég að staða Bubba sé ljós af því hversu mikið hann selur og hversu mikið er spilað af efninu hans.

Deilt er á lagið Stál og hnífur. Mér hefur alltaf fundist þetta eitt besta dægurlag í íslenskri tónlistarsögu. Hversu margir hafa ekki sungið þetta lag einhverntímann? Hvort sem er í heimapartýi, dansleik eða bara á einhverri krá? Tilefnin eru ótalmörg.

Stál og hnífur er fyrir löngu orðin sameign okkar allra. Frábært lag, eitt helsta einkennislag kóngsins og það hefur trausta stöðu sem hálfgerður þjóðsöngur Íslendinga á góðu stundunum.

Bubbi hefur gert betur en á Konu

Athugasemdir

[Brynja skordal, 27.9.2008 kl. 01:49]

Bubbi er mitt uppáhald og hefur verið lengi lengi

[Jens Guð, 27.9.2008 kl. 02:04]

  Ég kynntist Bubba lítillega á níunda áratugnum.  Þá var ég á kafi í pönkdeildinni.  Rak pönkplötubúðina Stuð og gekk síðar til liðs við útgáfurfyrirtækið Gramm.  Tók þátt í að setja upp ótal hljómleika og við gáfum út plötur með Bubba,  Megasi,  Björk og fleirum.  Ég hannaði plötuumslög söluhæstu plötur Bubba:  Dögun (23400 seld eintök),  Frelsi til sölu (18900 eintök),  Konu (16800) og svo framvegis. 

  Bubbi er ólíkindatól.  Einn daginn var hann róttækur anarkisti.  Næsta dag studdi hann Davíð Oddsson.  Þriðja daginn var hann virðulegur hægri miðjumaður.  Ég held að ég fari ekki rangt með að Bubbi hafi stutt fleiri stjórnmálahreyfingar en ég hef tölu á.  Síðast Íslandshreyfingu Ómars Ragnarssonar.  Þar áður Kvennalista,  Bandalag janfnaðarmanna (Vilmundar Gylfa) og þannig mætti áfram telja.

  Það er útilokað að fylgja Bubba eftir í pólitík.  Frá því ég kynntist honum fyrir 28 árum hefur hann skipt svo oft um skoðun á öllu sem snýr að pólitík,  jafnt sem músík og hverju sem er að hann er fyrir löngu síðan hættur að koma á óvart.  Jú,  að vísu kemur hann út af fyrir sig oft á óvart.  En hann er einhvernveginn alltaf samkvæmur sjálfum sér með því að vera opinskár um sínar kúvendingar.  Dæmi:  Gagnrýna einn dag lágkúru auglýsingamennsku og vera næsta dag syngjandi auglýsingu fyrir Hagkaup eða B&L. 

  Bubbi er bara Bubbi.  Kóngur sem auðvelt er að gagnrýna fyrir margt og líka kóngur sem kemur ekki lengur á óvart.  Hann hefur það oft sent frá sér "búmerang" sem hann hefur aftur fengið í hausinn.  Hann er bæði ófyrirsjánlegur og líka ólíkindatól sem búast má við af öllu frá. 

[Ásgerður , 27.9.2008 kl. 08:47]

Bubbi er Kóngurinn, það þarf ekki að ræða það frekar

Og það má skipta um skoðun, það sýnir bara að fólk hefur þroska. Og skoðunin breytist með þroskanum.

[H.T. Bjarnason (IP-tala skráð) 27.9.2008 kl. 15:17]

Bubbi var fínn með Utangarðsmönnum.  Eftir það hef ég ekki nennt að hlusta á hann.

[Eiríkur Sjóberg, 27.9.2008 kl. 23:39]

Góð grein hjá þér (að vanda!).

 Þar sem Bubbi hefur selt efni sitt í "bílförmum," verður hann náttúrulega að kallast raunverulegur kóngur.  Allir (á Íslandi) þekkja hann, og margir raula lög hans.

 Þetta með "Stál og hnífur" er mjög athyglisvert.  Ég hef sjálfur dálæti á þessu lagi.  Mig grunar að það sé vegna hljómanna og tónhæðarinnar.  Ég hef sungið þetta og spilað á gítar í Kanada, Amsterdam, Mexikó og á Íslandi.  Ég mun gera það áfram utan lands, hvar sem fleiri en einn Íslendingur koma saman!

 En ég er aftur á móti sammála þeirri gagnrýni er birtist í einhverju blaðinu fyrir skömmu, að textinn í laginu er sérkennilegur og jafnvel óskiljanlegur.  Setningarnar bera með sér merkingu hver fyrir sig, en virðast ekki eiga erindi við aðrar setningar textans.....

 En, samt, eins og áður segir, hefur þetta lag Bubba gripið mig einhverju seyðmagni - svo ég spila það með þjóðarstolti utan lands.....