Frábær frammistaða hjá Davíð í Kastljósinu

Mér fannst Davíð Oddsson, seðlabankastjóri, standa sig mjög vel í Kastljósviðtalinu í kvöld. Hann talaði af yfirvegun og yfirsýn til þjóðarinnar og það á því mannamáli sem hefur skort í umræðunni. Mér fannst hann standa sig sérstaklega vel í því að skýra betur út hver staðan sé í raun eftir þessa svörtu daga þjóðarinnar, betur en margir aðrir.

Mér fannst mikilvægustu skilaboðin vera þau að ekki kæmi til greina að setja þjóðarbúið á hausinn fyrir "kláru" bissness-gæjana með því að yfirtaka erlendar skuldir áhættufíklanna heldur ætti að verja almenning í þessu landi. Margir eiga um sárt að binda vegna fjárhættubrasks þeirra sem treyst var fyrir miklu. Ég held að fjöldi fólks hafi séð stöðuna í nýju ljósi eftir þetta viðtal við Davíð. Engin tæpitunga töluð.

Davíð situr uppi með ábyrgðina á því hinsvegar að hafa veitt frelsið til útrásarvíkinganna. Ábyrgðin er þó fjarri því öll hans, mun heldur þeirra sem misnotuðu frelsið og fóru illa með það.  Að þessu leyti er áróðursmaskínan gegn Davíð búin að vera. Enda hefur Davíð varað við þessu árum saman, en fáir hafa hlustað á varnaðarorð hans. Ég finn það vel eftir þáttinn að margir hugsa nú sitt ráð og er það vel.

Davíð á því hrós skilið fyrir sína frammistöðu í kvöld. Nú þarf að tala á mannamáli um útrásarvíkingana og það hvernig þeir hafa komið þessari þjóð á kaldan klakann. En þeir eiga nú að sitja uppi með sitt brask og taka skellinn. Sem betur fer varð það ekki niðurstaðan að þjóðin þyrfti að sitja uppi með þann SvartaPétur í stöðunni.

Ríkið borgi ekki skuldir óreiðumanna

Athugasemdir

[ingo skulason (IP-tala skráð) 7.10.2008 kl. 22:21]

Komdu sæll Stefán. Það er með Davíð hann talar manna mál  Ég hef verið að velta því fyrir mér af hverju. Ólafur Ragnar er í felum núna.Hann hefur verið að dásama þetta svokallaða útrásar lið. Hann kom að vísu í sjónvarp fyrir nokkrum dögum og sagði að við skildun líta fram á við ekki í baksynis  speglinn. Kannski hefur hann verið að hugsa ef þið lítið til baka þá getið þið séð mig

[Óttar Felix Hauksson, 7.10.2008 kl. 22:25]

Ég tek undir þetta Stefán. Það var frábært að sjá og heyra Davíð enn einu sinni sýna þjóð sinni hvern mann hann hefur að geyma. Hvernig hann af yfirvegun og festu mætir erfiðum málum og af innsæi greinir kjarna vandamálanna. Þrátt fyrir að einhverjir hafi farið offari í því umhverfi sem Davíð og samverkamenn hanns skópu með frelshugsjónir sínar að vopni, þá veit Davíð að frelsinu verður ekki um kennt hvernig komið er. Hann stendur keikur með íslenkri alþýðu, atvinnulífi og framtíð þessa lands. Ást hans á landi og þjóð ættu öllum að vera ljós. Íslandssagan á eftir að setja hann á stall með bestu sonum þjóðarinnar, sem réð heilt og hélt ró sinni í hamförum lausafjárvandans og heimskreppunar sem skekur þjóðina og heim allan nú í lok fyrsta tugs nýrrar aldar. Ég fann rósemi fylla hjartað við orð Davíðs.

[Ívar Pálsson, 7.10.2008 kl. 22:40]

Já, þetta var flott „come-back“ hjá Davíð, með öll svör á reiðum höndum og karakterinn geislaði. Frábær frammistaða.

Slæmt að hann skuli hafa bitið þetta í sig með að hækka alltaf stýrivextina. Annars hefði bankaútrásin takmarkast af sjálfri sér.

[Brynjar Jóhannsson, 7.10.2008 kl. 23:04]

Ég er engin hægri maður...

En ég verð að segja að ég er virkilega hreikin af Davíði og eins og ég skil þetta eru góðar líkur á að við erum hólpin (þá á ég við venjulegt heiðanlegt fólk)

.... En samt þykir mér það merkilegt sem Ívar Pálsson segir...

Slæmt að hann skuli hafa bitið þetta í sig með að hækka alltaf stýrivextina. Annars hefði bankaútrásin takmarkast af sjálfri sér.

kannski voru aðrar leiðir áður en gripið var til þessara ráða..

En það er annað mál.

Mér er virkilega létt að heyra að þeir sökkvi í skuldasúpuna sem efndu til hennar en ekki við hin. Það er aðalmálið.  

[Sigurður Þórðarson, 7.10.2008 kl. 23:31]

Sammála Davíð brilleraði. Það er enginn betri en Davíð þegar hann fer á kostum í drottningarviðtölum. Þá nær hann að koma fram sem maður fólksins.  Hann hefur engu gleymt og virkar í raun skarpari en undir það síðasta meðan hann var atvinnupólitíkus. Mig grunar að þetta liggi að hluta  í því  hversu auðvelt hann á  með að skýra mál sitt. Þeir sem sækja hart að Davíð mættu passa sig því hann gæti auðveldlega átt  endurkomu í pólitík. Eitthvað sem enginn annar myndi leika eftir.

[Haraldur Magnússon (IP-tala skráð) 7.10.2008 kl. 23:31]

Tek heilhugar undir með þér. þetta var þarft viðtal til að skíra út fyrir þjóðinni hvað sé verið að gera svo skilmerkilega sem hann gerð það. Nú skilur maður betur hvað var að gerast og hvað hefði getað gers. Enn og aftur sýnir hann hvers hann er megnugur að taka erfiðar ákvarðanir þó óvinsælar séu hjá einhverjum, hvar kemur einkavinavæðingin fram í þessum aðgerðum, kaupþing hefur ekki alltaf verið uppá pallborði hjá honum. Davíð er einn mesti foringi og stjórnmálamaður sem þjóðin hefur átt, það mun sannast í árann rás

[Eyþór Laxdal Arnalds, 7.10.2008 kl. 23:50]

Sammála Stefán. Davíð er yfirburðamaður. Hann er okkar Churchill.

[Stefanía, 8.10.2008 kl. 01:20]

Íslendingar hljóta nú að fara að greina kjarnan frá hisminu !!! Annars er ótrúlegt hvað sumir eru glærir og trúir DV.

[Eva Karlsdóttir, 8.10.2008 kl. 01:40]

Ber þá Davíð enga ábyrgð sem seðlabankastjóri?

Er ekki seðlabankinn "banki bankanna"?

Hvað með þessar staðhæfingar um 12föld útgjöld ríkisins í formi skuldsetninga bankanna, sem við öll líðum fyrir?

Hver átti að vera á vaktinni?

Var það FME?

Hver stjórnar FME?

[Aron P. (IP-tala skráð) 8.10.2008 kl. 04:18]

Hver horfir a horfmennina - who watches the watchmen?

[Frimann Benediktsson (IP-tala skráð) 8.10.2008 kl. 08:39]

Er Davíð okkar Churchill? Er þér sjálfrátt? Hvenig finnur þú út þá samlíkingu? Stríðið er því miður ekki búið? Það er rétt að byrja og engin leið að segja hvernig það fer. Eigum við ekki að bíða aðeins með hallelúja sönginn?

Var Davíð svona frábær? Hann var í það minnsta hálf sauðslegur þegar hann var spurður um rússalánið og gönuhlaupið þar. Hann kom náttúrulega fram sem frelsari og veifaði krónunni í kringum sig eins og það væri vegna hennar að við gætum komist út úr vandanum.  Hvaða misskilningur var þetta svo með festingu á genginu? Hver misskildi hvern? Davíð segir að hann hafi varað árum saman við að bankarnir voru að fara of geyst, þar á meðal við ríkisstjórnina og svo bankana sjálfa. Ef hann sem brunaliðsstjóri (svo ég noti samlíkingu hans sjáfs) gerði sér grein fyrir að svo mikill eldsmatur var að safnast fyrir, af hverju gerði seðlabankinn engar ráðstafanir. Af hverju var bindiskyldan ekki sett á? Af hverju hlustaði enginn á Davíð? Hvaða rugl er þetta í manninum? Og Davíð sá þá niðurstöðu fyrir sem nú er í dag fyrir 12 - 14 mánuðum og lísti fyrir ónefndum bankastjóra. Eruð þið í alvöru að segja að ykkur finnist Davíð hafa komist vel frá þessu? Hann sá þetta allt fyrir og lét svo allt fuðra upp. Hann gerði ekki baun. Ef lýsingin er rétt hjá Davíð þá brást hann og ríkistjórnin skyldum sínum. Trúum við því? Davíð segir það.

[Benedikt Sigurðarson, 8.10.2008 kl. 08:55]

Mikil er trú þín Stefán.

Hver einkavinavæddi bankana og skapaði þann ramma sem græðgin nýtti sér?  Hver lagði grunn að fljótandi gengi ISK - - og hver bauð spákaupmenn velkomna í vaxtamunarviðskiptin?

Hver var það sem stýrði því að eftirlitsstofnanir beittu ekki tækjum og skilmálum til að takmarka þensluna og yfirskot rammalausra græðsgisbanka . . . . ?

Hver var það svo sem setti dómínóið af stað - - í geðshræringunni um síðustu helgi?

Þið eruð ekki með öllum mjalla félagarnir - - að reyna enn að réttlæta gerðir og málflutning þessa manns.

[Árni Davíðsson (IP-tala skráð) 8.10.2008 kl. 11:46]

Strákar!

Þið eruð að tala um manninn sem var formaður stærsta stjórnmálaflokks landsins í ca. 16 ár, forsætisráðherra í ca. 12 og síðan seðlabankastjóri. Ber hann enga ábyrgð á því hvernig komið er? Eruð þið ekki með öllum mjalla?

Hafði hann engin tök á því öll þessi ár að koma böndum á vitleysuna og setja almenn lög um starfsemi banka og fjármálastofnana. Lög sem hefðu gilt jafnt um alla landsmenn og hefðu líka fært eftirlitsstofnum eins og Fjármálaeftirliti, Samkeppnisstofnun og Seðlabanka heimildir til að koma í veg fyrir að svona færi. Jú hann er sá maður á landinu sem hafði best tækifæri til þess undanfarin ár. Hversvegna gerði hann það ekki ef hann sá reyk í hverju horni?

Því miður. Davíð Oddson er einn ábyrgðarlausasti maður sem Ísland hefur borið ógæfu til að hafa haft sem forustumann í stjórnmálum. Þeir eru reyndar margir, ábyrgðarlausu stjórnmálamennirnir en flestir hafa haft lítil tök á að valda slíkum usla sem Davíð með aðgerðarleysi sínu einfaldlega vegna þess að þeir eru áhrifalausir. Halldór Ásgrímsson, Geir Haarde og Árni Magnússon voru því miður ekki áhrifalausir með Dabba meðan þjóðarskútan sigldi fram á hengiflugið.

Davíð gaf í skyn að allt yrði í lukkunnar velstandi eftir að þetta væri yfirstaðið en hann nefndi það auðvitað ekki að erlendar skuldir ríkissjóðs munu hlaupa á hundruðum milljarða eða á annað þúsund milljarða þegar öll kurl verða komin til grafar. Það gæti farið svo að þetta ævintýri muni kosta okkur ca. 10 Kárahnjúkavirkjanir fyrir ekki neitt í staðinn. Peningar sem ég og börnin mín þurfum að borga vegna þess að menn eins og þið kusuð yfir okkur þessa ábyrgðarlausu stjórnmálamenn.

Já ég veit að útrásarguttar misnotuðu frelsið en hversvegna gerðu þeir það? Vegna þess að þeim var það kleift vegna lagalegs tómarúms og vegna þess að stjórnarstefna ríkistjórnar Sjálfstæðis- og Framsóknarflokks ýtti undir algjöra óráðsíu. Þegar allt ætlaði um koll að keyra vegna þenslu skvetti ríkistjórnin olíu á eldinn til að allt færi örugglega úr böndunum. Það tókst að halda aftur af verðbólgunni með ævintýralegri skuldsetningu þjóðarinnar og innstreymi erlends gjaldeyris þess vegna.

Því miður sýnist mér á ykkar ummælum eftir viðtalið við Davíð í Kastljósinu að þið hafið ekkert lært af þessu og að þjóðin verði dæmd til að endurtaka mistökin þegar næsta flipp rennur upp. Blindni ykkar á foringjann er fáránleg.

Með kveðju

[Þorsteinn Egilson, 8.10.2008 kl. 13:53]

Þeim sem hér ramba inn en hafa ekki lesið greiningu Árna Snævarr á þessu makalausa viðtali bendi ég á bloggfærzlu Árna á Eyjunni.

Já, mikil getur trúgirnin verið.

[Arnar (IP-tala skráð) 9.10.2008 kl. 11:01]

Davíð stóð sig með príði í Kastljósinu en auðvitað er það hann sem hóf þetta þó svo það er ekki hægt að kenna honum alfarið um þetta. Hann ákvað að leyfa einkavæðinguna en ekki hægt að kenna honum vegna mistaka annara að hafa misst sig í kaupæði um allan heim. Það átti auðvitað að setja skýr lög varðandi fjárfestingarheimildir osf. þegar þessu var hent í framkvæmd.

Þú átt bíl, ákveður að lána vini þínum hann. Vinur þinn klessir bílinn og er það því á hans ábyrgð. Ekki eiganda bílsins.