Svandís fer fram gegn Katrínu og Kolbrúnu

Mér finnst það merkileg ákvörðun hjá Svandísi Svavarsdóttur, borgarfulltrúa, að fara í landsmálin á þessum tímapunkti enda er hún þar með að fara fram gegn ráðherrunum Katrínu Jakobsdóttur og Kolbrúnu Halldórsdóttur, sem báðar hafa mjög nýlega tekið sæti í ríkisstjórn, auk þess sem Katrín er auðvitað varaformaður VG. Flestir höfðu talið að hún færi fram í Norðvesturkjördæmi þar sem líklegt er að Jón Bjarnason dragi sig í hlé. Ákvörðun Svandísar hleypir því spennu í forval VG í Reykjavík.

Varla verður pláss fyrir allar þessar konur samkvæmt kynjakvótum í forystusætunum, séu þeir við lýði sem hlýtur að vera í flokki á borð við VG sem hefur talað mjög fyrir slíkum mörkum til að tryggja jafna aðkomu beggja kynja. Annars þarf svosem enginn að vera hissa á því að Svandís krefjist forystuhlutverks hjá VG á landsvísu. Talað hefur verið um hana sem leiðtogaefni í landsmálum alveg síðan hún varð foringi VG í borgarmálunum.

Mikið hefur verið rætt um að Steingrímur J. hætti í landsmálum á næstu árum, enda setið mjög lengi á þingi, 26 ár, og aðeins Jóhanna Sigurðardóttir, forsætisráðherra, verið þar lengur. Framboð Svandísar hlýtur því að teljast yfirlýsing um að hún ætli sér að taka við VG af Steingrími fyrr en síðar.

Svandís stefnir á 1. sætið í Reykjavík

Athugasemdir

[Sigurður Hrellir, 17.2.2009 kl. 15:21]

Segir það ekki sitt hvað mikið úrval kvenna er í forystusveit VG á höfuðborgarsvæðinu? Svandís, Katrín, Kolbrún, Álfheiður, Guðfríður Lilja...

Ég held að þú þurfir nú frekar að hafa áhyggjur af kvenkyns frambjóðendum á listum Sjálfstæðisflokksins en VG, er það ekki Stefán?

[Finnur Bárðarson, 17.2.2009 kl. 18:18]

Mér líst illa á þetta framboð Svandísar það verður ekki VG til framdráttar. Ekki svo að þetta komi mér nokkuð við enda óflokksbundinn með öllu

[Aldís Gunnarsdóttir, 17.2.2009 kl. 18:34]

enn og aftur afar biturt blogg....hvar eru sjalla-konurnar segi ég nú bara??

[Stefán Friðrik Stefánsson, 17.2.2009 kl. 20:44]

Þakka kommentin.

Ég vil nú bara minna ykkur á að Sjálfstæðisflokkurinn er eini flokkur landsins sem á konu á þingi í öllum kjördæmum landsins. Samfylkingin hefur enga konu á þingi í Norðvestur-, Suður- og Norðausturkjördæmi og VG hefur enga konu á þingi í Suðvestur-, Norðvestur- og Suðurkjördæmi. Framsókn hefur svo enga konu á þingi í Norðvesturkjördæmi en á svo engan þingmann reyndar í Reykjavík. Svo því sé til haga haldið.

[Óðinn Þórisson, 17.2.2009 kl. 20:53]

Skiptir það virkilega máli hvort þessi eða hinn komminn bjóði sig fram. Aðalmálið er að eins fáir af þessu afturhaldsfólki komist að á alþingi Íslendinga - því færri því betra.

[Einar Áskelsson (IP-tala skráð) 17.2.2009 kl. 23:41]

Svandís er að mínu mati afksaplega áhugaverður stjórnmálamaður, hefur sýnt það með sínum störfum í Borginni. En landsmálin eru allt annar vettvangur og þar reynir á skapgerð hennar fyrst og fremst. Konur gætu orðið konum verstar þegar á reynir. En hún er tvímælalaust framtíðar leiðtogi VG. Því miður er hún í þeim flokki. Veit ekki af hverju.

[Gísli Baldvinsson (IP-tala skráð) 18.2.2009 kl. 08:58]

Þörf upprifjun á konumálunum Stebbi!

[Héðinn Björnsson, 18.2.2009 kl. 09:20]

Það eru ríflega 20 þingsæti í Reykjavíkurkjördæmunum og því ekkert til fyrirstöðu að koma þessum konum öllum á þing gegnum VG í Reykjavík ef vel gengur í kosningum.

[Smári Jökull Jónsson, 18.2.2009 kl. 09:48]

Hjá Samfylkingu eru 6 af 18 þingmönnum konur sem gera 33%

9 af 25 þingmönnum Sjálfstæðisflokks eru konur (voru 8 af 25 eftir kosningar), 36%

Hjá VG eru 4 af 9 þingmönnum konur, 44%

Hjá Framsókn eru 4 af 7 þingmönnum konur (var 2 af 7 eftir kosningar), 57%

Hjá Frjálslyndum er engin kona þingmaður.

Af þessum tölum er ljóst að þó svo að Sjálfstæðisflokkurinn hafi þingkonu í öllum kjördæmum, sem er gott út frá kynjasjónarmiðum, þá standa VG og Framsókn ykkur framar hvað varðar hlutfall kvenna í þingflokknum. Miðað við stærð Sjálfstæðisflokksins, væri mjög óeðlilegt ef ekki væri þingkona í öllum kjördæmum. Framsókn og VG eru auðvitað með mun færri þingmenn og því ekki hægt að bera þetta saman eins og þú gerir Stefán.

Samfylkingin þarf augljóslega að hvetja konur á landsbyggðinni enn frekar til að bjóða sig fram þar sem allir þingmenn landsbyggðarinnar eru karlar.

[PEX (IP-tala skráð) 18.2.2009 kl. 10:45]

Svandís er í hópi flottustu stjórnmálamanna þjóðarinnar og ég gleðst heilshugar yfir framboði hennar - þrátt fyrir að tilheyra ekki VG.

Virðing almennings fyrir hinu háa Alþingi hefur dvínað mjög undanfarna mánuði og nú liggur á að koma orðræðunni þar á bæ upp úr forinni.

Fáa veit ég betri til að legga þar hönd á plóg en Svandísi Svavarsdóttir.

[Róbert Trausti Árnason (IP-tala skráð) 18.2.2009 kl. 11:59]

Aukist hafa heldur vandræðin, hornkerlingar!