Umdeild sérfræðiaðstoð Guðlaugs Þórs

Ég er ekki undrandi á því að sérfræðiaðstoð Guðlaugs Þórs Þórðarsonar sé umdeild. Mér finnst það einum of að eyða 24 milljónum króna á vel innan við tveimur árum í slík verkefni og tel að slíkt muni ekki mælast vel fyrir sérstaklega á þessum tímum, eiginlega allt að því óverjandi, sama hver ráðgjöfin er. Verst af öllu er að sjá pr-ráðgjöf í þessum pakka og varla við því að búast að slíkt veki kátínu almennings á meðan skorið er víðtækt niður í heilbrigðisgeiranum.

Spyrja má sig hvort þessar uppljóstranir andstæðinga Guðlaugs Þórs muni skaða stöðu hans innan Sjálfstæðisflokksins. Varla mun það styrkja hann í það minnsta. Ég held að þetta verði honum skeinuhætt en hlýtur um leið að velta á því hvernig pressan tekur á því.

Athugasemdir

[Bergljót Aðalsteinsdóttir, 24.2.2009 kl. 01:17]

'eg er bæði undrandi og reið yfir þessum upplýsingum það er nokkuð ljóst að mönnum sem fara svona með fjármuni okkar almennings er ekki treystandi ég held að almenningur sé orðin miklu meðvitaðri um svona mál og muni ekki kjósa svona menn á þing í vor.

[Júlíus Valsson, 24.2.2009 kl. 08:33]

Nú þarf að skoða önnur ráðuneyti til samanburðar áður en menn fordæma Guðlaug Þór.

[Carl Jóhann Granz, 24.2.2009 kl. 08:36]

Það er bara verið að reyna að veikja hans persónu.

Mér er mjög til efs að þetta mál sé eitthvað óeðlilegt.

Bjarni Benediktsson orðaði þetta vel á fundi í gærkvöldi.
Það verður að setja þetta í samhengi við stærð ráðuneytisins. Þar erum við að tala um 120 milljarða.

Guðlaugur gerði góða hluti í þessu ráðuneyti fyrir sjálfstæðisflokkinn og sjálfsagt sá eini heilbrigðisráðherra sem gerði hluti skynsamlegra en nokkurntímann áður.

[Sigurður Viktor Úlfarsson, 24.2.2009 kl. 11:53]

Þetta er nú meiri bull umræðan. 

24 milljónir á nokkurn veginn jafn mörgum mánuðum er ekki há upphæð í svona stóru ráðuneyti.  Guðlaugur sagði sjálfur að mikið af lykilstarfsfólki ráðuneytisins hefði verið í veikindaleyfum, fæðingarorlofum og námsleyfum á þessu tímabili og því verið skortur á tiltekinni þekkingu innan ráðuneytisins.

Sérfræðingur með um 500 þúsund á mánuði er með 6 milljónir í árslaun.  Við það bætast 20% í launatengd gjöld (1,2 milljónir).  Samtals kostnaður pr. starfsmann er því 7,2 milljónir í beinan launakostnað.  Við það bætist kostnaður vegna starfsaðstöðu (pláss í húsnæði, skrifborð, stóll, hillur o.þ.h.), kostnaður vegna símanotkunar, kostnaður vegna tölvu, búnaðar o.þ.h.  Hugsanlega aksturskostnaður ef starfsmaðurinn er á ferðinni fyrir hönd ráðuneytisins.  Það er því varlega áætlað að þessi starfsmaður kosti um 8 milljónir á ári.  Á tveimur árum eru þetta því varla undir 15 milljónum.

Það hefði engum þótt merkilegt þótt ráðuneytið hefði ráðið í eitt og hálft stöðugildi á tveimur árum.

Vegna laga um opinbera starfsmenn sem gera ekki ráð fyrir því að hægt sé að segja starfsmönnum upp nema þeir gerist brotlegir í starfi, leitar ríkið meira í sveigjanlegra vinnuafl s.s. verktaka, ráðgjafa o.þ.h.  Þetta er vinnuafl sem kemur inn í verkefni og fer aftur þegar þeim er lokið.  Þessir ráðgjafar eru nefnilega ekki endilega ennþá á spenanum en hefði þessi eini og hálfi starfsmaður verið ráðinn þá væri hann ennþá að skapa kostnað enda illmögulegt að segja honum upp.  Kostnaðurinn yrði því mun hærri þegar upp væri staðið.

Ég er enginn sérstakur stuðningsmaður Guðlaugs en þessi umræða er algjört bull frá upphafi til enda.

[Jón Snæbjörnsson, 24.2.2009 kl. 13:21]

sárt til þess að vita að starfsmenn ráðuneytisisns séu svona gjörsamlega vindlausir að ráða þurfi sérfræðinga fyrir sérfræðingana