Mikilvægt að flokksmenn fái valkosti í forystuna

Óðum styttist í landsfund Sjálfstæðisflokksins. Þar verður kjörinn nýr formaður Sjálfstæðisflokksins og í aðrar trúnaðarstöður. Flest bendir til þess að Bjarni Benediktsson verði næsti formaður flokksins. Mér finnst mikilvægt að flokksmenn fái val um hver skipi forystusætin, gildir þetta því jafnt um formannsstöðuna og varaformannsstöðuna. Mér finnst það ekki sjálfgefið eftir átök síðustu mánaða að Þorgerður Katrín Gunnarsdóttir verði ein í framboði til varaformennsku. Hún verður að vinna fyrir sinni stöðu áfram og hefur gott af því að taka slag um hana að nýju.

Í raun eru allir fundarmenn þó í framboði og flokksmenn geta skrifað hvaða nafn sem þeir vilja á atkvæðaseðilinn. Hinsvegar hefur jafnan verið svo að menn gefa upp formlega framboð sín og eðlilega hafa fleiri áhuga á að skipa þau sæti en Bjarni og Þorgerður. Sjálfur tel ég að Bjarni eigi að verða næsti formaður Sjálfstæðisflokksins og hef lýst yfir stuðningi við hann. Hinsvegar finnst mér ekki óeðlilegt að einhver annar hafi áhuga á því að taka við formannsembættinu þegar Geir H. Haarde hættir í stjórnmálum.

Ekki hefur verið tekist á um formennskuna síðan Davíð Oddsson felldi Þorstein Pálsson fyrir átján árum, en síðast var kosið um varaformennskuna í spennandi kosningu fyrir fjórum árum þegar Þorgerður Katrín sigraði Kristján Þór. Ekkert á að vera sjálfgefið í þessum forystumálum. Þessi landsfundur á að vera vettvangur uppgjörs. Þeir sem sigra hljóti nýtt umboð og ef aðrir vilja sækjast eftir þeim embættum eiga þeir að bjóða sig fram og reyna á styrkleika sinn og hvar þeir standa.

Kristján Þór íhugar framboð

Athugasemdir

[Óðinn Þórisson, 18.3.2009 kl. 18:05]

Auðvitað eiga menn eins og Illugi og Kristján Þór að gefa kost á sér í varaformansslaginn - Þorgerður á ekki að fá þetta á silfurfati.

[Carl Jóhann Granz, 18.3.2009 kl. 20:36]

Algerlega er ég sammála þér þarna. Það vantar fleiri góða menn í framboð.