Steingrímur J. dissar Evrópuvegferð Samfó

Enginn vafi leikur á því að Steingrímur J. Sigfússon dissaði Samfylkinguna og einhliða Evrópuvegferð hennar með því að tala um elítuumræðu um ESB í íslenskum fjölmiðlum í leiðtogaumræðunum í kvöld. Enda var Jóhanna Sigurðardóttir ekki glaðleg á svip þegar ferðafélagi hennar í óvissuferðinni til vinstri var farinn að efast um fararstjórn sína og hvort hún væri rétti aðilinn til að vera með landakortið í höndunum í leiðangrinum.

Enda lagði Jóhanna lykkju á leið sína í þættinum til að setja ofan í við Steingrím, þó undir kratarós væri. Þetta var svolítið kómískt hjónarifrildi fyrir framan gestina. Mikið innilega verður það nú áhugavert að sjá hversu heilsteypt hjónabandssælan verður. Hvort hún þolir umræðuna um hvort kaupa eigi farmiða til Brussel eða fara hringinn í kringum landið til að tala við þjóðina og bjarga henni frá öðru mögulegu efnahagshruni.

Ég tek reyndar undir þessar pælingar Steingríms. Umræðan hefur verið mjög einhliða um Evrópumálin. Einhliða dýrkun á vegferðinni til Brussel sem einu leiðinni til bjargar þjóðinni er orðin ansi þreytt og lánlaus.

Steingrímur má eiga það að hann er djarfur og þorir að sparka frá sér þegar hann telur sig vera í varnarstellingu gagnvart maddömmunni á heimilinu og liðinu hennar sem vill teyma hann í ferðalag gegn vilja sínum.

Elítan vill í ESB

Athugasemdir

[Stefanía, 27.4.2009 kl. 01:30]

Ég er ekki oft sammála Steingrími, en, þetta er bara nákvæmlega staðreyndin, fjölmiðlar af hvaða toga sem er, virðast vera ESB sinnaðir, allir sem einn. Það kann ekki góðri lukku að stýra  og er skoðanamyndandi svo ekki sé meira sagt.