Peter Boyle látinn

Jæja, þá er hörkutólið og leikarinn Peter Boyle fallinn frá, 71 árs að aldri. Hann átti að baki litríka ævi og stórbrotinn leikferil, sem markaðist af ólíkum og fjölbreyttum hlutverkum. Mín kynslóð og þær yngri munu sjálfsagt minnast hans helst sem fjölskylduföðurins Frank Barone í Everybody Loves Raymond. Svo mikið er nú víst að stórleikur hans og hinnar stórbrotnu Doris Roberts í hlutverkum Barone-hjónanna settu svip sinn á þáttinn allt þar til yfir lauk. Það var reyndar kaldhæðnislegt að hann fékk aldrei Emmy fyrir að leika Barone, en tilnefndur sjö sinnum.

Persónulega fannst mér hann bestur í sínu fyrsta stjörnuhlutverki, sem skrímslið í eðalmynd Mel Brooks Young Frankenstein. Það er stórfengleg kvikmynd sem ég passa mig á að sjá reglulega, enda með betri myndum Brooks, sem ég hef alltaf haft virkilegt dálæti á. Húmor hans og myndir hitta alltaf í mark. The Young Frankenstein hefði ekki orðið nema svipur hjá sjón án Boyle og svo auðvitað Gene Wilder og Marty Feldman sem áttu þar ekki síðri stórleik. Hans fyrsta var reyndar Joe árið 1970 og hún er enn í dag mjög góð.

Peter Boyle átti svo auðvitað stjörnuleik í kvikmyndinni The Candidate árið 1972, en þar lék hann Marvin Lucas, kosningastjóra forsetaframbjóðandans Bill McKay (sem leikinn var af Robert Redford). Rock solid eðalmynd sem vert er að mæla með og þeir sem hafa áhuga á pólitískum fléttum og pælingum verða svo sannarlega að sjá hana. Ekki má svo gleyma tímamótamyndinni Taxi Driver frá árinu 1976 en þar lék Boyle leigubílstjóra og félaga Travis Bickle (meistaraleg túlkun hjá Robert De Niro). Það verður enginn kvikmyndaáhugamaður að fullu fyrr en hann hefur sest niður og horft á þá snilld sem Taxi Driver er.

Ekki má gleyma Johnny Dangerously, einni af þessum gamanmyndum sem allir verða að sjá, en þar fór Boyle á kostum sem gengisforinginn svipmikli Jocko Dundee. Í Malcolm X (sögu blökkumannaleiðtogans sem var myrtur árið 1965 en í myndinni túlkaður stórfenglega af Denzel Washington) lék hann lítið en eftirminnilegt hlutverk kapteins Green. Hann var svo auðvitað réttur maður á réttum stað í The Santa Clause árið 1994 sem Herra Whittle. Ox Callaghan gleymist engum í túlkun Boyle sem séð hafa While You Were Sleeping og Boyle var flottur sem Buck Grotowski í Monster´s Ball. Svona mætti lengi telja er litið er yfir feril hans.

Síðast en ekki síst verður að telja upp túlkun hans á Clyde Bruckman, sem setti svip sinn á hina frábæru sjónvarpsþætti The X-Files, en Boyle fékk Emmy fyrir þá túlkun sína. Peter Boyle kvæntist Loraine Alterman árið 1977. Hún var blaðamaður á tónlistartímaritinu Rolling Stone er þau kynntust. Í gegnum hana kynntist Boyle hjónunum Yoko Ono og John Lennon. Lennon varð svaramaður Boyles í brúðkaupi hans og Alterman árið 1977 og vinskapur þeirra var mjög mikill, allt þar til yfir lauk, en 26 ár eru nú liðin frá því að Lennon var myrtur í New York. Boyle og Alterman áttu tvær dætur.

Boyle var mjög heilsulaus í seinni tíð. Hann fékk heilablóðfall árið 1990 og missti þá málið í nokkra mánuði. Hann byggði sig upp í að leika aftur. Árið 1999, við tökur á Everybody Loves Raymond, fékk hann hjartaáfall en hélt aftur til starfa við þættina eftir stutta sjúkrahúslegu. Nýlega greindist Boyle með beinmergskrabbamein en hann lék allt fram í andlátið.

Leikarinn Peter Boyle látinn

Athugasemdir

[Jón Agnar Ólason, 13.12.2006 kl. 22:31]

RIP - hápunkturinn var hlutverk hans sem Wizard í Taxi Driver, engin spurning. "Hey Travis, viltu kaupa keramikflís sem var í baðherbergi Errol Flynn?! Kjarakaup!" Snilld.

7 sinnum tilnefndur og aldrei Emmy fyrir "Raymond". Svona fer þetta stundum; hvorki Kubrick né Hitchcock fengu Óskar sem besti leikstjóri meðan þeir stórmeistarar lifðu ... mikil synd. 

[Stefán Friðrik Stefánsson, 13.12.2006 kl. 23:04]

Heill og sæll

Já, Boyle var einstakur alveg. Mikil eftirsjá af honum. Einn af þessum gömlu og góðu leikurum með svipmikinn karakter. Hann var rosalega flottur í Taxi Driver, svo sannarlega ógleymanleg mynd og á alltaf vel við. Synd já að hann fékk ekki Emmy fyrir "Raymond". Mér fannst Boyle alltaf bestur í þeim þætti, alveg magnaður karakter sem hann lék, sem var einmitt algjör andstæða Boyles.

Það var mikil synd svo sannarlega að Hitch og Kubrick fengu aldrei leikstjóraóskarinn og auðvitað Altman líka, en hann er nýlega farinn yfir móðuna miklu, en þeir bættu svosem fyrir það spekingarnir í Hollywood með því að láta hann hafa heiðursóskarinn núna í febrúar.

mbk.