Dauði Saddams - þáttaskil við Persaflóa

Saddam Hussein var hengdur í nótt. Það er svona varla að maður trúi því enn að hann sé dauður og þessu skeiði í sögu Íraks sé virkilega lokið. Ég sannfærðist ekki endanlega um þau endalok fyrr en ég sá myndirnar frá aftökunni og af líki Saddams. Táknrænar og afgerandi myndir. Ótrúleg endalok fyrir mann af kalíberi Saddams.

Nokkrar myndir með frásögn gerir hana alltaf raunverulegri, eða svo sagði hinn goðsagnakenndi fréttahaukur Ben Bradlee á Washington Post. Þessar myndir virðast sýna hræddan og bugaðan mann á örlagastundu. Menn mega ekki gleyma að Saddam var yfirmaður hers og taldi sig alla tíð mann átaka. Það er til marks um það að hann afþakkaði svarta hettu um höfuð sér.

Það er alveg ljóst að algjör þáttaskil verða nú við dauða Saddams. Enn er maður að venjast þeirri tilhugsun að hann hafi verið líflátinn fyrir áramót. Beðið er viðbragða almennings í Írak við fregnunum og myndunum, sem eru miklu áhrifaríkari en fréttin sem slík. Það er enda eins og fyrr segir varla fyrr en maður sér myndirnar sem maður sannfærist endanlega um að þessum kafla er í raun lokið. Fróðlegast verður nú að sjá hvað verður gert við lík Saddams. Það eru deildar meiningar um það, sem varla kemur á óvart.

Það er enginn vafi á því að dauði Saddams og aftakan á þessum næstsíðasta degi ársins er frétt ársins 2006. Mikil tíðindi og örlagarík, svo ekki sé fastar að orði kveðið.

Saddam neitaði að láta draga hettu yfir höfuð sé fyrir aftökuna

Athugasemdir

[Magnús Helgi Björgvinsson, 30.12.2006 kl. 13:07]

Og hvað tímabil hefst þá í staðin? Er ekki líklegt að meðal suníta verði hann álitin píslarvottur og hefnd fyrir dauða hans verði til þess að enn verra tímabil sé hafið sem eigi eftir að breiðast út. Morð skv. réttarhöldum sem voru skrípaleikur held ég sé aðeins vatn á eldinn þarna. Ég tel Saddam hefði orðið mun áhrifa meiri sem víti öðrum til varnaðar ef hann hefði verið látinn dúsa í fangelsi til dauða dags.

[Gummi H (IP-tala skráð) 30.12.2006 kl. 13:12]

Já, nú geta íbúar Íraks haldið áfram að dunda sér að murka lífið hvor úr öðrum í blóðugri borgarastyrjöld. Dauði Saddams mun væntanlega einungis kynda undir baráttuvilja Sunníta í þeirri styrjöld.

[GK, 30.12.2006 kl. 15:30]

Já, árið endar á dramatískum nótum. Ég er ekki talsmaður dauðarefsinga og hefði talið betra að geyma hann bak við lás og slá eða í ormagryfju til dauðadags.

[Addi (IP-tala skráð) 30.12.2006 kl. 16:45]

Stebbi segir :"Þessar myndir virðast sýna hræddan og bugaðan mann á örlagastundu. " Get ekki verið meira ósammála þér. Hann tekur dauða sínum með stillingu.