Áhugaverð stjórnmálaumræða í Kryddsíld

Venju samkvæmt var áhugavert að horfa á Kryddsíld á Stöð 2. Merkilegustu tíðindin í þættinum þetta árið var væntanlega að leiðtogar kaffibandalagsins eru ekki sammála um neitt. Hikstaði Steingrímur J. á því að lofa Ingibjörgu Sólrunu leiðtogasess í bandalaginu. Aðeins stóð eftir hálfvelgjutal um að reyna að mynda stjórn myndi sitjandi ríkisstjórn falla en ekkert annað liggur á borðinu greinilega. Stórtíðindi það.

Hef ég horft á Kryddsíldina allt frá því að Elín Hirst byrjaði með hana í denn á Stöð 2 á gamlársdag 1989, minnir mig allavega. Ávallt er þar áhugaverð og skemmtileg stjórnmálaumræða, enda formenn flokkanna að ræða hitamálin svo eftir er tekið. Oft hafa menn tekist hressilega á, minnast margir rimmu Davíðs Oddssonar og Össurar Skarphéðinssonar í Kryddsíld á gamlársdag 2002 um málefni Ingibjargar Sólrúnar Gísladóttur sem fór í varaþingmannsframboð eins og flestir muna eftir

Að þessu sinni var lífleg umræða, enda margt eftirminnilegt frá árinu. Rætt var um helstu hitamál ársins. Engum kom að óvörum að aftakan á Saddam Hussein, fyrrum forseta Íraks, var aðalumræðuefnið í byrjun þáttarins, enda vafalaust frétt ársins. Rætt var ennfremur um virkjunarmál, utanríkismál, endalok stjórnmálaferils Halldórs Ásgrímssonar, sem hætti sem forsætisráðherra á árinu og hélt til annarra verkefna, endalok varnarliðsins á Keflavíkurflugvelli og svona mætti lengi telja. Þetta var líflegt fréttaár og lifandi umræður um stöðu mála á áramótum.

Var lítið um átök svosem. Enn sér maður keim þess að Davíð og Össur eru horfnir á braut, en þeir settu jafnan mesta svipinn á þáttinn hin seinni ár, og svo er auðvitað Halldór farinn frá velli. Þau Geir, Jón og Ingibjörg Sólrún eru komin þess í stað sem veigamikill hluti þáttarins. Leiðtogarnir léku á alls oddi, enda léttar og ljúfar umræður, heilt yfir voru þetta nokkuð heilsteyptar og málefnalegar umræður.

Tíðindin voru hinsvegar hikstið á kaffibandalaginu sem er mjög gott fyrir okkur stuðningsmenn ríkisstjórnarinnar. Það virðist enginn grundvöllur vera undir lapþunnu kaffibandalagi stjórnarandstöðunnar, sem vekur athygli vissulega. Þetta var því áhugavert spjall, ómissandi fyrir sanna stjórnmálaáhugamenn og sýndu okkur vel hverjum er best treystandi fyrir stjórn landsins á nýju ári.

Athugasemdir

[Þorkell Gunnar (IP-tala skráð) 31.12.2006 kl. 17:39]

,,Ef ég væri þjálfari Fram og mundi kaupa Eið Smára Guðjohnsen og stilla honum svo upp 15 metrum fyrir aftan annað markið.  Hvað myndi ég græða á því ?"

Davíð 2002.  Eða það var einhvern veginn svona.  Aðeins of svöl lína! 

[Stefán Friðrik Stefánsson, 31.12.2006 kl. 18:45]

Nákvæmlega - alveg magnað moment. Á þetta á spólu og dró fram um daginn og naut algjörlega í botn að sjá þetta aftur. Davíð og Össur í toppformi og kaldhæðni Davíðs var þarna upp á sitt allra besta. :)

Óska þér annars gleðilegs árs, félagi. Sjáumst hressir á nýju ári.

mbk.