Fréttablaðið fikrar sig á áskrifendamarkaðinn

Ákvörðun eigenda Fréttablaðsins um að skerða dreifingu blaðsins á landsbyggðinni gefur til kynna að blaðið sé að fikra sig á áskrifendamarkaðinn - fyrstu merkin um að fríblað gangi ekki upp lengur. Grundvöllurinn sé ekki til staðar. Þarf svosem varla að koma að óvörum, allir vita að þetta er ekki beint blómlegur tími fyrir fjölmiðla.

Eins og árar þarf það ekki að koma á óvart. Í raun er það stórmerkilegt hvernig fríblað af þessu tagi hefur gengið þetta lengi án þess að gera miklar breytingar eða hreinlega að hafa haldist á floti mánuðum saman eftir kreppuna, þegar auglýsingatekjur hafa dregist stórlega saman.

Fréttablaðið hefur verið í forystusessi fyrst og fremst vegna þess að því er dreift um allt land og fólk fær það heim hvað sem gerist. Þeir tímar eru liðnir að fjölmiðlar geti gengið með þeim hætti að fólk fái þá ókeypis. Allar aðstæður kalla á nýja tíma.

Eflaust er þetta fyrsta merki þess að blaðið sé feigt... við sjáum hvað setur.

Fréttablaðið selt úti á landi

Athugasemdir

[Eiður Svanberg Guðnason, 8.10.2009 kl. 15:11]

Óskhyggju ykkar íhaldsmanna eru engin takmörk sett! Gaman að þessu.

[Ómar Ragnarsson, 8.10.2009 kl. 20:15]

Fréttablaðinu er ekki dreift um allt land. Eitt af því fyrsta sem stakk í augu þegar ég kom til Ólafsfjarðar s. l. laugardag að þar var ekkert Fréttablað að fá fremur en í öðrum dreifðum byggðum.

Hér í gamla daga voru þó flokksblöðin öll á boðstólum ef á annað borð var þar eitthvað blað að fá.

[Magnús Óskar Ingvarsson, 8.10.2009 kl. 22:37]

Fréttablaðið ... „því er dreift um allt land og fólk fær það heim hvað sem gerist.“

Þetta er nú ekki rétt. Það eru að mér skilst allmargir staðir á landinu sem fá alls ekki Fréttablaðið. Í mínum heimabæ hefur það að jafnaði legið frammi í verslunum en er ekki borið í hús. Ég spurði eftir blaðinu í einni verslun um daginn en var þá sagt að yfirleitt væru síðustu eintökin farin á morgnana áður en afgreiðslufólkið mætir til vinnu. Þeir árrisulu taka það bara úr pakkanum þar sem hann liggur fyrir utan verslunina. Hinir fá það ekki.

[Dagný (IP-tala skráð) 9.10.2009 kl. 09:03]

Ég hef ekki séð Fréttablaðið í meira en ár.  Því hefur aldrei verið dreift hér á mínu svæði, en lá lengi vel frammi í verslunum þar sem fólk gat tekið það með sér ef löngun var til.  Ég sef ágætleg þrátt fyrir skort á Fréttablaðinu.

[vigdís ágústsdóttir (IP-tala skráð) 9.10.2009 kl. 09:59]

Framtíðin er net-blað, sem ætti að vera almenningseign.  Vantar bara skynsamlega leið til þess...ég er viss um að blaðamenn munu koma þessu í framkvæmd, það er hluti að nýjum hugsunarhætti,  NÝJU ÍSLANDI..Og nú skulum við öll vera samhent, það er áríðandi núna........og styðja blaðið af heilum hug.   STÖNDUM SAMAN; ÞETTA ER STERK LEIÐ TIL ÞESS