Ísland skrapar botninn - Eyjólfur á að hætta

Íslenska landsliðið í knattspyrnu hefur nú fallið niður í 109. sæti á styrkleikalista FIFA. Aldrei hefur landsliðið okkar fallið neðar. Það skrapar botninn. Það er ekki beinlínis hægt að segja að þetta komi að óvörum. Liðið hefur spilað svo illa að undanförnu og er orðið svo illa farið að þetta eru engar stórfréttir í raun.

Það var með ólíkindum að sjá landsleikinn á milli Íslands og Svíþjóðar fyrir viku. Þar vorum við svo lélegir að við litum út eins og viðvaningar í knattspyrnunni. Leikurinn gegn Liechtenstein var sýnu verri, enda er það lið sem við áttum að vinna en okkur tókst ekki að leggja. Það eitt og sér er háðung fyrir okkur.

Það er augljós staðreynd að landsliðið hefur verið sífellt að slappast í þjálfaratíð Eyjólfs Sverrissonar. Hann hefur engum árangri náð með liðið eftir tæp tvö ár og ekki óeðlilegt að stór spurningamerki vofi yfir áframhaldandi þjálfaratíð hans og framtíðarsýnina sem hann er að færa liðinu. Þetta botnskrap er ólíðandi og á að leiða til uppstokkunar á liðinu. Það er fullreynt með þessa framtíðarsýn.

Ég er þeirrar skoðunar að þjálfarinn verði að hætta og fæ ekki séð að það sé hægt að veita honum fleiri tækifæri með liðið. Botnskrapið er orðið of áberandi til að veitt séu fleiri tækifæri.

Ísland í 109. sæti á FIFA listanum

Athugasemdir

[Einar Örn Ólafsson (IP-tala skráð) 13.6.2007 kl. 12:36]

Það er greinilegt að það er eitthvað stórkostlegt að hjá landsliðinu. Hvort það er algjörlega Eyjólfi að kenna eða samspil annara þátta þá þarf að breyta til.

Landsliðið hefur verið að spila undir getu síðan að harðjaxinn GT var þjálfari þess. Ég myndi vilja sjá erlendan þjálfara spreyta sig á þessu verkefni.

[Rúnar Birgir Gíslason, 13.6.2007 kl. 12:57]

Liggur vandinn allur hjá Jolla? Ég held ekki, leikmennirnir verða líka að taka til í eigin höfði. Spyrja sig hvort þeir vilji berjast fyrir íslensu þjóðina.

[Ólafur Björnsson, 13.6.2007 kl. 13:03]

Það er nú oft þannig að maður þarf að komast á botninn til að ná sér upp aftur. Vonandi getur leiðin ekki legið annað en upp á við eins og staðan er núna.

Annars finnst mér vandinn liggja í æfingaleikjaleysi. Þeir ná ekkert saman með því að spila stórleiki á nokkurra mánaða fresti.

Eyjólfur þarf að nota þessa leiki til að byggja liðið upp og prófa nýja leikmenn og það er því miður mjög erfitt og þar af leiðandi finnst mér erfitt að kenna honum um.

[Tómas Guðbjörn Þorgeirsson, 13.6.2007 kl. 15:04]

Held að Eyjólfur eigi nú ekki einn sök að máli...allt of margir hlutir sem koma að einu svona liði.  Samt fannst mér það, að velja hann sem þjálfara, skrýtin ákvörðun í ljósi reynsluleysis hans.  Hefur einhver spáð í að kannski eru leikmenn þessa liðs bara ekki betri en raun ber vitni og að efniviðurinn sé bara það slakur að sama hvaða þjálfari á í hlut þá verðum við ekkert betri en þetta...kannski í framtíðinni hver veit en ekki eins og liðið er skipað í dag. 

Menn eins og Eiður sem eiga að vera máttarstólpar landsliðsins virðast með öllu áhugalausir og gjörsamlega sneyddir öllum vilja til að berjast fyrir liðið, rífa það upp.  Fáum frekar unga graða leikmenn til að byggja á og gefum hinum frí til að leika sér fyrir þessi sky high laun sem þeir eru með...

[Óðinn Þórisson, 13.6.2007 kl. 18:53]

Ég spyr hversvegna er t.dTryggvi Guðm. ekki í landsliðiðinu ? er það vegna þess að hann spilar á íslandi með fh en ekki trelleborg í 6.deild í danmörku.
Þetta er orðið ágætt hjá Eyjólfi - nýjan þjálfra fyrir haustið - fá Guðjón í málið - hann fær allavegna menn til að berjast

[Stefán Friðrik Stefánsson, 14.6.2007 kl. 14:07]

Takk fyrir kommentin.

Ég er ekki sammála öllum greinilega. Eyjólfur er frontur liðsins og sem þjálfari á hann að tryggja að allt sé í lagi. Ef svo er ekki ber honum að víkja. Ef liðið er ekki að fúnkera er hann ekki að fúnkera sem þjálfari. Það er mjög einfalt mál. Þegar að fiskast ekki á skipinu er skippernum ekki sætt á sínum stóli. Einfalt mál, séð frá mínu gamla sjóarahjarta.

mbk.