Kynlífsþrælkun í átján ár - Stokkhólms-heilkenni

Samkvæmt fréttum er Jaycee Lee Dugard illa haldin af Stokkhólms-heilkenninu (Stockholm syndrome) eftir átján ára kynlífsþrælkun mannsins sem rændi henni. Þetta minnir á hina austurrísku Natöscu Kampusch, sem haldið var fanginni í áratug. Eftir prísundina vorkenndi hún allra mest þeim sem hafði rænt henni og haldið henni fanginni, eyðilagt líf hennar. Þetta er algjör heilaþvottur - sorgleg afleiðing einangrunar og yfirtöku á manneskju.

Fyrir þá sem ekki vita á nafngiftin fyrirmynd sína í bankaráninu í Kreditbanken í Stokkhólmi í ágúst 1973. Þar héldu bankaræningjar fjölda fólks sem gíslum sínum í fimm daga. Að bankaráninu loknu snerust gíslarnir til varnar fyrir þá sem héldu þeim föngnum og höfðu gjörsamlega verið heilaþvegnir. Alla tíð síðan hefur nafngiftin yfir tilfelli af þessum toga verið kennd við ránið athyglisverða í Stokkhólmi.

Natascha Kampusch var svo þungt haldin af Stokkhólms-heilkenninu að hún syrgði manninn sem hélt henni í tæpan áratug sem gísl sínum er hún vissi að hann hefði fyrirfarið sér. Hún reyndar stakk hann af en hún hafði greinilega lifað sama lífi og svo margir sem falla í faðm þeirra sem hafa eyðilagt líf þess. Hún var undir stjórn og heilaþvegin af drottnun. Þetta eru skelfileg örlög og sennilega eitt frægasta umhugsunarefni sálfræðinnar.

Jaycee starfaði fyrir ræningjann

Fær fólk eitthvað kikk út úr sprengjuhótunum?

Hvað eru þeir að hugsa eiginlega sem hringja inn í verslanir eða stofnanir með sprengjuhótun? Fá þeir eitthvað kikk út úr þessu eða er þetta bara hreint og beint bilun eða einhver áhugi á að komast í fréttirnar eða vera eitthvað mikilvægur eitt augnablik?

Þetta er samt brenglaður hugsunarháttur... rétt eins og var í Borgarholtsskóla. Annars veit enginn hvað olli því, hvort það var vilji til að einhver fengi frí í skólanum eða bara vímurugl sem gekk of langt.

Ætli þetta verði nýjasta tískan í kreppunni að hringja inn sprengjuhótanir?

Sprengjuhótun í Grafarvogi

Stelpurnar geta verið stoltar þrátt fyrir útkomuna

Ísland hefur nú lokið keppni á EM í Finnlandi. Þrátt fyrir þrjá tapleiki í dauðariðlinum geta stelpurnar verið stoltar af sínum árangri. Verkefnið var erfitt og augljóst að mikil spenna var í hópnum í fyrsta leiknum, sem tapaðist stórt. Við ramman reip var að draga. En þær áttu bestu augnablik sín í keppninni í síðasta leiknum, á móti Þjóðverjum.

Mér finnst það giska gott að hafa náð að halda í við þær þýsku sem eru í fremstu röð - eina markið í leiknum var ódýrari sortinni vægast sagt. En tap og vondur skellur eru alltaf mikið áfall, sama þó íslenska liðið eigi enga sögu í úrslitakeppni stórmóts í fótbolta.

En þetta er mikilvæg lexía í reynslusjóðinn þegar byggja þarf til framtíðar. Mikil tækifæri eru til staðar í íslenskum kvennabolta og það þarf að vinna enn betur til að byggja upp á þeim tækifærum.

Eins marks tap gegn Þjóðverjum

Þungt högg

Mikið og þungt högg er að missa eigur sínar í eldsvoða, hvort heldur sem er á heimili eða vinnustað. Tjónið er mikið og tekur oft á að byggja sig upp aftur eftir slíkt högg. Ekki er hægt annað en finna til með þeim sem misstu sín veiðarfæri, atvinnutæki og grundvöll sinnar tilveru, sérstaklega á þessum erfiðu tímum, þegar íslenskt samfélag verður sífellt fyrir þungum höggum.

Vona að Pétri takist að rísa upp úr þessum öldudal og fái tjónið bætt og geti náð að sjá bjartan punkt í þessu myrkri.'

„Þetta er búið spil“

Læknamistök - vandmeðfarið mál

Ég sé að sumir slá upp í grín meintum læknamistökum Norðmannsins. Vissulega er þetta vandmeðfarið mál og opnar eflaust á brandara fyrir þá sem hafa húmor fyrir því. En mikilvægt er að sjúklingar geti leitað réttar síns telji þeir á sér brotið og þeir hafi orðið fyrir alvarlegum mistökum lækna og hafi orðið fyrir skaða í aðgerð eða þegar þeir leita sér lækninga, væntanlega til að bæta líðan sína.

Mannleg mistök geta allsstaðar gerst, bæði í heilbrigðisþjónustu sem og annarsstaðar. Eflaust er eðlilegt að rannsaka vel umfang þeirra mannlegu mistaka. Þetta hafa aðrar þjóðir gert. Það getur orðið að fróðleik sem leiði til þess að bæta heilbrigðisþjónustu eða taka á mögulegum mistök til framtíðar litið, leiði til betrumbóta af einhverju tagi.

Í fjöldamörg ár var hálfgert tabú að ræða læknamistök, bæði mátti varla viðurkenna að þau ættu sér stað og það væru glufur í heilbrigðisþjónustu. Eftir að Lífsvog, samtök þeirra sem töldu sig hafa orðið fyrir læknamistökum, voru stofnuð hefur umræðan orðið meira áberandi og náð meiri athygli en áður var.

Sakar Landspítala um mistök

Völdin að veði í Icesave-málinu

Augljóst er að vinstriflokkarnir lögðu völdin að veði í Icesave-málinu. Bjarni Benediktsson, formaður Sjálfstæðisflokksins, hefur rétt fyrir sér í því að verði fyrirvarar Alþingis ekki samþykktir verði það hneisa fyrir vinstristjórnina, skipbrot samninganna sem þeir lögðu fyrir þingið og pólitískt fall þeirra forystumanna vinstriflokkanna sem lögðu allt undir fyrir þá.

Þeir sem bera ábyrgð á vinnu síðustu mánaða verða að taka ábyrgð á því ef hún hefur engu skilað nema niðurlægingu Íslands á alþjóðavettvangi: þeir hafa þá brugðist algjörlega. Spilað er undir með mikið í þessu máli. Þeir sem leiddu málið ranga slóð geta ekki flúið frá ábyrgð sinni í þessu stóra máli sem hafði engan stuðning út fyrir vinstristjórnina.

Sú ríkisstjórn sem nær ekki að tryggja vilja meirihluta Alþingis í fyrirvörunum við þennan vonda samning í þessu stóra máli er í raun umboðslaus takist henni ekki það verkefni sem henni var falið.

Víki verði fyrirvörum hafnað

Verður farið í samningaviðræður aftur?

Fyrstu viðbrögð frá Hollandi og Bretlandi gefa til kynna að engin sátt sé um fyrirvara Alþingis á Icesave. Fjölmargir hér heima sögðu fyrir samþykkt Icesave að ómögulegt væri að fara aftur í samningaviðræður, þó Svavar Gestsson og samninganefnd Steingríms J. hafi samið herfilega af sér. Fjölmörgum var talin trú um að það væri fjarstæða að tala um aðrar samningaviðræður.

Ekki er að sjá að Hollendingar líti þannig á að aðrar samningaviðræður séu fjarri, þó sumum þingmönnum vinstri grænna hafi verið talin trú um það. Allir sjá að Icesave-samningurinn hér heima er lemstraður. Hann hafði er á reyndi engan stuðning fyrir utan stjórnarflokkanna, allt brasið í sumar til að tryggja stuðning allra vinstri grænna hafði engin áhrif út fyrir það.

Auðvitað þarf að fara í aðrar samningaviðræður og reyna að ná hagstæðari samningi og taka þennan slag aftur, og þá með reyndu samningafólki en ekki pólitískum aflógum héðan frá Fróni.

Semja verði aftur um Icesave

Oasis leysist upp - frábært band

Um miðjan tíunda áratuginn var mikið rifist um hvort Oasis eða Blur væri betra band. Aldrei í vafa með að Oasis væri miklu betra, þeir voru í sérflokki þá og eru það enn nú. Frábær tónlist.

Nú er Noel farinn úr bandinu. Svosem búið að vera augljóst lengi að bræðurnir eiga ekki skap saman og geta ekki unnið saman.

En því verður ekki neitað að Oasis átti mörg yndisleg lög og enginn gleymir henni. Hún á sinn fasta sess.

Noel hættur í Oasis

Hörkutólið Eva skammar Steingrím J.

Eva Joly er mikið hörkutól. Ég er ánægður með að hún tali hreint út um sýndarmennsku Steingríms J. varðandi skipun starfshópsins. Auðvitað er það rétt hjá henni að þeim eigi að treysta sem hefur verið falið verkefnið nú þegar - hví að flækja verkefnið með þessum starfshópi nema til að friða kannski þá sem hafa orðið fyrir vonbrigðum með vinstristjórnina?

Þessi kjarnakona er að standa sig gríðarlega vel - mikill happafengur fyrir okkur Íslendinga að fá hana til verksins. Styrkleiki hennar verður enn meiri þegar hún þorir að skamma þá ráðamenn sem reyna með pólitískum útspilum að styrkja stöðu sína eftir vandræðaleg svik á kosningaloforðum.

Eva hefur áður þorað að tjá andstöðu sína við þá sem halda á málum í vinstristjórninni; fyrst með góðri grein í fjórum dagblöðum í fjórum löndum fyrr í þessum mánuði. Mikil óánægja var meðal vinstrimanna að Eva hefði skoðanir og varði Ísland á alþjóðavettvangi.

Gott er að hún sé vakandi yfir rannsókninni og þorir að skamma þá stjórnmálamenn sem reyna með billegum hætti að slá sig til riddara. Vel gert Eva!

Telur nýjan starfshóp pólitískt útspil

Munum 28. ágúst 2009

Sömdum við ríkisstjórnina

Vinstri græni lúserinn

Ansi er það nú smekklegt hjá Steingrími J. Sigfússyni að viðurkenna að hann sé lúserinn í atburðarás síðustu mánaða. Held að það sé vægt til orða tekið. Hann hefur gleypt allar sína pólitísku sannfæringu og hugsjónir fyrir völdin á mettíma - sett Íslandsmet í svikum á kosningaloforðum. Hvernig er hægt annað en vera lúser í atburðarásinni þegar svo aumt er orðið.

Steingrímur J. var eitt sinn þekktur sem hugsjónamaður... sá sem hafði hátt og sló sig til riddara. Karlinn á kassinum. Nú er hann lúserinn sem sveik hugsjónirnar. Smekklegt en rétt hjá Steingrími.

Eini lúserinn í kúrekamyndinni

Samfylking og VG taka alla ábyrgð á Icesave

Engin breið samstaða náðist um Icesave þegar það var samþykkt á Alþingi í morgun. Stjórnarflokkarnir bera fulla ábyrgð á þeim samningi sem skrifað var undir og eðlilegt að þeir beri hana á komandi árum. Því er ekki óeðlilegt að stjórnarandstaðan hafi greitt atkvæði gegn samningnum eða setið hjá. Sú ríkisstjórn sem gerði óásættanlegan samning hafði ekki þingmeirihluta á bakvið sig í málinu í upphafi og varð að berjast við þá andstöðu frekar en við stjórnarandstöðuna.

Upphaflega átti að koma þessum "glæsilega samningi" Svavars Gestssonar í gegnum þingið nær óséðum og leynd aflétt ekki fyrr en vafinn varð áberandi í herbúðum vinstri grænna. Andstaða fjölda þingmanna þar við samninginn varð til þess að lengja ferlið og tryggja þá fyrirvara sem lagt var drög að. Alls óvíst er hvað Bretar og Hollendingar segja við þeim, þó þeir hafi verið geirnegldir. Ljóst er altént að þeir verða að taka afstöðu til þeirra - þeir fá sent gagntilboð frá Alþingi.

Ríkisstjórnin ber hina endanlegu ábyrgð. Henni mistókst að tryggja þverpólitíska samstöðu við Icesave... málið er á ábyrgð þeirra þingmanna sem samþykktu frumvarpið, allra þingmanna stjórnarflokkanna, aðrir taka hana ekki á sig. Ekkert óeðlilegt svosem.

Icesave-frumvarp samþykkt

Heimt úr helju eftir vítisvist í átján ár

Meðferðin á bandarísku stelpunni sem losnaði úr átján ára prísund minnir óhugnanlega á Fritzl-málið ógeðfellda í Austurríki. Þetta er álíka sálarmorð og eyðilegging á saklausri sál... farið með hana og börnin sem hún eignaðist í prísundinni eins og hunda í bakgarði. Óhugnanleg lýsing... en ánægjulegt að henni hafi tekist að komast úr vistinni.... sem hljómar eins og helvíti á jörðu.

Vekur svo sannarlega athygli kastljóss fjölmiðla þegar að fólk er heimt úr helju eftir áralanga vist sem fangi einhvers - skelfilegt að svona geti gerst, einkum er um er að ræða börn sem eru í haldi vitfirrtra manna. Alveg ótrúlegt til þess að hugsa að engin viðvörunarljós hafi kviknað í nágrenninu rétt eins og í austurríska málinu.

Þetta er eitt af þessum óhugnanlegu málum, sannkölluð hryllingssaga. Væntanlega munu fjölmiðlar fylgjast jafnvel með Jaycee Dugard og þeim Elísabetu Fritzl og Natöschu Kampusch áður... báðar urðu heimsfrægar fyrir að segja sögu sína úr vítisvistinni.

Átti 2 börn með ræningjanum

Vonbrigði í Finnlandi

Mikil vonbrigði eru að stelpunum hafi mistekist að komast í átta liða úrslitin á EM í Finnlandi. Þær spiluðu mun betur í dag en í leiknum gegn Finnlandi en það dugði einfaldlega ekki. Auðvitað vonuðu allir að árangurinn yrði betri á þessari fyrstu úrslitakeppni íslensks knattspyrnulandsliðs. Væntingarnar voru miklar og því er áfallið eflaust meira.

En stelpurnar geta samt verið stoltar yfir því að komast á mótið. Staða kvennaboltans hefur styrkst mikið hér á Íslandi á síðustu árum vegna velgengni landsliðsins. Þær hafa byggt upp traust og gott lið og það starf heldur áfram þrátt fyrir vonbrigðin miklu í Finnlandi.

Ísland úr leik á EM

Málefnaleg orðræða er mikilvægari en ofbeldi

Ég er sammála Hannesi Hólmsteini að við eigum frekar að stunda orðræðu og málefnalega gagnrýni frekar en beita ofbeldi. Mér finnst þeir sem beita ofbeldi frekar auvirðilegir, ef það er þeirra eina leið til að tjá sig. Aðförin að Hannesi Hólmsteini dæmir sig sjálf... hún er frekar lágkúruleg. Ég skil vel að reiði sé í samfélaginu, en það er miklu heillavænlegra að beina henni í farveg málefnalegrar orðræðu og tjáskipta, heldur en að skemma eigur fólks eða ráðast að því.

Allir vita að Hannes Hólmsteinn Gissurarson er umdeildur maður, rétt eins og svo margir fleiri í þessu samfélagi. Þeir sem telja Hannes Hólmstein stóra sökudólginn í þeirri vitfirringu og brjálæði sem gekk hér á fram að hruninu eru á villigötum. Eflaust eru margir ósammála skoðunum hans, en ofbeldi gegn honum og þeim skoðunum er frekar ómerkilegt og dæmir sig eflaust sjálft.

Öllum er frjálst að hafa sínar skoðanir og tjá þær. Málefnaleg gagnrýni og heiðarleg skoðanaskipti eru samt miklu líklegri til árangurs en ofbeldið.

Aðsúgur að Hannesi Hólmsteini

Undrabarnið missir ofurlaunin

Þegar Jón Sigurðsson varð forstjóri FL Group, þegar Hannesi Smárasyni var sparkað út, var hann nefndur undrabarnið. Ofurlaunavitleysunni var samt haldið áfram og undarlegt að fyrst nú ári eftir hrunið sé tekið á þeim vinnubrögðum sem viðgengist hafa í ráðningarsamningum sem eru fjarri öllum veruleika ársins 2009.

Þetta er eitthvað svo 2007 þessi vitleysa sem hefur viðgengist og ætti að heyra sögunni til. Þetta er ágætt fyrsta skref í þeim efnum og ekkert óeðlilegt að sjálft undrabarnið taki á sig árið 2009.

Laun framkvæmdastjóra Stoða lækka um 70%

Sigmundur Ernir biðst loksins afsökunar

Sigmundur Ernir Rúnarsson, alþingismaður, gerir rétt í því að biðjast afsökunar á dómgreindarleysi sínu og alvarlegum mistökum í þingsal fyrir viku. En það gerir hann nokkrum dögum of seint og eftir vandræðalegar tilraunir til að fara með málið út í móa. 

Vörnin um að hann hafi ekki kennt áhrifa af drykkju og hann hafi aðeins drukkið tvö rauðvínsglös var pínleg í meira lagi - stórundarlegt að vanur fjölmiðlamaður skuli hafa haldið að ráðlegt væri að svæfa málið með því að ljúga sig út úr því.

Með því að leggja spilin á borðið styrkir hann stöðu sína vissulega... hann er samt skaddaður á eftir. Bæði það að fara á þetta golfmót í boði banka og fara svo til vinnu slompaður er dómgreindarleysi hjá þingmanni.

Þetta er örugglega ekki þau nýju vinnubrögð sem við krefjumst af nýjum þingmönnum... en það er líka kominn tími til að setja siðareglur sem taka á svona málum.

Lágmarkskrafa er að þingmenn mæti til vinnu edrú og séu með á hvað þeir eru að segja og gera... þetta er skammarlegur barnaskapur hjá fullorðnu fólki.

Sigmundur Ernir baðst afsökunar

Lifir Jackson eftir dauðann eins og Presley?

Sögusagnir um að Michael Jackson hafi stigið út úr líkbíl eftir dauða sinn fyrir tveimur mánuðum minnir ískyggilega á hinar lífseigu kjaftasögur um að Elvis Presley, fyrrum tengdafaðir hans, hafi ekki dáið í ágúst 1977 heldur lifi góðu lífi fjarri Graceland - hafi sviðsett dauðann til að eiga notaleg efri ár. Spurning hvort Jackson hafi viljað líf utan sviðsljóssins og sett allt heila dæmið af stað sem show til að auka vinsældir sínar og styrkja stjörnustöðu sína eftir alla erfiðu skandalana.

Þetta er svo fjarstæðukennt að það hljómar eflaust satt fyrir einhverja. Margir trúðu því virkilega í fjöldamörg ár að Presley hafi lifað góðu lífi eftir dauðann: gerðir voru þættir og skrifaðar bækur þar sem reynt var að styrkja þessa samsæriskenningu... sem var samt svo brjálæðislega absúrd og vitlaus. Sama leikinn á nú að reyna að leika eftir með Jackson.

Efast um að Jackson hafi viljað allt setja á svið allt showið sem hefur fylgt eftir dauðann.... allar kjaftasögurnar um einkalíf hans og börnin sem grasseruðu upp á sömu stund og fleiri keyptu plöturnar hans, hlustuðu á lögin hans og rifjuðu upp stjörnuljómann sem var löngu gleymdur. Held að þessi samsæriskenning sé jafn absúrd og var með Elvis.

Nema þá að þetta sé allt eitt show.... en heldur betur þarf að spinna vel til að geta leikið þann leik með alla þátttakendur frá upphafi til enda á réttum stað í réttri rullu.

Jackson lifandi?

Sigmundur Ernir viðurkennir áfengisnotkun

Sigmundur Ernir Rúnarsson, alþingismaður, hefur nú loks viðurkennt hið augljósa, að hafa fengið sér í glas áður en hann mætti til starfa í þingsal á fimmtudagskvöld. Hann var teymdur til að segja satt, en hafði áður reynt að ljúga sig út úr klípunni, áður en sögurnar um golfveisluna urðu opinberar. Þetta er vægast sagt mjög vandræðalegt og er þingmanninum til algjörrar skammar.

Hefði hann strax viðurkennt að hafa verið undir áhrifum hefðu margir eflaust getað fyrirgefið honum og þetta litið betur út, hið minnsta, fyrir hann. Vanur fjölmiðlamaður sem þekkir þankagang pressunnar, sérstaklega þeirrar gulu, á ekki að láta góma sig svona gjörsamlega í bólinu eða með höndina í kökuskálinni.

Vandræðalegt.... þetta er fyrst og fremst spurning um heiðarleika og menn sinni starfinu sínu með sóma. Það gera þeir varla eftir að hafa fengið sér í glas og ræða mikilvægt mál í sjálfum þingsalnum. Trúverðugleikinn er skaddaður á eftir.

Fékk sér léttvín með mat

Edward Kennedy látinn

Edward Kennedy, einn áhrifamesti öldungadeildarþingmaður í sögu Bandaríkjaþings, oft nefndur ljónið í öldungadeildinni, er látinn, 77 ára að aldri. Ted Kennedy hefur verið umdeildur stjórnmálamaður en hann er hluti af einni litríkustu valdaætt bandarískrar stjórnmálasögu. Hann sat i öldungadeildinni í 47 ár, allt frá árinu 1962, eða síðan John F. Kennedy, bróðir hans, varð forseti Bandaríkjanna, en hann var kjörinn í öldungadeildarsæti hans fyrir Massachusetts. Sæti Kennedys var geymt fyrir Teddy í tvö ár þar til hann náði löglegum aldri til að taka sætið.

Þegar bróðir hans, Bobby, var myrtur fyrir fjórum áratugum, í miðri kosningabaráttu til embættis forseta Bandaríkjanna, bjuggust flestir við að Ted myndi feta í fótspor bræðra sinna og sækjast eftir forsetaembættinu. Væntanlega hefði hann getað gert sterkt tilkall til embættisins hefði hann ekki farið svo illa úr Chappaquiddick-málinu á sjöunda áratugnum. Varð hann valdur að dauða einkaritara síns í bílslysi, stakk af frá slysstað og tilkynnti ekki um slysið fyrr en mörgum klukkutímum síðar. Hann sat áfram í öldungadeildinni en stórlega skaddaður pólitískt á eftir.

Hann sóttist síðar eftir forsetaembættinu árið 1980, fór fram gegn Jimmy Carter, þáverandi forseta Bandaríkjanna, en beið lægri hlut í eftirminnilegri baráttu. Einkalíf hans var þá í rúst, ekki aðeins var hann stórlega skaddaður enn af Chappaquiddick heldur var kona hans haldin drykkjusýki. Þau virkuðu ósannfærandi saman, enda hjónabandið komið í strand, og framboðið var aldrei sterkt. Tapið batt enda á valdasögu Kennedy-anna, enda var tapið skaðlegt fyrir Ted, en áhrif hans náðu ekki út fyrir öldungadeildina og innstu valdakjarna eftir það.

Hef ég ekki farið leynt með aðdáun mína á Kennedy-unum. John F. Kennedy og Bobby Kennedy voru miklir pólitískir snillingar sem sett hafa sögulegt mark á bandarísk stjórnmál, áhrif þeirra hafa náð út yfir gröf og dauða. Kennedy forseti féll fyrir morðingjahendi á hápunkti ferils síns og Bobby var hársbreidd frá því að ná í Hvíta húsið er hann var myrtur í Los Angeles, hafði unnið forkosningar demókrata í Kaliforníu það kvöld. Skarð hans var mikið. Ted Kennedy hefur verið sterkur talsmaður vissra hópa innan flokksins en aldrei náð styrk og stöðu bræðra sinna.

Hann hafði þó mikil áhrif í flokkskjarnanum og var óumdeilanlega leiðtogi Kennedy-fjölskyldunnar frá dauða Bobbys. Mótaði hann afstöðu fjölskyldunnar til lykilmála allt til hinstu stundar. Eftir að hann lýsti yfir stuðningi við Barack Obama í ársbyrjun 2008 komu helstu fjölskyldumeðlimir fram opinberlega og gerðu slíkt hið sama. Ethel Kennedy ákvað að styðja Obama með þeim orðum að hann væri eini maðurinn sem hefði komið til sögunnar í bandarískum stjórnmálum í áratugi sem minnti sig á eiginmann sinn, Robert F. Kennedy.

Maria Shriver ákvað að rjúfa hlutleysi sitt sem demókrata við hlið repúblikans, eiginmanns síns, á ríkisstjórastóli í Kaliforníu með því að styðja Obama. Og Caroline Kennedy Schlossberg sagðist styðja hann því að í honum sæi hún hugsjónir og kraft föður síns. Þær tóku sömu afstöðu og Ted frændi, hann réð ferðinni í Kennedy-fjölskyldunni og hafði markað línur fyrir börn fallinna bræðra sinna, sem hann gekk í föðurstað.

Stóra spurningin er nú hver taki sæti Teddys í öldungadeildinni. Háværar sögusagnir eru um að halda eigi sætinu í fjölskyldunni og reyna að koma Joseph Patrick Kennedy, syni Bobbys Kennedys, í það. Nokkrum dögum áður en Teddy dó reyndi hann að beita sér fyrir breytingum á skipunarreglum til að tryggja að sætið yrði skipað þó það myndi losna; sem var augljóst merki þess að hann væri að deyja.

Fylkisreglur í Massachusetts gera ekki lengur ráð fyrir því að ríkisstjóri skipi eftirmann. Þeim reglum var breytt árið 2004 af demókrötum sem réðu fylkisþinginu til að koma í veg fyrir að repúblikaninn Mitt Romney myndi sem ríkisstjóri velja eftirmann John Kerry ef hann yrði forseti Bandaríkjanna. Teddy beitti sér fyrir þeim breytingum. Fyrir nokkrum dögum vildi hann breyta þeim... fyrir sig.

Nú fer fram fylkiskosning innan 160 daga, væntanlega í janúar 2010, og það verða kjósendur í Massachusetts sem velja eftirmann Teddys í öldundadeildinni og velja þingmann þar til kjörtímabili Teddys lýkur í janúar 2010. Nú verður fróðlegt að sjá hvort Kennedy-ættin mun halda sæti Johns og Teds.

Edward Kennedy látinn