Er ekki óþarfi að auglýsa kreppuna í Leifsstöð?

Mér brá örlítið þegar ég sá spjaldið margfræga í Leifsstöð um hálfprísalandið Ísland á einni bloggsíðunni í gær. Hélt fyrst að þetta væri grín en svo reyndist ekki vera. Þetta er táknrænt spjald og eflaust ágætt fyrir einhverja að auglýsa sig svona fyrir viðskipti. En er nokkuð hægt að sökkva sér neðar en auglýsa það fyrir ferðamönnum við komuna hingað beint og okkur sjálfum þegar við fljúgum úr landi að við séum í svaðinu. Er ekki nóg sem nóg er?

Kannski verður myndin af hálfprísalandsspjaldinu ein af myndum ársins. Vel má vera. Við erum svosem ekki í neinni stöðu til að neita staðreyndum um að við stöndum illa. En er ekki nóg að allir viti að við séum í svaðinu og þurfum aðstoð þaðan. Er ekki óþarfi að gera út á viðskipti á þeim niðurlægingartóni? Ég held það og fagna því að þetta spjald sé farið og aðeins geymt í minningunni. Á meðan reynum við að horfa fram á veginn, ekki afturábak.

Auglýsingaspjöld tekin niður

RÚV tæknilega gjaldþrota - flókin Pálssaga

Ég skil vel gremju starfsmanna í Ríkisútvarpinu. Auðvitað hefði Páll Magnússon átt að afsala sér jeppanum og lækka laun mun meira en gert var á föstudag til þess að ganga í takt með sínu fólki. Þetta voru gríðarleg mistök hjá honum og hafa gert vonda stöðu enn verri fyrir Ríkisútvarpið í heild sinni. Enda sýnist mér hann vera rúinn trausti innanhúss og standa mjög illa.

Þessi flókna Pálssaga er fjarri því búin, enda erfitt að sjá hvernig hann geti verið trúverðugur forystumaður innan húss eftir að fréttamenn hafa afþakkað fréttalestur hans á kjörtíma í sjónvarpi. Hann hefði ekki getað fengið meiri skell en það kjaftshögg að starfsmenn fréttastofunnar vilji ekki sjá hann sem andlit fréttastofunnar. Hann verður varla trúverðugur í því hlutverki lengur.

En hver er staða Ríkisútvarpsins. Er það ekki tæknilega gjaldþrota? Hvað er til ráða. Hvernig á að bregðast við. Er réttasta lausnin á þeim vanda að ganga frá svæðisútvörpunum víða um land og því mikilvæga starfi sem þar er unnið. Þarf ekki að taka til á kontórnum í Efstaleitinu áður en kemur að þeim verknaði?

Óréttlætanleg ofurlaun

Leiðarljós Vigdísar - sameiningartáknið sanna

Mér þykir mjög vænt um að heyra í Vigdísi Finnbogadóttur tjá sig um mál málanna - rödd Vigdísar og boðskapur hennar er mikilvægt leiðarljós í þeim efnahagsþrengingum sem dynja á íslensku þjóðinni í skammdeginu. Mér hefur alltaf þótt vænt um Vigdísi og finnst mikils virði að hún tali til fólksins í landinu. Hún hefur mjög mikið fram að færa og hefur þann trausta styrkleika að njóta trausts og stuðnings allra - er hafin yfir dægurþrasið. Þó tólf ár séu nú liðin frá því að hún flutti frá Bessastöðum er Vigdís og verður alla tíð forseti í huga okkar allra.

Vigdís var sameiningartákn þjóðarinnar um langt skeið og er það í raun enn. Á þeim tímum þegar forseti Íslands, sem ætti að öllu eðlilegu að vera sameiningartákn þjóðarinnar, er ekki lengur traustsins verður og hefur farið svo illa úti í efnahagshruninu verður rödd Vigdísar enn meira virði. Við getum treyst því að hún talar af visku og sannleika um stöðuna og hefur þann sess að vera hafin yfir þessar átakalínur - ein af fáum landsmönnum sem allir geta treyst til að tala einlægt og án þess að hefja sjálfa sig upp.

Slíkt er og mikils virði. Eftir að Sigurbjörn biskup dó eru mjög fáir sem eru svo einstakir í þessu samfélagi að vera hafin yfir átök og hversdagslegt blaður. Vigdís er ein af þeim og verður enn mikilvægari fyrir vikið í huga landsmanna.

„ Særandi að vera sakaður um glannalegar athafnir “

Góðar tillögur hjá ríkisstjórninni

Mér finnst tillögur ríkisstjórnarinnar til bjargar fyrirtækjunum vera traustar og góðar. Þær skipta allavega miklu máli á þessum tímapunkti. Mér finnst ríkisstjórnin vera að ná vopnum sínum eftir erfiða tíð að undanförnu. Hún hefur sjaldan verið samhentari í orði og verki en eftir að stjórnarandstöðunni mistókst að koma með trúverðuga vantrauststillögu og náði ekki að fylkja alveg saman liði. Yfirlýsingar Steingríms J. Sigfússonar að undanförnu vekja líka efasemdir um hæfi hans til að vinna undir álagi. Engar eru heldur lausnirnar eða tillögurnar frá stjórnarandstöðunni.

Á síðustu dögum hafa leiðtogar stjórnarflokkanna verið saman sem mjög sterkt forystupar, sem tekur erfiðar og óvinsælar ákvarðanir í hita leiksins en getur fært okkur nýtt upphaf. Þeim á að gefa tækifæri til að stýra málum áfram en síðar verður kosið um forystu þeirra í efnahagslægðinni og hvernig tókst til í þeim efnum. Stjórnarandstaðan hefur ekki sýnt að hún sé ábyrgt afl við þessar aðstæður.

Bjarga á fyrirtækjunum

Gott kvöld með Ragnhildi Steinunni slegið af

Ég er einn þeirra sem hef gaman af góðu sjónvarpsefni og met mikils að sjónvarpsstöðvarnar geri vandað og gott íslenskt efni. Eitt af flaggskipum vetrarins hjá RÚV, Gott kvöld, hefur nú verið sleginn af í miðju kafi, bæði vegna minnkandi áhorfs og kostnaðar. Eitt og annað hefur gott verið gert í þættinum, en eftir stendur þó sú staðreynd að of í lagt er að eyða klukkutíma í einn gest án þess að hafa undirstöðuna ekki traustari og betri en raun ber vitni.

Ræður þar miklu að stjórnandinn, þó af öllum vilja sé gerð til að standa sig vel, stendur ekki undir verkefninu. Mér finnst hún ekki góð í viðtalstækninni og því verður öll umgjörðin utan um þáttinn vandræðalega veik. Húshljómsveitin hefur þó gert góða hluti og stöku sinnum verið fínir gestir, þó þátturinn með Eivöru Pálsdóttur beri algjörlega af. Hinir þættirnir hafa verið mjög misjafnir og sumir frekar slappir.

Mér finnst eðlilegt að Sjónvarpið hafi metnað til að gera viðtalsþætti með innihaldi og traustri umgjörð. Gísla Marteini og Hemma Gunn tókst að fá um eða yfir 70% landsmanna að sjónvarpstækjunum á meðan þeir voru á skjánum með kvöldskemmtiþátt árum saman og fleiri eru þeir svosem sem hafa verið með ágætis þætti. En erfitt er að leggja af stað í verkefni sem vantar undirstöðu í.

Slík verða örugglega eftirmæli Góðs kvölds - of í lagt að vera með einn gest og stjórnandinn náði ekki að halda utan um verkefnið. Því náði þátturinn aldrei flugi og sökk. En vonandi tekst að fylla pláss þáttarins með góðu efni. Getur ekki Sjónvarpið endursýnt það besta með Hemma og Gísla? Hvað með öll leikritin og skemmtiefnið sem Sjónvarpið tryggði sér sýningarrétt á? Hvenær sjáum við það?

Ört minnkandi áhorf á Gott kvöld

Mikilvægt að lækka laun æðstu embættismanna

Mér líst vel á að ríkisstjórnin ætli að standa fast við fyrri ákvörðun um að lækka laun æðstu ráðamanna þjóðarinnar þrátt fyrir úrskurð Kjararáðs. Mikilvægt er í ljósi erfiðrar stöðu í efnahagsmálum að skera niður og minnka launakostnað embættismanna, auk þess að breyta eftirlaunalögunum í jákvæða átt. Mér finnst ekki koma til greina að allir embættismenn séu á óbreyttum launum í því ástandi sem nú er uppi og það á að fara yfir alla línuna.

Auk þess finnst mér mikilvægt að þingið velti því fyrir sér að leggja niður aðstoðarmannastöður alþingismanna. Ekki er við hæfi eins og staðan er nú að hafa það kerfi óbreytt. Þingmenn geta sjálfir greitt aðstoðarmönnum laun ef þeir vilja hafa þá í þessu árferði.

Kjararáð getur ekki lækkað launin

Vantraust á Pál - fréttalesturinn afþakkaður

Ályktun fréttamanna hjá Ríkisútvarpinu verður ekki túlkuð nema sem vantraustsyfirlýsing við Pál Magnússon, útvarpsstjóra. Þegar fréttamenn afþakka að yfirmaður stofnunarinnar lesi fréttir, sem hann ákvað eiginlega sjálfur, er ljóst að gjá er á milli aðila. Í raun er með ályktuninni talað gegn stjórnunaraðferðum Páls og ákvörðunum hans að undanförnu. Þær eru skotnar niður af hálfu starfsmanna, fréttamannanna sem gera fréttirnar sem hann les innganginn að. Hvernig getur þetta gengið?

Mikil ólga er skiljanlega undir niðri í Útvarpinu. Sjálfur finn ég mikla ólgu með þá ákvörðun að slá svæðisstöðvarnar af. RÚVAK hefur verið stór hluti í fréttaþjónustu og dagskrárgerð héðan af svæðinu og það breytist mikið ef tillögur útvarpsstjóra komast endanlega í framkvæmd. Þá er tveggja og hálfs áratuga starf stöðvarinnar í raun búið að vera. Mjög sorgleg tilhugsun að öllu leyti, vægast sagt.

Staða Páls Magnússonar virðist stórlega löskuð innan húss í Efstaleitinu. Velti mikið fyrir mér hvernig gangi að stýra við þessar aðstæður. Fyrst af öllu vil ég fá að vita hvort hann heldur áfram að lesa fréttir gerðar af þeim sem hafa lýst yfir vantrausti á hann.

Fordæma uppsagnir á RÚV