Valdimar Leó kominn í Frjálslynda flokkinn

Valdimar Leó Friðriksson, alþingismaður, sem sagði sig úr Samfylkingunni í nóvember og verið þingmaður utanflokka, hefur nú gengið til liðs við þingflokk Frjálslynda flokksins. Öllum er nú ljóst að hann verður kjördæmaleiðtogi af hálfu flokksins; væntanlega í Suðvesturkjördæmi. Valdimar Leó tók sæti á Alþingi þann 1. september 2005 við afsögn Guðmundar Árna Stefánssonar, sendiherra, og var annar varaþingmaður Samfylkingarinnar í Kraganum eftir kosningarnar 2003. Það eru mikil tíðindi að þingsæti Guðmundar Árna sé nú komið á yfirráðasvæði Frjálslyndra.

Það eru engin tíðindi svosem í mínum augum að þetta hafi nú endanlega gerst að Valdimar Leó gangi til liðs við frjálslynda, enda skrifaði ég pistil hér að morgni 16. nóvember sl, eða áður en hann sagði sig úr Samfylkingunni og orðrómur fór af stað á fullu skriði, að hann myndi segja skilið við flokkinn innan tíðar og horfði mjög afgerandi til frjálslyndra. Hann lagði þó er á hólminn kom ekki í að ganga í Frjálslynda flokkinn samhliða úrsögn úr Samfylkingunni. Hann telur tímann vera nú væntanlega kominn, enda styttist í kosningar auðvitað.

Ég ítrekaði fyrri skrif í öðrum pistli að kvöldi 16. nóvember og gekk eiginlega lengra í fullyrðingum, eftir að Steingrímur Sævarr Ólafsson hafði staðfest þessar kjaftasögur og líka skrifað um málið. Nokkrir aðilar véfengdu þær heimildir sem ég hafði í fyrri skrifunum, sem bæði voru fengnar frá stjórnmálaáhugamönnum í kraganum og viðtali við Valdimar Leó á Útvarpi Sögu þar sem hann neitaði engu. Þær efasemdarraddir urðu rólegri í seinni skrifunum og gufuðu hægt og rólega algjörlega upp. Það vill að ég tel enginn afhjúpa sömu efasemdarraddir nú. Þeir sem vilja lesa efasemdarraddirnar geta litið á fyrri tengilinn hér og lesið. Athyglisvert að lesa kommentin nú.

Nú hefur Valdimar Leó opinberlega opinberað tilfærslu sína til frjálslyndra, svo að öll voru þessi skrif rétt af minni hálfu. Þar voru nákvæmlega engar fullyrðingar rangar eða eitt né neitt ýkt. Einfalt mál það. Væntanlega horfir Valdimar Leó til þess að reyna að fá umboð til að leiða lista frjálslyndra í kraganum, sínu gamla kjördæmi. Það er óvíst hver leiðir listann þar nú, enda engin prófkjör hjá frjálslyndum nú frekar en nokkru sinni áður. En þar eru nokkrir aðrir fyrir sem vilja leiða lista, en við öllum blasir að einhverskonar samkomulag hefur forysta Frjálslyndra gert við Valdimar Leó.

Í þingkosningunum 2003 leiddi Gunnar Örn Örlygsson Frjálslynda flokkinn í Suðvesturkjördæmi. Á miðju kjörtímabili gekk hann til liðs við Sjálfstæðisflokkinn. Þá vændu Frjálslyndir Gunnar Örn um svik og reyndu að beita sér fyrir því að Gunnar afsalaði sér þingmennsku sinni þar sem staða mála væri breytt frá kosningunum og hann ætti að hleypa varaþingmanninum Sigurlín Margréti Sigurðardóttur inn á þing í hans stað. Frá flokkaskiptunum hefur Gunnar Örn ekki hleypt frjálslynda varaþingmanninum sínum í Kraganum inn í sinn stað.

En leiðtogastóll Frjálslyndra í Kraganum er svo sannarlega laus. Það er spurning hvort að Frjálslyndir leiði kjörinn alþingismann Samfylkingarinnar til þess sætis í kosningum að vori. Það yrði kostulegt eftir sem eftir gekk meðal frjálslyndra með Gunnar Örn að leiða kjörinn þingmann annars flokks í sæti á sínum vegum. Pólitíkin er vissulega mjög skrítin tík. En nú eru semsagt þingmenn Frjálslynda flokksins aftur orðnir fjórir eins og eftir kosningarnar 2003 með inngöngu Valdimars Leós, fyrrum samfylkingarmanns, í hann.

Valdimar gengur til liðs við Frjálslynda flokkinn

Athugasemdir

[Kristján Pétursson, 21.1.2007 kl. 20:19]

Þegar stjórnmálamenn fara úr flokki fyrir það eitt að fá lélega niðurstöðu í prófkjöri,er ljóst að þeir ganga bara með þingmanninn í maganum,hugsjónin er engin.Valdimar Leós fór á þing fyrir Samfylkinguna sem varamaður og hefði náttúrlega átt að hafa manndóm í sér til að afsala sér þingmennsku,þegar hann sagði skilið við Samfylkinguna og varaþingmaður komið í hans stað. Hann gerir það sama og Gunnar Örn gerði á sínum tíma þegar hann fór úr Frjálslindafl.til íhaldsins,sem var síðan algjörleg hafnað í prófkjöri.Það sama bíður Valdimars,kjósendur hafna svona framboðum.