Viðtal á Stöð 2 - hugleiðingar um umdeilt framboð

Í kvöldfréttum Stöðvar 2 á sjöunda tímanum var sýnt viðtal Björns Þorlákssonar við mig þar sem ég fer yfir skoðanir mínar á pólitískri endurkomu Árna Johnsen. Ég hef nokkuð skrifað um þau mál hér síðustu vikurnar og skrifaði síðasta pistilinn um það á þriðjudag. Það voru afgerandi skrif, rétt eins og hin fyrri. Það er hið eina rétta að tala hreint út í þessum efnum. Þetta viðtal gekk vel og það kom mjög vel fram á Stöð 2 í klipptri útgáfu þess meginhlutinn af því sem ég hef um málið að segja.

Mér dettur ekki annað í hug en að tala tæpitungulaust um málið. Það er heiðarlegt og gott. Hef fengið mikil viðbrögð við skrifum mínum síðustu vikurnar, langflest eru þau á þá leið að taka algjörlega undir það sem ég hef haft um þetta mál að segja. Það er hið minnsta mál að endurtaka það í viðtali af þessu tagi þegar að eftir því var leitað.

Eins og fram kemur í viðtalinu er málið nú á könnu miðstjórnar. Hún hefur lokaorðið í þessu máli. Staðfesti hún listann í Suðurkjördæmi er þessu máli lokið hvað flokkinn varðar og sú niðurstaða er endanleg. Eins og vel kemur fram í þessu viðtali hefur trúnaðarfólk í kjördæminu staðfest listann og virðast afgerandi líkur á að sú verði raunin að miðstjórn taki sömu afstöðu.

Það kemur ekkert nýtt fram í viðtalinu í raun frá því sem upphaflega var í skrifum mínum. Ég tel þetta verða umdeilt mál, það er gömul saga og þarf ekki mig til að segja það. Hvað varðar uppreist æru taldi ég athyglisvert að handhafar forsetavalds skyldu staðfesta þá afgreiðslu mála. Að öðru leyti var um að ræða afgreiðslu eftir hefðbundnum leiðum.

Það voru ekki þeir sem völdu frambjóðandann til verka heldur flokksfólk á svæðinu. Það staðfesti traust í garð frambjóðandans og við það situr. Ég hef sagt mína skoðun og komið henni á framfæri. Meira verður það ekki - það er eðlilegt að hafa skoðanir. LS og SUS sögðu sitt og ég sem almennur flokksmaður segi mitt.

Ég hef málfrelsi og tala sem maður með skoðanir innan flokksins. Þessi vefur er lifandi skoðanaveita og ég hef alltaf verið þekktur fyrir að nota hann vel.

Athugasemdir

[Óskar Helgi Helgason (IP-tala skráð) 25.1.2007 kl. 23:01]

Heill og sæll, ágæti Eyfirzki Stefán Friðrik !

Gæti ekki verið, að þið Sjálfstæðismenn þyrftuð; almennt, að skoða setu formanns og varaformanns, í stólum sínum ? Það er afleitt, þegar mætasta fólk, jafnt hér úti á landi, sem og meðal Reykvískra, horfir gagnrýnislaust til þessarrar Helgrindar frjálshyggju og einkavæðingar, sem þau Geir H. Haarde og Þorgerður Katrín Gunarsdóttir sitja í forsvari fyrir. Ég man þá tíð, Stefán Friðrik; þegar Sjálfstæðisflokkurinn hafði það góða orðspor, að vera; í senn, þjóðlegur og íhaldssamur, í beztu meiningum þeirra orða. Virðing sú, sem flokkurinn naut, fram á síðasta áratug 20. aldar, er að mestu þorrin öllu hugsandi og þjóðernislega sinnuðu fólki, virðing, sem þeir skálkar og alþjóðavæðingar gosar, Davíð Oddsson og Hannes Hólmsteinn Gissurarson hafa átt mestan þátt í að skaða.

Hvað Árna Johnsen varðar, verð ég að biðja þig; að hafa Sunnlendinga og nærsveitarmenn afsakaða, með prófkjörinu í haust, voru þeir að þjóna lund sinni, lund sem ekki er hægt að reikna með; að Vestlendingar - Vestfirðingar - þið Norlenzku, hvað þá Svínfellingar í austri berið nokkurt skynbragð á. Hefi aldrei skilið, sjálfur, sérlyndi nærsveitamanna minna. Persónulega þekki ég Árna Johnsen ekkert, hafði þó löngum fundizt, að hann hefði þurft að vera meira afgerandi, varðandi ýmis hagsmunamál Sunnlenzkra, á sinni tíð, vill eflaust bæta þar úr núna.

Með beztu kveðjum, úr Árnesþingi /

Óskar Helgi Helgason, frá Gamla Hrauni og Hvítárvöllum       

[Stefán Friðrik Stefánsson, 25.1.2007 kl. 23:12]

Heill og sæll Óskar

Þakka þér fyrir innleggið. Sunnlenskir sjálfstæðismenn hafa í sögu sinni átt marga þingmenn. Þó að deildar meiningar séu um einn þeirra af minni hálfu ber ég mikla virðingu fyrir flokksmönnum og vonandi vinnur flokkurinn þar góðan sigur í vor. Þetta verða allavega líflegar kosningar.

mbk.

[Salvör Kristjana Gissurardóttir, 25.1.2007 kl. 23:30]

Flott hjá þér Stefán að halda svona einarðlega fram sjálfstæðri skoðun í þessu máli. Mér finnst skrifin þín ágæt en stundum finnst mér voða mikið eins og maður sé að lesa upp úr stefnuskrá sjálfstæðisflokksins eða endurómun af því sem forustan segir þega maður les bloggið þitt. þess vegna finnst mér sérstaklega gaman þegar þú hefur ákveðna skoðun sem kannski er ekki eins og forustan og þú stendur fyrir máli þínu.

[Haukur Nikulásson, 26.1.2007 kl. 01:02]

Stefán, þú ert á réttri leið. Þú sérð þetta allt í betra ljósi fyrr en síðar.