Hefur verið byggt of mikið á Akureyri?

Í hádegisfréttum Stöðvar 2 var athyglisvert viðtal við föðurbróður minn, Guðmund Ómar Guðmundsson, formann Félags byggingarmanna í Eyjafirði og fyrrum bæjarfulltrúa á Akureyri, þar sem hann segir þá skoðun sína að meira hafi verið byggt af húsum á Akureyri upp á síðkastið en svari í raun eftirspurninni. Telur hann t.d. að bærinn hafi ekki brugðist nógu hratt við breyttri samkeppni.

Eins og sagt hefur verið frá víða í fréttum að undanförnu hefur að undanförnu verið mikið fall í sölu fasteigna á Akureyri, eiginlega sögulega lítil sé litið á síðustu tíu árin eða lengur. Er það greinileg skoðun Mugga að of mikið hafi verið byggt á meðan að fasteignasalar telja skiljanlega, miðað við stöðu sína, að ástæðan sé að hægt hafi á fjölgun bæjarbúa. Er sjónarhorn Félags byggingarmanna mjög merkilegt að mínu mati og tek ég undir þær skýringar að of mikið hafi verið byggt en eftirspurn var fyrir.

Sjálfur hef ég heyrt af fólki sem þarf að leigja fyrri fasteign til að geta komið sér inn í þá sem nýrri er. Gott dæmi um þetta er eldra fólk sem hefur keypt sér íbúð í fjölbýli en getur illa losnað við fyrri fasteign, sem almennt er einbýlishús af stærri sortinni. Það sé neyðarúrræði í raun að leigja húsið til að komast áfram. Þetta er vont neyðarbrauð fyrir t.d. gamalt fólk. Svo má í raun benda á hvort að lítið framboð af einbýlishúsalóðum hér í bænum sé hluti af stöðu mála, en t.d. hafa hús sprottið upp með miklum hraða fram í firði og í Vaðlaheiðinni.

Staða mála á fasteignamarkaði hér nú er nokkuð ný af nálinni og þar standa nú eftir spurningar sem verður að svara. Velta má fyrir sér hvort að bærinn hefði mátt bregðast betur við þessari nýju stöðu sem upp er komin. Í raun er þetta mál sem um verður rætt hér. Staða mála eins og hún er núna skilur eftir fjölda spurninga, enda erum við að vakna upp hér við nýja og umhugsunarverða þróun að mínu mati.

Athugasemdir

[G. Tómas Gunnarsson, 30.1.2007 kl. 15:16]

Ef illa gengur að selja er það oftar en ekki vegna þess að verið er að biðja um hærra verð en markaðurinn er reiðubúinn að borga.  Það verður að hafa í huga að það er jafn eðlilegt að undir sumum kringumstæðum lækki verð á húsnæði, sem það er eðlilegt að það hækki undir öðrum.

Hvernig á bærinn að bregðast við breyttri samkeppni?  Er það yfirleitt verkefni bæjarins?

Bærinn á einfaldlega að hafa nóg framboð af lóðum, engin ástæða til að takmarka það.  Það hlýtur alfarið að vera á ábyrgð verktaka ef þeir byggja of mikið.

Ástand eins og virðist nú ríkja á Akureyri er alls ekki óalgengt eftir þennslutímabil.  Fáir vilja selja lægra verði heldur en hefur verið í gangi og margir halda að hækkunarskeiðinu  sé ekki lokið. 

Að byrja svo að tala um hvað opinberir aðilar eigi að gera er svo hrein vitleysa að mínu mati.  Afskipti hins opinbera eiga auðvitað að vera sem minnst af þessum markaði, rétt eins og öðrum.

Hið opinbera á að bjóða upp á lóðir (spurning hvort að það megi ekki leyfa einkaaðilum að skipuleggja svæði einnig) og reyna að hafa framboðið jafnt.  Auðvitað næst það ekki alltaf að framboð haldist 100% í hendur við eftirspurn, þannig að stundum koma tímabil þar sem er skortur (vonandi ekki löng) og stundum verður framboðið heldur meira en eftirspurnin (vonandi heldur ekki löng tímabil).