Úff... svakaleg vonbrigði að fá áttuna

Það eru svakaleg vonbrigði fyrir okkur að hafa ekki náð að hafa Spánverjana og sitja eftir með logandi sárt ennið með áttuna. En svona er þetta bara... bítum á jaxlinn og í hið súra epli. Það er greinilegt að liðið hefur verið sem sprungin blaðra eftir Danaleikinn, það var mjög sárt og vont að tapa þeim leik. Alveg ömurlegt í einu orði sagt.

Það er aldrei þægilegt að sitja eftir í áttunda sætinu á svona móti, en það er okkar kaleikur að þessu sinni. Einhvernveginn óttaðist ég eftir tapið fyrir Dönum að þetta færi svona en vonaði það besta. Það hefur gerst oftar en einu sinni allt þetta mót að maður hefur vonað það besta fyrir leik en óttast það allra versta. Oft tókst okkur að landa mikilvægum sigrum. Töpin eru þó nístandi vond... þau eru það og verða alltaf þannig.

Þó að allt hafi djöfullega farið á lokaspretti mótsins verðum við að bera höfuðið hátt. Strákarnir gerðu sitt besta og það skiptir máli. Þeim tókst að komast lengra á þessu móti en mörgum óraði fyrir og topp átta er ekkert skelfilegt, en hljómar þannig þegar að við vitum af því hvaða tækifæri voru í stöðunni en náðust ekki. Þetta er bara grunnur fyrir betra starf á næstu árum. Liðið sýndi karakter á þessu móti og tókst að landa mörgum flottum sigrum og gera líf okkar notalegt þessa dimmu skammdegisdaga. Það er gott.

...það gengur bara betur næst.

Ísland í 8. sætinu eftir tap gegn Spánverjum, 40:36

Athugasemdir

[Svavar Friðriksson (IP-tala skráð) 3.2.2007 kl. 16:57]

8 er nú slétt og falleg tala.

Ef ég man rétt þá er fótboltalandsliðið okkar númer 108.  Nú er bara að fylgja eftir þessu frábæra landsliði okkar og byggja ofan á með nægu fjármagni og verkefnum.

Áfram Ísland!

[Stefán Friðrik Stefánsson, 3.2.2007 kl. 18:55]

Já, Svavar, þetta er enginn heimsendir, en samt sár endalok.... enda munaði svo litlu að við flengdum Danina. En þetta er bara svona.

En ég ætla allavega á næsta mót.... það verður vonandi stuð þá. :)

mbk. 

[leibbi (IP-tala skráð) 3.2.2007 kl. 22:16]

Eins og Alli Gísla segir þá vantar stærri leikmenn og öflugri skyttur í Íslenska liðið. Við höfum ekki átt alvöru rétthenta skyttu upp á 2 metra síðan Akureyringurinn og KA maðurinn Julian Duranona var og hét. Hvernig getur hann verið Akureyringur spyrja sumir. Aðrir segja að Halldór Blöndal hafi ættleitt hann frá Kúbu. En málið er að Blöndalinn liðkaði fyrir því að Duranona fékk Íslenskan ríkisborgarrétt og þar með leikheimild með Íslenska landsliðinu. Nú er spurningin hvort HB geti ekki reddað öðrum risa eða hvort betra væri að fá Ólaf Ragnar í málið. 

[Stefán Friðrik Stefánsson, 6.2.2007 kl. 02:12]

Takk kærlega fyrir gott innlegg Leibbi. Gaman að lesa það.

mbk.