Máli gegn olíuforstjórunum þremur vísað frá

Máli ákæruvaldsins gegn forstjórum olíufélaganna á tímum olíusamráðsins var vísað frá í Héraðsdómi Reykjavíkur. Ákæruvaldið hyggst áfrýja niðurstöðunni til Hæstaréttar. Ein helsta forsenda dómsins er að ekk sé hægt að sækja einstaklinga til saka fyrir þau brot, sem ákært var fyrir. Þetta er athyglisverður dómur og verður fróðlegt að sjá hvað gerist fyrir Hæstarétti.

Það var þann 13. desember sl. sem að Bogi Nilsson, ríkissaksóknari, gaf út ákæru á hendur Kristni Björnssyni, fyrrum forstjóra Skeljungs, Einari Benediktssyni, forstjóra OLÍS, og Geir Magnússyni, fyrrum forstjóra ESSO. Þeir voru forstjórar olíufélaganna á tímum samráðsins fræga og hafa verið umdeildir vegna þess í huga þjóðarinnar. Ákæra á hendur þeim persónulega, en ekki olíufélögunum sem slíkum, voru stórtíðindi í málinu.

Gögn í málinu virtust mjög ljós í þá átt að olíufélögin þrjú hafi haft með sér mikið samráð á tímabilinu 1993-2001, eða þar til Samkeppnisstofnun hóf formlega rannsókn sína með því að fara inn í fyrirtækin og afla sér gagna um málið. Það verður fróðlegt að sjá hvaða stefnu málið taki nú.

Máli gegn olíuforstjórum vísað frá

Athugasemdir

[Haukur Nikulásson, 9.2.2007 kl. 19:25]

Ef þú tilheyrir réttum hópi þá skiptir ekki máli hvort þú játar glæpi eða ekki, séð er til þess að málinu sé eytt með einhverjum ráðum.

Stærsta þjófnaðarmál Íslandssögunnar er að gufa upp í dómskerfinu fyrir augunum á okkur. Þvílík hneisa!

[Ragnar Ólason, 9.2.2007 kl. 20:22]

Auðvitað er mikilvægt að dómstólarnir túlki lögin og niðurstaðan sé í samræmi við það, en láti ekki dómstól götunnar hafa áhrif á sína niðurstöðu. Þetta gildir í þessu máli sem og öðrum.

[Stefán Friðrik Stefánsson, 11.2.2007 kl. 10:26]

Takk fyrir góð komment. Fínar pælingar.

mbk.

[Jóhann (IP-tala skráð) 11.2.2007 kl. 20:01]

Já, hr. Ragnar. Dæmið sannar svo ekki verður um villst að kerfið virkar.  Þeir ganga út því málið fyrnist, en fólk sem gripið er glóðvolgt við stuld á ostaköku (að verðmæti 1029kr) fær 2 mánuði óskilorðbundna.

 Já, lofum kerfið: Það virkar svo sannarlega.