Sigurlín Margrét tekur sæti á Alþingi

Sigurlín Margrét Sigurðardóttir mun á mánudag taka sæti á Alþingi í fæðingarorlofi Gunnars Örlygssonar. Mun hún sitja á þingi til loka starfstímans á kjörtímabilinu í næsta mánuði og tekur því Gunnar þar ekki oftar sæti, í bili a.m.k. Þetta er í fyrsta skipti sem að Sigurlín Margrét fer á þing frá því að Gunnar sagði sig úr Frjálslynda flokknum í maí 2005. Gunnar hefur frá þeim tíma verið þingmaður í nafni Sjálfstæðisflokksins en Sigurlín Margrét verður á þingi utan flokka, enda hefur hún sjálf ennfremur sagt skilið við Frjálslynda flokkinn.

Í ljósi þess að þetta þingsæti tilheyrir ekki Sjálfstæðisflokknum sem slíkt, enda er þetta þingsæti í nafni F-listans í Suðvesturkjördæmi í kosningunum 2003, er ekki undrunarefni að varaþingmaður Gunnars sé óháð í þingstörfum, enda er Sigurlín Margrét sjálf ekki flokksbundin og mun ekki verða hluti að stjórnarmeirihlutanum við þessar aðstæður sem óháð. Það er því ljóst að stjórnarmeirihlutinn minnkar enn um eitt sæti, en stutt er síðan að Kristinn H. Gunnarsson sagði skilið við Framsóknarflokkinn. 33 alþingismenn styðja ríkisstjórnina við þessar aðstæður en 30 stjórnarandstöðuna Meirihluti ríkisstjórnarinnar er því orðinn tæpari en nokkru sinni í tólf ára sögu hennar.

Sú merka staða er reyndar komin upp að þrír efstu frambjóðendur á lista Frjálslynda flokksins í Suðvesturkjördæmi í kosningunum 2003 hafa allir yfirgefið flokkinn á kjörtímabilinu. Sigurlín Margrét gagnrýndi Gunnar harkalega er hann skipti um flokk fyrir tæpum tveim árum. Mér finnst það ekki réttmæt gagnrýni á Sigurlínu Margréti að hún sé að ganga á bak orða sinna með því að taka sjálf sæti á þingi nú verandi sjálf farin úr Frjálslynda flokknum. Hún tekur sæti á Alþingi sem óháð og skipar sér ekki sem fulltrúi flokks. Hún er þar á eigin vegum. Hefði hún verið komin í annan flokk sem fyrir er á þingi eftir úrsögn sína frá frjálslyndum hefði sama gagnrýni gilt um hana, en ekki ella.

Gunnar skipar nú tíunda sætið á framboðslista Sjálfstæðisflokkins í Suðurkjördæmi, en hann hlaut sætið í prófkjöri í nóvember. Það er því öllum ljóst að þingmannsferli hans er lokið. Gunnar hefur verið áberandi í stjórnmálum á kjörtímabilinu. Deilur voru meðal frjálslyndra vegna stöðu hans í kosningabaráttunni fyrir fjórum árum en hann var þá með dóm á bakinu og afplánaði refsingu strax eftir þær kosningar - hann hóf þingmannsferil sinn verandi í fangelsi. Engin lognmolla hefur verið í kringum hann hvort sem hann hefur skipað raðir frjálslyndra eða sjálfstæðismanna. Það verður fróðlegt að sjá hvort hann fari aftur á þing, með umboði sjálfstæðismanna, síðar.

Sigurlín Margrét er eini þingmaðurinn í tæplega 1100 ára sögu Alþingis Íslendinga sem er heyrnarlaus og tjáir sig því með táknmáli. Það er því ekki undrunarefni að barátta hennar fyrir þann hóp skipar stærstan sess í pólitík hennar - það er eðlilegt. Það er enda gleðiefni að sá hópur eigi fulltrúa á þingi. Í ljósi þess og að ég veit að Sigurlín Margrét sé heilsteypt kjarnakona sem hefur aldrei látið fötlun sína hefta sig óska ég henni góðs í þingstörfum næstu vikurnar, til loka starfstíma Alþingis á kjörtímabilinu.

Óháður inn fyrir sjálfstæðismann

Athugasemdir

[Svanur Sigurbjörnsson, 17.2.2007 kl. 16:00]

Góður pistill Stefán Friðrik.  Loksins fær Sigurlín Margrét tækifæri til að vinna á Alþingi að sínum málum.  Hún á okkar stuðning allan, sem sögðum okkur úr Frjálslyndum í kjölfar hörmulegrar framistöðu forystumanna þar.  Hér fer kjörkuð baráttukona á ferð sem á eftir að setja sitt mark á Alþingi.

[Stefán Friðrik Stefánsson, 17.2.2007 kl. 17:49]

Takk fyrir kommentin.

Hanna Birna: Veit ekkert hvað gerist með Gunnar - veit þó að hann er í 10. sæti á lista Sjálfstæðisflokksins í Suðurkjördæmi. Listinn var samþykktur fyrir mánuði. Ef hann fer annað í framboð verður hann að segja sig af listanum. Það verður fróðlegt að sjá hvað Gunnar gerir - kannski fer hann með Margréti. Hver veit. Gunnar situr ekki á þingi í umboði sjálfstæðismanna svo að þetta er í raun ekki mál sjálfstæðismanna hvernig fer með þingsætið hans til kosninga, eftir rúma 80 daga. Það er hans mál - hann á það við eigin sannfæringu.

Svanur: Takk fyrir gott komment og góð orð um skrifin. Já, Sigurlín Margrét er mikil kjarnakona, hlakka að sjá til verka hennar á þingi og þau mál sem hún leggur áherslu á og kemur fram með í sínu nafni.

mbk.