Ingibjörg Sólrún vildi ekki Jón Baldvin í heiðurssæti

Ingibjörg Sólrún Gísladóttir, formaður Samfylkingarinnar, beitti sér fyrir því að boð um heiðurssæti fyrir Jón Baldvin Hannibalsson, fyrrum utanríkisráðherra og formann Alþýðuflokksins, á lista flokksins í Reykjavík var afturkallað. Þetta var fullyrt í kvöldfréttum Stöðvar 2 rétt í þessu og vitnað þar í samtal við Jón Baldvin, sem vildi ekki koma í viðtal vegna málsins, en sagði að rætt hefði verið um að hann myndi taka heiðurssæti en boð um slíkt afturkallað eftir frægt viðtal Egils Helgasonar við JBH í Silfri Egils fyrir mánuði. Þar talaði JBH enga tæpitungu um stöðu flokks og formanns.

Þetta eru svo sannarlega stórtíðindi, enda hefur Jón Baldvin verið einn af Nestorum Samfylkingarinnar og verið í hávegum hafður þar. Hann var ötull stuðningsmaður Ingibjargar Sólrúnar Gísladóttur í formannskjörinu í Samfylkingunni fyrir tveim árum er hún felldi svila sinn, Össur Skarphéðinsson, fyrsta formann flokksins, af formannsstólnum. Jón Baldvin hefur frá lokum stjórnmálaferils síns, er hann hætti til að rýma í raun fyrir fyrri tímum gömlu A-flokkanna og stuðla að stofnun Samfylkingarinnar, verið mjög áberandi á bakvið tjöldin og talað máli flokksins og lagt honum lið, t.d. í utanríkismálum að undanförnu. Þeir tímar virðast vera að líða undir lok.

Að undanförnu hefur sú kjaftasaga orðið meira útbreidd að Jón Baldvin verði jafnvel þátttakandi í nýju framboði Margrétar Sverrisdóttur og tengdra afla. Ekki mun sú kjaftasaga deyja við þessi tíðindi, svo mikið er nú alveg víst.

Athugasemdir

[Kristján Pétursson, 28.2.2007 kl. 20:12]

Jón Baldvin virðist hafa svör við öllu ,sem út af hefur staðið hjá Samfylkingunni.Það er gott að yfirsýn hans nær svo vítt og breytt yfir sviðið,þá getum við farið til þessa góða lærimeistara og fengið að njóta þekkingar hans og reynslu .Vitanlega verður Jón í heiðurssæti hjá Ingibjörgu Sólrúnu,þar á hann heima,hún hefur ekki opinberlega hafnað honum,því er allar bollaleggingar þar að lútandi ótímabærar.

[Gautur (IP-tala skráð) 28.2.2007 kl. 20:39]

Það er varla hægt að halda því fram að þú sért Sjálfstæðismaður miðað við þann áhuga sem þú hefur á Samfylkinguni. Það er óþolandi ef menn geta ekki komið hreint fram og séu í öðrum flokkum en þeir eiga heima.

[Stefán Friðrik Stefánsson, 28.2.2007 kl. 20:47]

Gautur: Ég hef áhuga á þjóðmálum. Þetta er aðalfrétt fjölmiðla í kvöld og hlýtur að vera í umræðunni. Þegar að fyrrum formanni stjórnmálaflokks er hafnað um heiðurssæti vegna ágreinings við einn eftirmanna sinna á sama væng stjórnmálanna er það frétt. Punktur.

Kristján: Ég skil sárindi JBH og skil ekki í ISG. Ég hefði talið að það væri akkur í því fyrir SF að hafa reynslumikinn mann eins og JBH sér við hlið á framboðslista, þó aftast á listanum sé. Reynsla skiptir alltaf máli.

mbk.

[Ragnar Bjarnason, 28.2.2007 kl. 21:00]

Áhugavert, verð að segja það.

[Anton Þór Harðarson, 28.2.2007 kl. 21:12]

Þetta bara sannar það sem áður hefur oft komið fram, Formaður samfylkingarinar er hafin yfir alla gagnrýni og leyfir ekkert slíkt í sínum flokki, þeir sem reyna, eru bara sendir útí kuldan.

Þetta kallast víst sósíaldemókratí

[Kristján P. Gudmundsson, 1.3.2007 kl. 13:44]

ISG hugsar sín rád kalt og skýrt eins og skákmadur í kappskák en ekki at-skák. Hennar mat er samkvaemt ofangreindu, ad JBH er bara ped, en ekki riddari eins og mér finnst hann vera. Nafni minn Pétursson hefur adra skodun á  thessu en ég. Kristján Pétursson man kannske eftir heilagri Jóhönnu versus Jón Baldvin. Sporin hraeda, ISG vill ekkert vesen hvorki í dúr né moll fyrir komandi kosningar.Ég lái henni thad ekki. Med gódri kvedju, KPG.